कैलारीके बालकृष्ण चौधरी ११ दिनसे सम्पर्क विहीन

पहुरा समाचारदाता
धनगढी, ८ अगहन । ११ दिनसे हेराइल कैलालीके कैलारी गाउँपालिका ६ बेनौलीके ३२ वर्षीय वालकृष्ण चौधरी आभिन फेला नैपरल हुइट । गोदावरी नगरपालिका ७ हरैया गाउँमे गोसिनीयक ओरसे डिडी नातेदार कहाँ गैल कार्तिक २७ गते गैल उहाँ हालसम सम्पर्कमे नैआइल हुइट ।

हेरैटी रहल चौधरीके दादा सत्यनारायण चौधरीके अनुसार उहाँ कात्तिक २७ गते डिडीके घरमे पुगल रहिट । रात बैठल उहाँ २८ गते सकारे संघरियनहे भेटे जाइटु कहिके निक्रल रहिट । ओकरपाछे डिडीक घर समेत नै आइल उहाँ तीन दिनपाछे परिवारके सम्पर्कमे फेन नैआइलपाछे खोजी कार्य करल हो ।

वेपत्ता चौधरी सुदूरपश्चिम बहुद्देश्यीय सहकारी संस्थामे बजार प्रतिनिधिके रुपमे कार्यरत रहिट । सहकारीके कर्मचारी तीन दिनसम कार्यालयके सम्पर्कमे नैआइल कहटी ओहकान घरमे पुगलपाछे परिवारजन खोजी कार्य आघे बह्राइल हुइट ।

हरैयासे ओहकान परिवारजन ओहकान चलैटी आइल मोटरसाइकल, मोटरसाइकलके ब्लुबुक, लाइन्सेन्स, सहकारीके बचत पासबुक फेला पारल रहे । परिवारजन अगहन १ गते खोजी कार्यके लाग जिल्ला प्रहरी कार्यालय कैलालीमे निवेदन डेहल बाटै । मने प्रहरी हालसम खोजी कार्यमे कौनो चासो नैडेखाइल ओहकान बाबा रामप्रसाद चौधरी दुखेसो पोख्लै ।

जिल्ला प्रहरी कार्यालय कैलालीके प्रहरी नायव उपरीक्षक वेदप्रकाश जोशी निर्वाचनके कारण ध्यान पुगे नैसेकल स्वीकार कैटी खोजी कार्यहे तीव्रता डेना बटैलै । बेपत्ता रहल चौधरीके एक छावा ओ गोसिनीया सहित १५ जनहनके परिवार रहल बा ।