कोभिड पिरियाडके शिक्षा ग्याप तोल कक्षासे भरटी
पहुरा समाचारदाता
हसुलिया, २१ कार्तिक । कोरोना महामारी पिरियडके बेला दुई बर्षसम विद्यार्थीहुक्रे मजासे पह्रे नइपैलै, विद्यालय विद्यार्थीनके मुल्याङकन करटी परिक्षाफल प्रकाशित करल । मने ओकर परिणाम अब्बे डेखा परल कैलारी गाउँपालिकाके अध्यक्ष राजसमझ चौधरी बटैलै ।
युएस एडके आर्थिक सहयोगमे युनिसेफके समन्वयमे निडस नेपालसे संचालित शिक्षामे कोभिड प्रतिकार्य क्रियाकलापके अनुगमनके क्रममे उहाँ बाट बत्वाइल हुइट ।
कोभिड–१९ महामारी चलल बेला सबसे ढेर विद्यालय, विद्यार्थी प्रभावित हुइलै,’ गाउँपालिका अध्यक्ष कहलै, ‘विद्यालय संचालन करके पह्राई कैना अवस्था नइरहे । पहिल चरणके कोरोना संक्रमण फैलेबेर विद्यार्थी परिक्षा डेहे नइपैलै । दुसरा चो आधा कोर्समे परिक्षा डेलै । ओइनके आन्तरिक मुल्याङकनके आधारमे परिक्षाफल निकारके पह्राई हुइल । अब्बे हेरेबेर उहे वियाजके विद्यार्थीनके एसईइमे कम्जोर नतिजा डेखल बा ।’
उहाँ कहलै, देशभर एसइइ ओ कक्षा ११ ओ १२ के परिक्षाफल प्रकाशित हुईबेर सन्तुष्ट जनक नतिजा डेखल नइहो ।
गाउँपालिका शिक्षा ओ स्वास्थ्य क्षेत्रमे सुधारके लाग अपनहीफे लागल मने निडस नेपालसे संचालन करल गतिविधिसे ठप सहयोग पुगल गाउँपालिका अध्यक्ष राजसमझ बटैलै ।
कोभिड पिरियडके बेला शिक्षामे बहुट ग्याप रहल अब्बे बाल विकास ओ तोल कक्षासे संचालन हुइलपाछे उहीहे पूर्ति कैनामे सहयोग पुगल अध्यक्ष बटैलै । बाल विकास शिक्षाके जग रहल कहटी विद्यार्थी टिकैना आवश्यक रहलफे उहाँ बटैलै ।
कैलारी गाउँपालिकाके उपाध्यक्ष भगवतीकुमारी चौधरी तोल कक्षा संचालन हुइलपाछे विद्यार्थीनके पह्रना ओ लिख्ना बानीके विकास हुइल बटैली । विद्यार्थीनहे किताव रटाके सिखैनासेफे टमान मेरिक शैक्षिक समाग्रीके प्रयोग करलेसे सिख्ना ओ बुझनामे सहयोग पुग्ना उहाँ बटैली । विद्यार्थीन आवश्यक पर्ना शैक्षिक सामाग्री विद्यालयसे पुरा करे नइसेकल अवस्थामे गाउँपालिकासे सहयोग कैनाफे उपाध्यक्ष बटैली ।
गाउँपालिकाके प्रमुख प्रशासकीय अधिकृत विरबहादुर ऐर कोभिडके बेला पह्राईसे बन्चित हुइल ढेर विद्यार्थी कुलत ओ गलत संगतमे फसल बटैलै । पह्रना उमेरके बालबालिका लागु औषध दुव्र्यसनीमे फस्टी रहल ओरसे तोल कक्षा संचालन आवश्यक रहलफे उहाँ बटैलै ।
गाउँपालिकाके शिक्षा शाखा प्रमुख गणेश प्रसाद मिश्र पालिकाके ९ वडामे संचालन हुइल बालविकास कक्षा ओ तोल कक्षासे अभिभावकहुकनफे जोरना सहयोग पुगल बटैलै ।
जनकल्याण माविके प्रअ जगन्न नाथ चौधरी तोल कक्षा कोभिडमे छुटल कोर्षहे आघे बह्रैनामे सहयोग मिलल बटैलै । ओस्टेक करके उ विद्यालयके बालविकास ओ तोल कक्षा शिक्षक मुल्लु राना कक्षा संचालन हुइलपाछे विद्यार्थीनमे सक्रिय बह्रल बटैली । उहाँ कहली, ‘पहिले विद्यार्थी डराइट अब्बे अपनही बेले सेक्ना, परिचय डेहे सेक्ना अवस्था बा ।’ दुसर शिक्षक सुर्यवली चौधरी शैक्षिक सामाग्रीके प्रयोग करके पह्रैना सुरु करलपाछे विद्यार्थीनके संख्यामेफे बुद्धि हुइल बटैली ।
निडस नेपालके परियोजना संयोजक कर्ण बानियाँ कैलारी गाउँपालिकाके ९ वडामे एक सय २२ ठो तोल कक्षा संचालन करल बटैलै । विद्यार्थीनके पठन ओ लेखन बानीके विकास करेक लाग टयावलेट ओ ब्लुटुथके प्रयोगसहिट अध्यापनके व्यवस्था करल उहाँ बटैलै । यी परियोजना कैलारी गाउँपालिकामे गैल चैत्रसे ६ महिनाके लाग केल संचालन हुइल रहे । मने फेर ६ महिना म्याद थप हुके आब फेब्रुअरी महिनासम जैना उहाँ जनैलै ।
संयुक्त अनुगमन टोलीसे कैलारी गाउँपालिका वडा नम्बर ५ पवेरामे रहल जनकल्याण मावि, वडा नम्बर ३ टिसियन डाँडामे रहल कालिका प्रावि ओ वडा नम्बर ४ के गाउँमे रामजानकी प्राविमे संचालन हुइल बाल विकास ओ तोल कक्षाके गतिविधिबारे अनुगमन करल रहे ।
अनुगमनमे निडस नेपालके अध्यक्ष दुर्गा खरेल, उपाध्यक्ष धनबहादुर कुश्मी, कैलारी गाउँपालिकाके अध्यक्ष राजसमझ चौधरी, उपाध्यक्ष भगवतीकुमारी चौधरी, वडा–५ के अध्यक्ष विष्णु प्रसाद चौधरी, वडा–३ के अध्यक्ष सन्तराम चौधरी, वडा–४ के अध्यक्ष ठागुराम चौधरी, गाउँपालिकाके प्रमुख प्रशासकीय अधिकृत विरबहादुर ऐर, सामाजिक विकास शाखा अधिकृत यगम कलेल, शिक्षा शाखा प्रमुख गणेश प्रसाद मिश्र, महिला तथा बालबालिका शाखा प्रमुख बालकुमारी चौधरी, शिक्षा अनुगमन समिति संयोजक विनोद भट्टराई, निडस नेपाल परियोजना संयोजक कर्ण बानियाँ, फिल्ड सुपरभाइजर पुष्प उपाध्याय, निडस नेपालके दिपेन्द्र चौधरीलगायतके सहभागिता रहे ।
