भुकम्पके जोखिमसे सर्तक रही

सुदूरपश्चिम प्रदेशके डोटी जिल्ला पूर्वीचौकी गाँउपालिका वडा नं ३ गैरागाउँहे केन्द्रबिन्दु बनाके गैल रात आइल भूकम्पमे परके ६ जाने ज्यान गुमैलै । कलेसे ५ जाने घाहिल अवस्थामे बटै । भौगोलिक दृष्टिकोणसे सुदूरपश्चिम भुकम्प, पहिरो ओ बाढके उच्च जोखिममे रहल बा । मंगर आधा रात दुई बजके १२ मिनेटमे शक्तिशाली भूकम्प आईबेर यहाँ धनजनके क्षति पुगैले बा । उ भूकम्पसे सुदूरपश्चिमके पहाडी जिल्लामे सयौं घर क्षतिग्रस्त हुइल बा ।

सुदूरपश्चिम प्रदेशहे केन्द्रविन्दु बनाके २२ दिन यहोर चार चो भूकम्प जासेकल भूकम्प मापन केन्द्र जनैले बा । कार्तिक १३ गते बझाङ जिल्लाहे केन्द्रविन्दु बनाके ४.६ रेक्टर स्केलके भूकम्प गैल कलेसे मंगर राति तीन चो भूकम्प गैल रहे । नौ बजेर सात मिनेटमे ५.७ रेक्टर स्केलके भूकम्प डोटी केन्द्रविन्दु बनाके गैल रहे कलेसे नौ बजके ५६ मिनेटमे ४.१ रेक्टर स्केलके सुदूरपश्चिमके खप्तडमे केन्द्र बनाके गैल रहे । ओकरपाछे लगातार छोटछोट भूकम्पके धक्का महसुस हुइटी रहल । यिहीसे सुदूरपश्चिम प्रदेश भुकम्पके उच्च जोखिममे रहल संकेत डेखा परठ ।

नेपालमे पछिल्का २२ दिनमे छ चो भूकम्पके धक्का महसुस हुसेकल बा । भूकम्प मापन केन्द्रके अनुसार यिहे कार्तिक २ गतेसे २३ गतेसम चार रेक्टर स्केलसे उप्परके ६ चो भूकम्पसे धक्का डेले बा । कार्तिक २ गते दुपहर ३ बजके ७ मिनेटमे सिन्धुपाल्चोकहे केन्द्र बनाके गैल भूकम्प ५.९ रेक्टर स्केलके रहे । उहे दिन तीन बजके ५३ मिनेटमे फेरसे सिन्धुपाल्चोक केन्द्र बनाके ४.५ रेक्टर स्केलके भूकम्प गैल रहे ।

२०७२ साल वैशाख १२ गते शनिच्चर दुपहर करिब १२ गोरखाके बारपार्क केन्द्रबिन्दु बनाके ७.८ रेक्टर स्केलके भूकम्प आइल, एक मिनेटमे नेपालके अवस्था कहाली लग्टीक बनाडेहल रहे । नेपालके मध्य भाग ढेर प्रभावित हुई पुगल रहे । गोरखा, धादिङ, रसुवा, काठमाडौं, ललितपुर, भक्तपुर, काभ्रे, सिन्धुपाल्चोक, मकवानपुर लगायतके १४ जिल्ला ढेर प्रभावित हुई पुगल रहे । उ बेला भूकम्पके कारण ८ हजार ६ सय ३३ जाने ज्यान गुमैले रहिट कलेसे करिब २२ हजार व्यक्ति घाहिल हुइल रहिट । उ प्रभावित जिल्लामे बसोबास कैना व्यक्ति नइमजासे मानविय तथा भौतिक क्षति व्योहोरे परल रहे । सुदूरपश्चिम प्रदेशमे मापदण्ड अनुसार घर नइरहना, घनाबस्ती, पहाडी भुभाग ढेर रहल बा । बर्षेणी पहिरो, बाढके कारण ढेर धनजनके क्षति हुइटी बा । डोटीमेफे भुकम्पसे पुरान घर भस्कलपाछे ६ जानेक ज्यान गैल हो । डोटी केल नाही प्रदेशके सक्कु जिल्ला भुकम्प, पहिरो, बाढीके ओटरे जोखिममे रहल बा । टबमारे समयमे सचेतना अपनाई ।