महिला उद्यमी संजाल निर्माण ओ अन्तरक्रिया
पहुरा समाचारदाता
हसुलिया, २० कार्तिक । कैलालीके कैलारी गाउँपालिकामे अँटवारके महिला उद्यमी संजाल निर्माण तथा अन्तरक्रिया कार्यक्रम हुइल बा ।
वल्र्ड भिजनके आर्थिक सहयोगमे दिगो विकास समाज भजनीके आयोजना तथा कैलारी गाउँपालिकाके समन्वयमे ‘महिला तथा आप्रवासीहरु आर्थिक पुनस्थापना परियोजना’ अन्र्तगत महिला उद्यमी संजाल निर्माण ओ अन्तरक्रिया कार्यक्रम हुइल हो ।
कैलारी गाउँपालिकाके उपाध्यक्ष भगवतीकुमारी चौधरीके अध्यक्षतामे हुइल कार्यक्रममे उहाँ गाउँपालिकासे महिला उद्यमीके विकासके लाग बजेट विनियोजना करके सहकारी संस्था मार्फत टमान सीपमुलक तालिमके व्यवस्था करल बटैली । सहकारी संस्थामे कैगिल लगानीसे महिलाहुक्रे अपनेहे ढेर चिज उत्पादन कैना सुरु करल बटैली । उहाँ कहली, गाउँपालिकाके क्षमता अनुसार महिला उद्यमीहुकनके बजेट विनियोजन कैजाई । भारी बजेटके लाग प्रदेश ओ संघसे समन्वय कैजाई ।’
एक दिने अन्तरक्रिया कार्यक्रममे सहजकर्ता कैलारी गाउँपालिकाके महिला तथा बालबालिका शाखा प्रमुख बालकुमारी चौधरी गाउँपालिका अब्बे दुई ठो महिला संजाल गठन हुइल बटैली । पालिकामे चम्फा बोहराके अध्यक्षतामे महिला उद्यमी संजाल ओ गीता चौधरी महिला मानवअधिकार रक्षक संजाल गठन हुइल बा । कार्यक्रममे लैङिकता समनता ओ महिला अधिकारबारे सहजीकरण हुइल रहे ।
कार्यक्रममे दिगो विकास समाज भजनीके फिल्ड सहजकर्ता रमला चौधरी महिला संजाल निर्माण करके जिम्मेवारी बनाइक लाग कार्यक्रमके आयोजना करल बटैली ।
