गौरीशंकर डेण्टल क्लिनिकसे हसुलियामे निःशुल्क डेण्टल शिविर

पहुरा समाचारदाता
धनगढी, १४ अगहन । हिमालयन गौरीशंकर डेण्टल क्लिनिकसे हसुलियामे निःशुल्क डेण्टल शिविर सञ्चालन कैना हुइल बा ।
डेण्टल क्लिनिकसे इहे अगहन १६ गते शुकके रोज आपन १३औं वार्षिकोत्सव तथा कैलारी गाउँपालिका–१, हसुलिया बजारमे शाखा विस्तारके क्रममे निःशुल्क डेण्टल शिविर आयोजना हुइना डेण्टलके प्रवन्ध निर्देशक रत्न एसके जानकारी डेलै ।

डेण्डल शिविरमे विडिएस करल दन्त चिकित्सकसे निःशुल्क चेकजाँच तथा औषधी उपचार समेत हुइना प्रवन्ध निर्देशक एसके बटैलै । यहोर १२ बरससे धनगढीमे सेवा डेटी आइल हिमाल गौरीशंकर डेन्टल क्लिनिक थप सेवा विस्तार करले बा । धनगढीके अस्पताल लाइनसे सेवा डेटी आइल क्लिनिक अब्बे पुरान कैलाली अस्पतालके पाछेसे सेवा सुरु सुचारु करले बा । धनगढीके मुख्य सडक कैलाली नालासे क्याम्पस चोकसम चाकर बनैना अभियानसे क्लिनिक ठाउँ सारे परल प्रवन्ध निर्देशक एसके बटैलै ।

इहीसे आघे सामान्य दाँतके किल उपचार कैटी आइल क्लिनिकसे आब अप्रेसन सहितके सेवा सुरु करल उहाँ बटैलै । ‘सुरुवातके दिनमे छोट ठाउँसे सुरु करल डेन्टल क्लिनिकहे अब्बेक दन्त सेवा, दन्त सेवाके प्रविधि सहित अस्पतालके रूपमे विकास करले बाटी’, उहाँ कहलै, ‘दन्त उपचारके लाग आब धनगढीमे भौँतारे पर्ना अवस्था नैहो ।’

क्लिनिकसे विडिएस करल दन्त चिकित्सक विडीएस डा. सुवन कार्की, एमडीएस डा. मनोज खड्का,एमडिएस डा. विजय कार्की, विडीएस डा. सुस्मिता महरा सहित १४ जाने अन्य स्वास्थ्यकर्मीनके सहयोगसे दन्त सेवा डेटी रहल क्लिनिक प्रवन्ध निर्देशक एसके बटैलै ।

क्लिनिकमे दाँतके छुट्टे एक्सरेके सुविधा, दाँत सफा कैना, दाँत भर्ना, दाँत निकर्ना, गिजाभिट्टर रहल बुद्धिबंगारा निकर्ना ओ गिजाके अप्रेसन कैना करल बा । थप अनुहारमे लागल चोटपटकके साथे हड्डी टुटलके उपचार मुहभिट्टर अइना घाउ खटिरा सिष्ट ट्युमर आदीके उपचार हुइटी रहल प्रवन्ध निर्देशक एसके बटैलै