कैलालीमे प्रदेश समानुपतिकओर नागरिक उन्मुक्तीके सबसे ढेर मत
पहुरा समाचारदाता
धनगढी, १२ अगहन । कैलालीके पाँच निर्वाचन क्षेत्र रहल प्रदेशसभा सदस्यके समानुपतिकओर नागरिक उन्मुक्ती पार्टी सबसे ढेर मत पैले बा ।
प्रदेश निर्वाचन कार्यालय डेहल जानकारी अनुसार ३ लाख १७ हजार ८०२ मत मन्से नागरिक उन्मुक्ती पार्टी कैलालीमे ८५ हजार ६८३ प्रदेश सामानुपति मत प्राप्त करले बा । नागरिक उन्मुक्ती पार्टी प्रतिनिधिसभा सदस्य ओ प्रदेशसभा सदस्य पदके लाग यिहे अगहन ४ गते हुइल प्रत्यक्ष निर्वाचनमे कैलाली जिल्लामे पहिल पार्टीफे बनसेकल बा ।
उ पार्टी कैलालीमे प्रतिनिधिसभा सदस्य ओर क्षेत्र नम्बर १, २ ओ ३ मे विजयी हासिल करल रहे । कलेसे प्रदेशसभा सदस्य ओ क्षेत्र नम्बर १ के दुनु क ओ ख मे, क्षेत्र नम्बर २ के ‘ख’ ओ क्षेत्र नम्बर ३ के क ओ ‘ख’ से विजयी हासिल करल हो ।
नेपाली काँग्रेससे कैलालीमे प्रदेशसभा ओर ६१ हजार ८८७ सामानुपतिक मत प्राप्त करल प्रदेश निर्वाचन कार्यालयके प्रमुख प्रेमराज भट्ट बटैलै । नेकपा एमाले ५९ हजार ५३२ मत, नेकपा माओवादी केन्द्र ३७ हजार ४७१ मत प्राप्त करले बा ।
ओस्टेक करके राष्ट्रिय प्रजातन्त्र पार्टी २३ हजार १७७ ओ नेपाल कम्युनिष्ट पार्टी (एकिकृत समाजवादी) ११ हजार ३३१ मत प्राप्त करल प्रदेश निर्वाचन कार्यालय धनगढी जनैले बा । कैलाली जिल्लामे ३ लाख १७ हजार ८०२ समानुपतिक मत खसलमे २ लाख ९७ हजार ५३ मत सदर हुइल रहे । कलेसे २० हजार २६४ मत (६ प्रतिशत) बदर हुइल बा ।
ओस्टेक नागरिक उन्मुक्ति पार्टी समानुपातिक मतगणनामे सुदूरपश्चिम प्रदेशमे चौठा रहल बा । निर्वाचन कार्यालयके अनुसार सुदूरपश्चिम प्रदेशमे अभिनसम गणना हुइल ९ लाख ७ हजार १ सय ३८ के मतगणनामे उन्मुक्ति पार्टी प्रतिनिधिसभाओ ८७ हजार ६ सय ८४ मत प्राप्त करले बा । प्रदेशसभा भर ८७ हजाार २ सय ३६ मत नन्ले बा । कैलालीमे प्रतिनिधिसभाओर ७४ हजार ४ सय ७ मत प्राप्त करले बा ।
