सुदूरपश्चिम महोत्सवके ५० प्रतिशत तयारी पुरा
पहुरा समाचारदाता
धनगढी, ९ अगहन । इहे अगहन २२ गतेसे धनगढीमे हुइना सुदूरपश्चिम महोत्सवके ५० प्रतिशत तयारी पुरा हुइल बा ।
शुकके रोज पत्रकार सम्मेलन मार्फत महोत्सवक तयारी बारे जानकारी कराइल हो । कैलाली उद्योग वाणिज्य संघसे आयोजित सुदूरपश्चिम महोत्सवके १६ औं संस्करण हो । विगत १६ बरससे प्रदेशके कृषि, पर्यटन, उद्योग, व्यवसाय तथा व्यापार प्रबद्र्धनके लाग महोत्सव आयोजना हुइटी आइल बा ।
‘समृद्ध सुदूरपश्चिमके लाग आर्थिक समृद्धि’ कना मूल नाराके साथ हरेक बरस अगहन २२ से पुस २ गतेसम महोत्सव आयोजना हुइटी आइल बा ।
संघके एसोसिएट उपाध्यक्ष मनोज अग्रवाल महोत्सवके लगभग ५० प्रतिशत तयारी पुरा हुइल बटैलै ।
सुदूरपश्चिमके औद्योगिक, व्यापार, कृषि तथा पर्यटन मेलाके रूपमे मनाजैना महोत्सवमे कृषि उत्पादन, मह, जडीबुटी, हस्तकला, अल्लोका सामग्री, अलैंची, अदुवा, मसला, फर्निचर, अटोमोबाइल, गार्मेन्ट, इलोक्ट्रोनिक, होटल, सूचना प्रविधिलगायत व्यापारिक, रमाइलो मेला तथा बाल उद्यान सहितका ३ सयसे ढिउर स्टल रहना जनाइल बा ।
विगतमे संघीय सरकारहे २१ किलोके मालासहित २१ बुँदे माग ओ प्रदेश सरकारहे सात किलोके मालासहित ७ बुँदे माग राखगैल रहे । मने कुछ माग पुरा हुइल ओरसे इ बरस माग संशोधन कैना तयारी समेत करल जनाइल बा ।
इहे बिच कैलाली उद्योग बाणिज्य संघसे सुदूरपश्चिम महोत्सवमे स्टल बुकिङ ओ फर्म नविकरणमे छुट डेना हुइल जनैले बा । धनगढीके सडक विस्तार कैना क्रममे व्यापार व्यवसायमे क्षति पुगके पीडित बनल व्यापारीनहे स्टल बुकिङ ओ फर्म नविकरणमे छुट डेना हुइल हो ।
गैल बुधके कैलाली उद्योग बाणिज्य संघ कार्यसमितिके मासिक बैठकसे छुट डेना निर्णय करल हो । धनगढी बजारके कैलाली पुलसे क्याम्पस रोडसम सडक बिस्तारमे क्षति पुगल संघके नविकरण सहितके सदस्यताहे स्टल भाडामे ५० प्रतिशत छुट कैना निर्णय हुइल जनाइल बा । ओस्टके उद्योग बाणिज्य संघके सदस्यता नैरहलहे संघके सदस्यता डेके २५ प्रतिशतसम छुट डेना जनाइल बा ।
