कैलारीसे किसानहुकन अनुदानमे गोहुँ विया वितरण
पहुरा समाचारदाता
हसुलिया, २८ कार्तिक । कैलाली जिल्लाके कैलारी गाउँपालिकासे कृषकहुकनहे अनुदानमे गोहुँके विया वितरण सुरु करले बा ।
गाउँपालिका उपाध्यक्ष भगवतीकुमारी चौधरीके वडका पहुना ओ वडा नम्बर ४ के वडा अध्यक्ष ठागुराम चौधरीके अध्यक्षतामे सोम्मारके रोज वडा–४ के किसानहुकनहे गोहुँ ओ रब्बीक विया वितरण कैगिल हो ।
कैलारी गाउँपालिकाके समन्वयमे विश्व खाद्य संगठन नेपालके आर्थिक सहयोगमे वडा नम्बर के कृषकहुकनहे ४ सय ८८ गोहुँ ओ ९ बोरा मसरिक विया वितरण करल वडा अध्यक्ष ठागुराम चौधरी बटैलै । गाउँपालिकासे शत प्रतिशत अनुदानमे ३६ किलोके दरसे ६ सय किसानहुकनहे गोहुँ ओ २ किलोके दरसे १ सय ७० जनहनहे मसरिक विया वितरण करल बा । कार्यक्रममे कैलारी गाउँपालिका कृषि शाखा प्रमुख मैयाकुमारी चौधरी, वडा सदस्यहुकनकेफे सहभागितामे विया वितरण कैगिल बा । कार्यक्रमके संचालन वडा सचिव श्रीप्रसाद चौधरी करले रहिट ।
ओस्टेक करके वडा नम्बर ३ मे गैल बुधके रोज २ सय ७५ बोरा गोहुँक विया वितरण कैसेकल वडा अध्यक्ष सन्तराम चौधरी बटैलै । गाउँपालिकाके आर्थिक सहयोगमे ५० प्रतिशत अनुदानमे एक बोराके दरसे वितरण करल बटैलै ।
ओस्टेक वडा नम्बर २ मे ३०० बोरा ५० प्रतिशत अनुदानमे गोहुँक वितरण करल वडा अध्यक्ष विकास चौधरी बटैलै ।
वडा नम्बर ५ मे ३२० बोरा गोहुँक वितरणके लाग सक्कु गाउँक भल्मन्साहुकनहे सल्लाह करल वडा अध्यक्ष विष्णुप्रसाद चौधरी बटैलै । गाउँपालिकाके आर्थिक सहयोगमे आइल गोहुँ ५० प्रतिशत अनुदानमे वितरण कैना उहाँ बटैलै ।
वडा नम्बर ६ मे विया अइना प्रक्रियामे रहल वडा अध्यक्ष प्रेमबहादुर चौधरी बटैलै । ओस्टेक वडा नम्बर ९ मे फे गोहुँ विया अभिन नइपुगल वडा अध्यक्ष खेमराज चौधरी बटैलै । वडा नम्बर ७ मे गोहुँक विया पुगल मने वितरण कैना बाँकी रहल वडा अध्यक्ष दिपेन्द्र बम बटैलै ।
ओस्टेक करके वडा नम्बर ८ मे ११० बोरा गोहुँ आइल वडा अध्यक्ष तारामल कठरिया बटैलै । उहाँ कहलै, गाउँपालिकाके आर्थिक सहयोगमे गोहुँके विया आइल बा । किसानहुकनहे ५० प्रतिशत अनुदानमे विया वितरण करेक भल्मन्साहुकनसे सल्लाह कैगिल बा । हाली वितरण कैजाई ।’
वडा नम्बर १ मे गाउँपालिकाके आर्थिक सहयोगमे ३ सय बोरा गोहुँ विया आइल वडा अध्यक्ष धोजहरिपाल बोहरा बटैलै । कृषकहुकनहे ५० प्रतिशत अनुदानमे वितरण कैना उहाँ बटैलै ।
