स्थानीयके जनजीवनके सवालहे उठाइ पर्ना जोड
पहुरा समाचारदाता
धनगढी, १३ अगहन । सामुदायिक रेडियोके भावी नीति निर्माण सम्बन्धी प्रदेश स्तरीय गोष्ठी हुइल बा ।
रेडियो प्रसारक संघ नेपालके आयोजनामे सोम्मारके सुदूरपश्चिम प्रदेशके अस्थायी राजधानी धनगढीमे हुइल हो । कार्यक्रममे सहभागीहुक्रे सामुदायिक रेडियोहे स्थानीयहुक्रनके जनजीवनमे गाँसल समस्या तथा सवालहे उठान करे पर्ना जोड डेहल रहिट । ओस्टके स्थानीय भाषाहे प्राथमिकता डेटी समाचार सम्प्रेषण, विज्ञापन तथा सन्देशमूलक सूचना प्रवाह, मनोरञ्जनके कार्यक्रम उत्पादन तथा प्रशारण लगायत आर्थिक, सामाजिक, राजनीतिक विषय बस्तु फेन प्राथमिकताके साथ प्रशारण करे पर्ना उहाँहुक्रे औंल्याइल रहिट ।
कार्यक्रममे वरिष्ठ पत्रकार उमिद बागचन सक्कु समुदाय, सक्कु उमेर समूहके व्यक्तित्वहे समेट्ना मेरके कन्टेन्ट बनाइ पर्ना ओ विश्वसनीय समाचार सम्प्रेषण करे पर्ना बटाइल रहिट ।
धनगढी उपमहानगरपालिका वडा नम्बर १८ के वडा अध्यक्ष भुवन रिजाल सामाजहे निर्देशन कैना सञ्चार माध्यम रहल बटैटी सञ्चार माध्यमहे सिमान्कृत, उत्पीडित, विपन्न वर्गके सवालहे प्राथामिकता डेहे पर्ना बटाइल रहिट ।
कार्यक्रममे सामुदायिक वन उपभोक्ता महासंघ सुदूरपश्चिम प्रदेशके महासचिव झुमा चौधरी सञ्चार माध्यमसे वन समुदायके सवालहे फेन उठान करे पर्ना बटाइल रही ।
ओस्टके कार्यक्रममे सहभागीहुक्रे सामुदायिक रेडियोहे स्थानीय सरकार, प्रदेश तथा संघीय सरकारसे विज्ञापन तथा अन्य कार्यक्रमके लाग समान व्यवहार करे पर्ना बटाइल रहिट ।
कार्यक्रममे वरिष्ठ पत्रकार चित्राङ थापा नेपालके सामुदायिक मिडियामे आदिवासी जनजातिके सवाल बारे प्रस्तुती करण करल रहिट । उहाँ खासकैके कैलाली कञ्चनपुरके हकमे रेडियो तथा संचारमाध्यम सञ्चालकहे आदिवासी जनजाति, थारु तथा राना थारु समुदायके सवालहे प्राथमिकताके साथ उठाइ पर्ना जोड डेहल रहिट । रेडियो प्रसारक संघ नेपालके सचिव अमर भट्टराईके अध्यक्षतामे हुइल कार्यक्रमके सञ्चालन सिपी लोहिया करल रहिट ।
