थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २३ अगहन २६४६, शुक्कर ]
[ वि.सं २३ मंसिर २०७९, शुक्रबार ]
[ 09 Dec 2022, Friday ]
‘ अन्तर्वार्ता ’

‘माेर जितके घोषणा हुइना किल बाँकी बा’

पहुरा | १ मंसिर २०७९, बिहीबार
‘माेर जितके घोषणा हुइना किल बाँकी बा’

कृष्णकुमार चौधरी ‘कुन्दन’ जनयुद्ध लरल माओवादी नेता हुइट । २०६४ के संविधान सभाके निर्वाचन कैलाली क्षेत्र नम्बर ४ से उहाँ अधिक मतके साथ जिटल रहैं । संविधान निर्माण होसेकलबाद डा. बाबुराम भट्टराई नेतृत्वके नयाँ शक्ति पार्टीमे लागल उहाँ पाछे जनता समाज पार्टीमे आवद्ध हुइल रहैं । अब्बे उहाँ फेन माओवादीमे लौटल बटैं । संविधान निर्माणके क्रममे हुइल थरुहट/थारुवान आन्दोलनके एक नेतृत्वकर्तासमेत रहल उहाँ कैलाली क्षेत्र नम्बर ३ से प्रतिनिधि सभा सदस्यके चुनाव लरटैं । प्रस्तुत बा, वाम गठबन्धनके साझा उम्मेदवार कृष्णकुमार चौधरी कुन्दनसंग करल बाटचितके सारसंक्षेप ।

  • अप्ने लम्मा समयसम माओवादीमे रहि । सशस्त्र द्वन्द्वमे फेन सहभागी रलि ओ माओवादीके नेता फेन बन्लि । बीचमे पार्टी फेन बदललि । टब फेन पुराने पार्टीमे आइलि ओ उम्मेदवार बन्लि लौटलबेला कत्रा स्वागत हुइल ?

घरसे निकरके यात्रा करेबेर यात्रामे घुम्ती मोड अइटिरहठ । टबेमारे यी घुम्ती मोड पार करलेसे किल लक्ष्यमे पुगजाइठ । पुरान घरमे स्वागत एकदम हर्टलि हुइल बा । सक्कु नेता कार्यकर्ताहुक्रे ओ टरे ग्राउन्डलेवलके कार्यकताहुक्रे फेन एकडम खुसीके साथ हृदयसे स्वागत करलैं ।

  • अप्ने पहिले संविधान सभाके निर्वाचनमे निर्वाचित हुइलि ओ अब्बे प्रतिनिधि सभा सदस्यके उम्मेदवार बटि । उ चुनाव ओ यी चुनावमे कत्रा अन्तर पैले बटि, कैसिन अनुभूति हुइटा ओ जनताके प्रतिक्रिया कैसिन आइटा ?

पहिले संविधान सभाके चुनाव लरेबेर जनता उबेर संविधान कैसिन लिख्बो । कैसिन संविधान बनैबो । कहिके चासो लिइट मने अब्बे जनताके माझ जाइबेर ढेर विकासके बारेमे ओ अपन गाउँघरके अवस्थाके बारेमे ढेर चाँस लेहल मै पैनु ।

  • अप्ने जनताके माझ का मुद्दा लगके गिल बटि । अप्नेक उम्मेदवारी खासमे केकर लाग ?

मोर तीन÷चार ठो विषय बा । पहिल बाट टे केपी ओली देशमे प्रतिगमन घोषण संविधान ओरवैना करल देशहे संकटमे परले बटैं । ओकर भण्डाफोर करटि हम्रे जनताके माझ आइल बटि पहिल बाट यी हुइल । दोसर बाट कलेक जैसिक अब्बे राजनीतिहे कमाउ धन्दा पेशा बनाइल बा । राजनीति कलेक कमाऊ धन्दा नैहोके, पेसा नैहोके यी सेवा हो यिहिनहे सेवाके रूपमे लेहेपरठ कना बाट फेन हम्रे करले बटि । तेसर बाट यहाँ जनताके कृषि सम्बन्धी बाट बा, मलखादके बाट बा । सिँचाइके बाट बा, यिहिनहे हम्रे हल करब । खासकैके डगरघाट हुइल, लडिया तटबन्धके बाट रहल ओ सबसे भारी समस्याके रूपमे रहल यी बाढपीडितके समस्या हम्रे जिटके जाब कलेसे अइसिन टमान समस्या हम्रे समाधान करब । ओ, सुशासन, समाजवाद ओ समृद्धि हमार मूल लक्ष्य हो ।

  • आब यी नेकपा माओवादी केन्द्रके एकल प्रतिवद्धता नैरहल यी पाँच दलीय गठबन्धन सत्ता साझेदार गठबन्धनके साझा प्रतिवद्धता रहल । उ साझा प्रतिवद्धतामे देशके राष्ट्रिय स्वाधीनता ओ संविधानके रक्षाके बाट पलि बा । जो अप्नेहुक्रे उठैटि बटि । उ बाहेक क्षेत्र नम्बर तीनके जनता प्नहे निर्वाचित कैके का पैहिँ ?

जनता महिनहे काहे भोट डेना बाटमे पहिले टे मोर बिटल तीन वर्षे कार्यकाल पुरा करटसम कौनो मेरिक कुन्दन भ्रष्टाचार करल, लुटल, ठगल, जारदारु पिके थर्काइल कना कौनो रेकर्ड नैहो । उ हिसाबसे फेन जनता महिल भोट डिहि । औरे बाट जब नेपालमे सांसदके सभासद् कोषके अवधारणा आइलबाद उबेला मै सभासद् कोषसे पहिलचो नेपालमे एम्बुलेन्स नैरहे, कहुँ अटो रिक्सा नैरहे । टब्बहि मै एम्बुलेन्स नान्के एक नमुना काम करले रहुँ । ओहे कारण यी क्षेत्रके टमान जनता लाभान्वित हुइल रहैं । ओकरबाद औरे सभासद्हुक्रे फेन एम्बुलेन्स नन्लैं । ओस्टेक एक स्कुलके स्थापना करनु । जम्ने गरिब जनताके टमान छावाछाई पह्रठैं । विद्युतके समस्या रहे उ समयमे मै विद्युतके लाइन विस्तार करेक लाग जोन पहल करनु उहिनसे फेन जनता लाभान्वित हुइलैं । ओस्टेक यी सुखडओर करोडौंके लगानीमे खानेपानी योजना मै नन्ले रहुँ । उ कारण जनता महिल कुन्दन विकास करे सेकि कना विश्वास करले बा ।

  • अब्बे अप्ने माओवादी केन्द्रके उम्मेदवार बटि । पहिले औरे टमान आकांक्षी फेन रहैं । उ आकांक्षी टिकट नैपाके अप्ने पैलि । अप्ने कुछ समय माओवादीसे बाहेर फेन रहल रहि । यी अप्नेक निर्वाचनहे कत्रा असर करि । अप्नेक पार्टी भित्तर फेन यी कारण अन्तर कलह बा ?

मान्छेको स्वभाव के हो भने आफ्ना सामान्य इच्छा जाहेर हुँदाखेरि र आफ्ना असन्तुष्टिहरू हुने कुरा अलिकति मनमा ठेस लाग्ने कुरा चाहिँ त्यो जायज हो । हिजो टिकटका आकाङ्क्षी मेरा साथीहरू अहिले हर्टली फिल्डमा मेरो साथमा लाग्नुभएको छ । त्यस कारणले हाम्रो सबै साथीहरू टिकट नपाएर फिल्डमा नजाने साथ नदिने त्यस्तो छैन । सबै हर्टली लाग्नुभएको छ ।

  • माओवादी केन्द्रसे विस्थापित हुइल लखेटल टमान काँग्रेसके कार्यकर्ता बटैं । उ कार्यकता जो विस्थापित शुइल ती अब्बे उ निर्वाचन क्षेत्रके मतदाता बटैं ओइने माओवादीहे भोट डरहि या नैडरहि । काल्हके उ आक्रोश यथावत बा या मत्थर होसेकल ?

पहिल बाट टे देश अब्बे संकटमे बा । प्रतिगमनके खतरा अभिन हटल नैहो । ओहे कारणसे काल्ह काँग्रेसके संघरियन माओवादीसे दुःख पैलैं ओ माओवादीहुक्रे काँग्रेससे दुःख पैलैं । आब बाट का हो कलेसे अब्बे हम्रे उहाँहुकनसँग बाट ढरले बटि । कन्भेन्स करटि बटि । काल्ह भर एक ओइसिन परिवेस रहल । अब्बे हम्रे उ सक्कु बाटहे एक ओर ढैके यी समय कलेक देश बनैना समय हो । देशहे बचैना बेला हो । देशके स्वाधीनता ओ संविधान स्थिरता कायम करना बेला हो । ओहे कारण पहिलेक सक्कु पीडा बिस्राके देशके लाग एकजुट होके जाइपरल कहिके पीडित हुइलहुक्रे फेन हमार साथमे खुलके लागल बटैं । अइसिके मजा सहकार्य हुइलमे कौनो दुई मत नैहो ।

  • अब्बे अप्नेहुक्रे काँग्रेस ओ माओवादीके जोन एकीकरण बा । उ दूधमे पानी मिलाइ जस्टे बा या मट्टितेलमे पानी मिलाइ जस्टे बा ?

एकदम अब्बे हमार यी सहकार्य दूधमे चिनी मिलाइजस्टे बा । यम्ने कौनो दुई मत नैहो । अब्बे टे यी माओवादीके कार्यकर्ता हो, यी काँग्रेस के कार्यकर्ता हो कहिके छुट्टयइना कर्रा बा । सुरुसुरुमे भर ओइसिन नैडेखाइल रहे । आब टे माओवादी जय नेपाल ओ काँग्रेस लाल सलाम कना दिन आइल । यी देश ओ कालसे माग करल बाट हो । राष्ट्रसे माग करल बा हो । ओहे कारण अब्बे परिस्थितिहे हेरके एकसे औरेहे साथ डेहे परठ कना यी हमार सहकार्य हुइल हो । २०६२ सालमे हमार पार्टी एकजुट नैहुइल कलेसे सायद टे देशमे लोकतन्त्र, गणतन्त्र, संघीयता लगायतके उपलब्धि हासिल करे सेक्ना नैरहे । हमार शीर्ष नेताहुकनसे करल सहकार्यसे देश आज यी स्थानमे पुगल हो । यी गिरिजाप्रसाद कोइराला, सुशील कोइराला, प्रचण्ड जी ओ बादल जीहुकनके योगदान हो ।

  • अप्नेक प्रतिस्पर्धा किहिसे रहि ?

मै टु कठु मोर प्रतिस्पर्धा केक्रोसँग फेन नैहो । आब यहाँ गौरीशंकर जी बटैं । राप्रपा बा । ओकरबाद नागरिक उन्मुक्ति बा । टबफेन मोर जितके घोषणा हुइना किल बाँकी हो । उ शक्ति फेन कहठ, उ अब्बेक जनभाव फेन कहठ । २६ ठो वडा बा । २६ मे २० माओवादी, काँग्रेस, समाजवादी जिटल बा । बाँकी ६ वडामे किल औरे जिटल बटैं । टबेमारे हमार केक्रोसँग प्रतिस्पर्धा नैहो ।

  • अप्ने यी आघे २०६४ मे भारी मतान्तरसे विजयी हुइल रहि, यीचो भर कत्रके अन्तर रहि ?

यीचो मोर आंकलन टे १५ हजारसे ढेर जाइ ।

  • चुनाव जिट्ना आधार का–का बा ?

मै जिट्ना आधार टमान बा । पहिल बाट क्षेत्र नम्बर ३ मे गठबन्धनके जोन मजा साठगाँठ हुइल बा । मजा एकता हुइल बा । उ फेन एक जिट्ना बलगर आधार हो । आब औरे माओवादी कार्यकर्ताभित्रे कौनो फेन असन्तुष्ट नैहो । सक्कु कार्यकर्तामे एकरूपता बा । ओस्टेक औरे आधार कलेक मै जोन समाजसेवा करेबेर जनतासँग एकदम लग्गेक साइनो सम्बन्ध कैके जनताके सेवा करले बटु । उ सेवासे फेन जनता प्रभावित बटैं । मोर बारेमे कौनो फेन टीकाटिप्पणी करना ठाउँ नैरहल ओरसे यी फेन एक जिटना आधार हो । औरे जिटना आधार कना हो कलेसे मोर प्रतिद्वन्द्वी एकदम कमजोर, पहिलेक दिनमे टमान काण्डमे मुच्छल रहैं । टबेमारे फेन मोर जिट्ना आधार यी फेन हो ।

  • अन्त्यमे आम मतदाताहुकनहे का कना चाहटि ?

सक्कु मतदाताहुकनहे मै का आग्रह करना चाहटु कलेसे काल्ह फेन अप्नेन्के २०६४ सालमे अध्याधिक मत डेके महिन विजयी करैलि । अप्नेन्के मतहे सम्मान करटि कौनो ठाउँमे मै ठग्न, लुट्न काम नैकरनु । टबेमारे काल्हके दिनमे फेन महिन विजयी करैबि कलेसे मै अप्नेन्के मतके अपमान करना मेरिक गतिविधि नैकरम । अप्नेन्के मतहे सम्मान करना मेरिक मै अप्नेन्के सेवामे समर्पित रहम । टबेमारे आगामी अगहन ४ गते हुइना चुनावमे मोर चुनाव चिन्ह गोलाकार भित्तरके हँसिया हतौडामे अपन अमूल्य मतदान डेके महिनहे अत्याधिक मतसे विजयी करैबि कनामे मै ढुक्क बटु ।

जनाअवजको टिप्पणीहरू