प्रारम्भिक बालविकास केन्द्र अनुगमन
पहुरा समाचारदाता
हसुलिया, २० कार्तिक । सेतो गुराँस राष्ट्रिय बालविकास सेवा केन्द्र काठमाण्डौ ओ पीसविन कैलालीके संयुक्त टिमसे कैलारी गा.पा.४ स्थित गरिमा प्रा.वि.के बालविकास केन्द्रके प्राविधिक सहयोगके लाग अनुगमन करले बा । अँटवारके रोज कैगिल अनुगमनमे केन्द्रसे हुइल मजा अभ्यासहे अइना दिनमेफे निरन्तरता डेना ओ सुधार करे पर्ना पक्षहे क्रमश सुधार करटी लैजैना विद्यालयसे प्रतिबद्धता जनैले बा ।
अनुगमन टोलीमे सेतो गुराँस राष्ट्रिय वालविकास सेवा केन्द्रके कार्यकारी निर्देशक कुन्ती राना, पीसवीन कैलालीके कार्यकारी सदस्य हर्क वली सहितसे अवलोकन करके बालविकास केन्द्रहे थप प्रभावकारी बनैना आवश्यक सल्लाह सुझावके साथे विद्यालयहे आवश्यक परेबेर साझेदार संस्थाके ओरसे प्राविधिक सहयोग कैना प्रतिबद्धता जनाइल बा ।
साथे, गाउँपालिकाके अध्यक्ष राजसमझ चौधरी, उपाध्यक्ष भगवतीकुमारी चौधरी चौधरी, प्रमुख प्रशासकीय अधिकृत विरबहादुर ऐर तथा शिक्षा शाखा सहितके सहभागितामे बैठक बैठके युनिसेभके संयूक्त सहयोगमे ‘नेपालममा प्रारम्भिक बालशिक्षा र विकासको सवलीकरणका लागि प्रारम्भिक सिकाई तथा विकास मापदण्ड कार्यान्वयन परियोजना’से गाउँपालिकामे लागु करल आधारभूत तह (कक्षा १–३) के एकिकृत ढाँचाके पाठयक्रममे आधारित गतिविधिबारे छलफल हुइल रहे ।
कार्यक्रममे गाउँपालिका अध्यक्ष राजसमझ चौधरी शिक्षाके जग बालविकास ओ कक्षा एक रहल बटैलै । उहाँ कहलै, हम्रे शिक्षा, स्वास्थ्यमे ढेर ध्यान डेले बटी । अब्बे गाउँपालिका भर रहल अधुरा भवन सम्पन्न करटी गुणस्तरीय शिक्षाके टमान योजनाके साथ आघे बह्रटी ।’
बालविकास अनुसार शिक्षकके कमी नइरहल बल्की कहु विद्यार्थी ढेर कहु कम रहल ठाउँमे दरबन्दी मिलान कैना अवस्था रहल अध्यक्ष बटैलै । पीसविन कैलालीके जिल्ला परियोजना संयोजक शान्ति मगर अइना दिनमे कैना गतिविधिके बारेमे जानकारी करैले रहिट । बैठकमे पालिकाके शैक्षिक सुधारके लाग पालिकासेफे आवश्यक पहल तथा साझेदारी कैना विषयमे छलफल करल रहे ।
