नागरिक उन्मुक्ती पार्टी २० सित जिटना दाबी
पहुरा समाचारदाता
धनगढी, २८ कार्तिक । नागरिक उन्मुक्ती पार्टी प्रतिनिधि ओ प्रदेशसभा चुनावमे २० जिटना दाबी करले बा ।
सोम्मारके रोज धनगढीमे हुइल छलफलमे पार्टीके नेता लक्ष्मण थारु देशभर संघ ओ प्रदेशमे २० सित जिटना दाबी करलै । नेता थारु कहलै, ‘अबसिक बार पश्चिमके कञ्चनपुरसे पुरुव झापासम ढकियाके लहर बा । यी लहरहे कोईफे रोके नइसेक्ना अवस्था बा । नागरिक उन्मुक्ती पार्टी १६ सित प्रत्यक्ष ओ पाँच सित समानुपतिसे अइना अवस्थामे पुगल बा ।’
देशभर १० लाख समानुपतिक मत नन्नाफे नेता थारु कहलै । यी पार्टी टिसरा स्थानके लाग प्रतिस्पर्धा करटा, देशभर संघ ओ प्रदेशमे ९६ जानेक उम्मेदवारी डेहलफे उहाँ बटैलै । कैलालीके पाँचु निर्वाचन क्षेत्रमे सत्ता गठबन्धन केल अपनेहुकने प्रतिस्पर्धि रहल उहाँ बटैलै ।
कैलाली निर्वाचन क्षेत्र ४ प्रतिनिधिसभा सदस्य पदके उम्मेदवार कैया चौधरी भारी दल कम्जोर हुइल कारण गठबन्धन करल बटैलै । उहाँ कहलै, नेताहुक्रे अपन स्वार्थके लाग गठबन्धन करलै । जनता गठबन्धन नइस्वीकरल करले हुइट । अब्बे ढकियाके लहर बा । यिहीके क्याच करके हम्रे आघे बह्रल बटी ।’
अपने विजयी हुइलेसे टीकापुर घटनाके पर्दाफास करलेक लाग सात बरससे नुकाइल लाल आयोगके प्रतिवेदन सार्वजनिक करुइया पहिल एजेण्डा रहल उम्मेदवार कैया बटैलै । क्षेत्र नम्बर ४ मे थारुनके मत ढकियामे आई, ३ हजार दलित समुदायके मतफे यहोरे खन्याई सेक्ले अपन जित सुनिश्चित हुइना उहाँ दाबी करलै ।
सामानुपतिक उम्मेदवार इन्दु थारु राज्यसे थारुनहे सबैधानिक रुपमे ठगल बटैली । उहाँ कहली, सामनुपतिकमे सुरुमे खस आर्यहे धारके आदिबासी जनजाति, थारु, दलित, पिछडा वर्गहे जबफे पाछे पर्ना खेल हो ।’ न्याय ओ विकासके लाग अवसिक बार ढकियाहे विजय करैना आवश्यक रहल उहाँ बटैली ।
सामनुपतिक उम्मेदवार बलबहादुर साउद आदिबासी जनजाति, थारु, दलित, पिछडा वर्ग अभिनफे दासत्वमे जीवन विताई परल बटैलै । उहाँ कहलै, विकासके नारा और पार्टी लगैटी बा, अवसिक समान पहुँच, संविधानसे तोकल हक अधिकार सुनिश्चित करुवाइक लाग ढकियाहे जिटैना जरुरी बा ।’
स्थानीय तह चुनावमे कैलालीमे नागरिक उन्मुक्ती पार्टी पहिल पार्टीके रुपमे आइल कारण डरके मारे यहाँके शासक रेशम चौधरी ओ लक्ष्मण थारुके उम्मेदवारी खारेज करुवाइल उहाँ कहलै । आयोगसे कैना निर्णय क्याविनेट बैठक बैठके छलफल करके खारेज करुइयाफे उहाँ कहलै ।
सामानुपतिक उम्मेदवार सावित्री चौधरी स्थानीय तह चुनावमे छोट समयके प्रचारसे चार पालिका प्रमुख विजयी हुइल ओ अब्बे संघ ओ प्रदेशके चुनावमे जनजनके मनमे ढकियाके छाप बैठल बटैली । उहाँ कहली, अब्बे घरदैलो कार्यक्रमहे तिब्रता डेहल बा । नागरिक उन्मुक्ति पार्टी ओर दलकेफे आर्कषण बह्रल बा ।’
छलफल कार्यक्रममे नागरिक उन्मुक्ती पार्टीसे सर्मथन करल कैलाली निर्वाचन क्षेत्र नम्बर ५ प्रतिनिधिसभा सदस्य उम्मेदवार नल्का चुनाव चिन्हा लेहे उठल जगदिश चौधरी सक्कु जानेक आशिर्वाद लेके आघे बह्रटी रहल बटैलै ।
