खोप समन्वय समितिके मासिक समिक्षा

पहुरा समाचारदाता
हसुलिया, २० कार्तिक । कोभिड–१९ विरुद्धके खोप अभियानबारे कैलारी गाउँपालिकामे अँटवारके रोज खोप समन्वय समितिके मासिक समिक्षा बैठक हुइल बा । जिआइजेडके आर्थिक सहयोगमे फाया नेपालसे कैलारी गाउँपालिकामे लागु करल कोभिड–१९ विरुद्धके अभियान ‘खोप समन्वय समिति’हे सक्रिय बनाइक लाग बैठकके आयोजना कैगिल हो ।

कैलारी गाउँपालिकाके अध्यक्ष राजसमझ चौधरीके अध्यक्षतामे हुइल कार्यक्रममे कोरोना रोग विरुद्धके खोप अभियानहे सफल बनाइक लाग सक्कुहुनके सहयोग अपरीहार्य रहल उहाँ बटैलै । अध्यक्ष कहलै, ‘गाउँपालिका अब्बे स्वास्थ्य, शिक्षामे ढेर ध्यान डेले बा । भौतिक पूर्वाधारके विकास और बरसफे करे सेक्जाई मने अब्बेक आवश्यकता स्वास्थ्य, शिक्षा हो ।’

महिला स्वास्थ्य स्वयं सेविका स्वास्थ्यके जग रहल कहटी ओइनहे अब्बे प्रोत्साहनके लाग सेवा निवृत हुईबेर एक लाख नगद सहिट विदाई कैना अध्यक्ष बटैलै । ओस्टेक उहाँ शिक्षामे ध्यान डेटी विद्यालयके अधुरा भवन निर्माण कैना, जिर्ण भवनके मर्मत करटी गुणस्तरीय शिक्षाके लाग ठप प्याकेजके व्यवस्था कैना बटैलै ।

कार्यक्रममे फाया नेपालके सचितानन्द जोशी परिवार समाज कल्याण महासंघके तथ्याङकमे कैलारीमे कोभिड–१९ विरुद्धके खोप लगैना संख्या ४६ हजार ९८० मन्से पहिल डोज ३९ हजार ९७५, दुसरा डोज ३७ हजार ५२२ ओ टिसरा डोज सबसे कम २० हजार ४१७ लगाइल बटैलै ।

नेपाल सरकार जुलाई २०२२ सम शत प्रतिशतहे कोरोना रोग विरुद्धके खोप लगैना लक्ष्य लेहल मने अभिन ढेर जनसंख्या खोपसे बन्चित रहल उहाँ कहलै ।

कैलारी गाउँपालिकाके स्वास्थ्य शाखा प्रमुख नरेशकुमार चौधरी गाउँपालिकामे ४ हजार ३ सय १७ जाने कोरोना रोग विरुद्धके खोपसे छुटल बटैलै । उहाँ कहलै, ‘हम्रे महिला स्वास्थ्य स्वयं सेविकाहुकनहे खटैले रहि । ओइने खोप लगाइल तथ्यांक भरके घरमुलीके फोन नम्बर सहित नन्ले बटै ।’

वडा नम्बर ५ के अध्यक्ष विष्णुप्रसाद चौधरी खोप अभियान सफल बनैना सक्कु जानेक दायित्व रहल बटैलै ।
ओस्टेक अँटवारके रोज कैलारी गाउँपालिका स्वास्थ्य शाखाके आयोजनामे हुइल किटजन्य रोग नियन्त्रण एवं डेगु मलेरिया रोग मच्छर नष्ट कैना अभियान योजना तर्जुमा बैठकमे शाखा प्रमुख नरेशकुमार चौधरी डेगु रोगसे बच्ना उपायबारे जानकारी डेहल रहिट ।

डेङगु रोगके प्रभाव अगहन महिनासम रहना कहटी पालिकाके मुख्य–मुख्य बजार क्षेत्रमे, मनै जमघट हुइना ठाउँमे डेङगुके लार्भा नष्ट करेक लाग स्पे्र अभियान संचालन कैना बटैलै । कार्यक्रममे गाउँपालिका उपाध्यक्ष भगवतीकुमारी चौधरी, वडा अध्यक्षहुक्रे, कार्यपालिका सदस्य, भल्मन्साहुकनके सहभागिता रहल रहे ।