नागरिक उन्मुक्ति पार्टी केन्द्रीय कार्यालयमे तोडफोड
पहुरा समाचारदाता
धनगढी, २८ कात्तिक । नागरिक उन्मुक्ति पार्टी केन्द्रीय कार्यालय टीकापुरमे अँट्वार रात ढुंगामुढा कैटी तोडफोड करल बा ।
पार्टीके केन्द्रीय अध्यक्ष रन्जिता श्रेष्ठ चौधरीके अनुसार रात साढे १२ बजे अपरिचित समूहसे ढुंगामुढा करल रहे । रन्जिताके बसाइँ फेन पार्टी कार्यालयमे रहे । ढुंगामुढा करुइया समूह भिट्टर नै छिरलै, नैटे दोहोरो भीडन्त हुइना सम्भावना रहे उहाँ कहली । रातके नै प्रहरी प्रशासनहे खबर कैलेसे फेन प्रहरीके फोन नै उठल अध्यक्ष चौधरीके कहाइ बा । पार्टीसे पत्रकार सम्मेलन गरेर ढुंगामुढाके घोर भ्रत्र्सना कैना जनैले बा ।
पार्टी कार्यालय तोडफोडके विषयहे लेके नागरिक उन्मुक्ति पार्टीके केन्द्रिय सदस्य तथा प्रतिनिधि सभा सदस्य पदके समानुपातिक उम्मेदवार इन्दु थारु सामाजिक सञ्जाल फेसबुकमे लिख्ले बाटी:
अपराधीहुक्रे,
हमार घरमे आगी लगैलै ।
लुटपाट ओ चोरी करलै ।
उल्टे हम्रहीनहे झुठा मुद्दा लगाके
धनगढी ओ डिल्लीबजार जेलमे कोच्लै ।
गोरामे नेल हाठमे हतकडी लगैलै ।
शासकहुक्रे फेनसे हम्रहीनहे डेखके डरैलै ।
काहे कि ओइने हमार विचार कैद करे नैसेक्लै ।
इन्दु थारुके पोष्टमे कमेन्ट कैटी पत्रकार दुर्गाप्रसाद भण्डारी लिख्ले बाटै, ‘आजके लोकतान्त्रिक युगमे केक्रो विचार उप्पर बन्देज लगाइ खोज्ना गलत हो, केक्रो फेन पार्टी कार्यालयमे ढुंगामुढा कैना खेदजनक हो ।’
ओस्टके आशिष रेग्मी फेन कमेन्ट कैटी लिख्ले बाटै, ‘ढुङ्गामुढा , हत्या हिँसा जैसिन अराजक व्यवहार आजके बहुदलिय लोकतान्त्रिक प्रणालीमे खेदजनक घटना हो ।’
शिवनारायण राना फेन खेदपूर्ण घटना कहटी सामन्तहुक्रनके हार मनस्थितिके उपज हो, जेल, नेल, ढुंगामुडा, धम्क्याइना, तर्सैना गतिविधिसे उत्पीडितहुक्रनके आवाज डबाइ नैसेक्ही इनके सामना कैना उत्पीडित एकजुट हुइही परी… कहिके कमेन्ट करले बाटै ।
‘पार्टी कार्यालयमे पार्टीके अध्यक्ष सुटल अवस्थामे अज्ञात समुहसे मध्यरातमे ढुंगा प्रहार करल रहिट । मध्यरातमे ढुंगा प्रहार बारे हम्रे प्रशासनमे जानकारी करैलेसे फेन उहाँहुक्रे इ बातमे सिरियस नैहुइलै,’ पार्टी प्रवक्ता दामोदर पण्डित कहलै ।
आघेक निर्वाचन २०७४ मे रेशम चौधरी जिटल उक्त क्षेत्रमे नागरिक उन्मुक्ति पार्टीे स्थानीय तह निर्वाचनमे चार पालिकासहित ९९ जनप्रतिनिधि जिटल बाटै । उ क्षेत्रमे नागरिक उन्मुक्ति पार्टी मजा पकड बनैले बा । उहे होके विरोधीहुक्रे ढुंगामुढा करल प्रवक्ता पण्डितके दावी रहल बा । नागरिक उन्मुक्ति पार्टी आसन्न निर्वाचनमे प्रतिनिधिसभा ओर ३४ ओ प्रदेशसभातर्फ ५७ जाने उम्मेदवार उठैले बा ।
कैलाली क्षेत्र नं १ मे रेशम चौधरीकी गोसिनीया रञ्जिता सँगे नेपाली कांग्रेससे रामजनम चौधरी ओ एमालेसे तपेन्द्र रावल उम्मेदवार रहल बाटै कलेसे राष्ट्रिय स्वतन्त्र पार्टी, राप्रपा, ओ कुछ स्वतन्त्र उम्मेदवार फेन रहल बाटै ।
ओस्टके अँट्वार रात स्व. टेक बहादुर साउँद स्मृति केन्द्रके पर्खाल फेन तोडफोड करल बा । इहे कात्तिक २१ गते रातके समयमे १५० मिटर पर्खाल भत्काइल रहे कलेसे अँट्वार रात करिब ५० मिटर पर्खाल अज्ञात समुहसे भत्काइल स्मृति केन्द्रके सचिव बीर बहादुर चौधरी जानकारी डेलै ।
निर्वाचनके मुहमे उहे रातमे नागरिक उन्मुक्ति पार्टीके केन्द्रीय कार्यालय ओ स्व. टेक बहादुर साउँद स्मृति केन्द्र (बाल उद्यान) मे तोडफोड हुइनासे मिलके बैठल समुदायहे बिखण्डनकारी पुनः टुक्राइ खोजल शिक्षक चित्र बहादुर चौधरी बटैलै ।
ओस्टके इहे कात्तिक २३ गते बुधके नागरिक उन्मुक्तिके उम्मेदवार चह्रना गाडीमे फेन तोडफोड हुइल रहे । कैलालीके धनगढी उपमहानगरपालिका १७ डुमलियामे बा ११ च ५८६० नम्बरके रोकल गाडीमे दिनके तोडफोड हुइल रहे । पार्किङ कैके चुनावी कार्यक्रममे गैल बेला कारके सिसा फुटाइल रहे ।
उ पार्टीके समानुपातिक ओरके प्रतिनिधि सभा सदस्य उम्मेदवार इन्दु थारु, प्रदेश सभा सदस्यके उम्मेदवार वलबहादुर साउँद, सावित्री चौधरी ओ थरुहट नेता लक्ष्मण थारु उ कार चह्रटी आइल रहिट ।
यहोर सत्ता गठबन्धनके उम्मेदवारके गाडीमे फेन तोडफोड हुइल बा । कैलाली निर्वाचन क्षेत्र नम्बर–३ प्रदेशसभा क्षेत्र ‘२’ के सत्ता गठबन्धनके उम्मेदवार अमरबहादुर साउँदके गाडीमे तोडफोड हुइल हो ।
घरदैलो कार्यक्रममे प्रयोग हुइल गाडीमे अज्ञात समूहसे तोडफोड करल जनाइल बा । घोडाघोडी नगरपालिका–५ मे घरदैलो कार्यक्रममे प्रयोग करल से १ च १५९० नम्बरके गाडीके पाछेक भागके सिसा फुटाइल बा ।
गाडी तोडफोड करुइया व्यक्तिके खोजी कार्य हुइटी रहल इलाका प्रहरी कार्यालय सुखड जानकारी डेले बा । उम्मेदवार साउद भर विपक्षीनसे नियोजित रुपमे तोडफोड करल आरोप लगैले बाटै ।
