कैलालीके उद्योगी, व्यवसायीसे ब्याजदर विरुद्ध प्रदर्शन
पहुरा समाचारदाता
धनगढी, २३ कात्तिक । कैलालीके उद्योगी, व्यवसायी चर्को ब्याजदर विरुद्ध प्रदर्शन करले बाटै ।
बैंक तथा वित्तीय संस्थासे अस्वभाविक चर्को ब्याजदर बह्राइल कहटी उद्योगी, व्यवसायीहुक्रे प्रदर्शन करल हुइट । बुधके धनगढीके ट्राफिक चौराहसे नेपाल राष्ट्र बैँक धनगढीसम मौन प्रदर्शन करल हुइट । कैलाली उद्योग वाणिज्य संघके आयोजनमे बैंक तथा वित्तीय संस्थासे बह्राइल ब्याजदरसे व्यवसाय सञ्चालन कैना समस्या हुइल कहटी विरोधसहित ब्याजदर घटैना माग करल हुइट ।
अध्यक्ष पुष्पराज कुँवर नेपाल राष्ट्र बैंकके चालु पुँजी कर्जा मार्ग निर्देशिका २०७९ मे करल व्यवस्था ओ कर्जाके ब्याजदरमे हुइल अस्वभाविक वृद्धिसे उद्योग व्यवसायी नै धरासायी हुइना कहटी विरोधमे उत्रे परल बटैलै । बैंक तथा वित्तीय संस्थासे कर्जा प्रभाह करेबर उद्योगी व्यवसायीप्रति मर्यादित व्यवहार करे पर्र्ना, कर्जाके ब्याजदरमे एकल अंक कायम करे पर्र्ना, विगतके चालु पूँजी कर्जा निर्देशिका यथावत राखके क्रमिक रुपमे लागू करे पर्र्ना, मौद्रिक नीतिमे रहल छुटहे कार्यान्वयन करे पर्र्ना लगायतके माग राखल बाटै ।
ओस्टके कैलाली उद्योग वाणिज्य संघके उपाध्यक्ष पुष्कर ओझासे राष्ट्र बैंकसे जारी कैना रिपो कम करे पर्र्ना, ब्याजदरमे वृद्धि नैकैना, ब्याजदर पुर्नसंरचना करे पर्ना ओ बैंकसे सुरु करल सक्कु लिलाम प्रक्रिया रोके पर्ना बटैलै । उहाँ बैंकसे लेना चर्को ब्याजदरके कारण व्यवसायी पलायन हुइना अवस्थामे पुगल बटैलै ।
बैंक तथा बित्तिय संस्थासे निरन्तर बह्रैटी रहल उच्च ब्याजदर, ताकेता ओ मानमर्दनसे निजी क्षेत्र पीडित बनल कहटी मंगरके रोज प्रधानमन्त्री शेरबहादुर देउवाहे १० बुँदे ज्ञापन पत्र फेन बुझाइल रहिट । नेपाल उद्योग वाणिज्य महासंघसे बैंक तथा वित्तीय संस्थाके ब्याजदरप्रति देशभर विरोध जनैटी रहल बाटै ।
