लैंगिक हिंसा विरुद्धके १६ दिने अभियान सुरु
पहुरा समाचारदाता
धनगढी, ९ अगहन । ‘सभ्य समाजके पहिचान लैंगिक हिंसा विरुद्धके अभियान’ मूल नारासहित शुकके रोजसे ३१ औं अन्तर्राष्ट्रिय लैंगिक हिंसा विरुद्धके १६ दिने अभियान सुरु हुइल बा ।
उ अवसरमे धनगढीमे शुकसे महिला मानव अधिकार रक्षक संजाल, ओरेक नेपाल, दलित महिला अधिकार मञ्चलगायतके संघ संस्थासे समुदायस्तरसे लेके जिल्लास्तरसम टमान कार्यक्रम आयोजना कैना पत्रकार सम्मेलन कैके जानकारी डेहल बा ।
अन्तर्राष्ट्रिय लैंगिक हिंसा विरुद्ध अभियान अन्तर्गत शुकके रोज धनगढी उपमहानगरपालिका वडा नम्बर २ मे ¥याली तथा अन्तरक्रिया कार्यक्रम हुइल बा । महिला मानव अधिकार रक्षक संजालके अध्यक्ष अमृता भण्डारीके अध्यक्षतामे हुइल उ कार्यक्रममे दलित महिला अधिकार मञ्चके अध्यक्ष सावित्रा घिमिरे १६ दिनसम हुइना कार्यक्रमके बारेमे जानकारी करैले रहि ।
उ अवधिमे कैलालीके टमान स्थानीय तहमे लैंगिक हिंसा विरुद्धके ¥याली, सिडाके सुझाव पुनर्ताजगी अन्तरक्रिया कार्यक्रम, रेडियो जिंगल, गुनासो संकलन, वक्तृत्वकला प्रतियोगिता, बालविवाह विरुद्धके अन्तरक्रिया कार्यक्रम, कानूनी प्रवधान जनचेतना अभिमुखीकरण कार्यक्रम, महिला हिंसासम्बन्धी सवाल उठान वकालतलगायतके कार्यक्रम हुइना ओरेक नेपालीके जिल्ला संयोजक बिनु राना जानकारी करैले रहि ।
महिला विरुद्धके हिंसा अन्त्यके लाग सन् १९९१ मे सेन्टर फोर ओमन्स ग्लोवल लिडरसीपके सहयोगमे महिला अधिकारकर्मी समूह करले रहे । ओकरबाद हरेक २५ नोभेम्बरसे लेके १० डिसेम्बरसम अन्तर्राष्ट्रिय अभियानके रूपमे विश्वव्यापी रूपमे मनैटि आइल बा ।
