नागरिक उन्मुक्ती पार्टीसे ढकिया र्याली
पहुरा समाचारदाता
धनगढी, २७ कार्तिक । नागरिक उन्मुक्ती पार्टीसे कैलाली क्षेत्र नम्बर ५ अर्न्तगत धनगढीमे अगहन ४ गते हुइना प्रतिनिधि तथा प्रदेश सभा निर्वाचनहे लक्षित करके नागरिक उन्मुक्ति पार्टीसे धनगढीमे र्याली निकरले बा ।
कैलाली क्षेत्र नम्बर–५ प्रचारप्रसार समितिके आयोजनामे धनगढीस्थित मोतिचोकसे निकारल र्याली धनगढी चौराह, सहिद गेट हुइटी तारानगरमे समापन हुइना नागरिक उन्मुक्ति पार्टीके धनगढी नगर कमिटि अध्यक्ष दानबहादुर विष्ट बटैलै ।
चुनावी प्रचार/प्रसारके क्रममे सक्कु घर–घरमे जाई नइसेकल ओरसे र्याली मार्फत मत मग्ना ओ पार्टीके प्रचार–प्रसार कैना र्याली आयोजना करल उहाँ बटैलै । र्यालीमे नागरिक उन्मुक्ति पार्टीके वरिष्ट नेता लक्ष्मण थारु, केन्द्रिय उपाध्यक्ष सुनिता चौधरी, प्रदेश कमिटि सदस्य मोहन शाही, क्षेत्रीय कमिटि अध्यक्ष नीम चौधरी लगायत नेताके सहभागी रहे ।
नागरिक उन्मुक्ति पार्टीसे कैलाली क्षेत्र नम्बर–५ के प्रतिनिधि सभा सदस्यमे नल्का चुनाव चिन्ह पाइल स्वतन्त्र उम्मेदवार जगदिश चौधरीहे समर्थन करले बा । प्रदेशमे नागरिक उन्मुक्तिके उम्मेदवार गोठुराम चौधरी रहल बटै ।
उन्मुक्ति पार्टीके ओरसे क्षेत्र नम्बर–५ के प्रदेश सभा निर्वाचन क्षेत्र क मे श्रीराम चौधरी ओ प्रदेश सभा क्षेत्र ख मे गोठु चौधरी उम्मेदवारी डेले बटै । नागरिक उन्मुक्ति पार्टीके चुनाव चिन्ह ढकिया रहल बा ।
