सवारी दुर्घटनामे तीन जाने घाहिल
पहुरा समाचारदाता
धनगढी, १७ अगहन । कैलाली लम्कीचुहा नगरपालिका वडा न. ३ बल्चौर स्थित पुर्वपश्चिम राजमार्गमे स्कारपियो ओ अटो ठक्राके तीन जाने घाहिल हुइल बटै ।
शनिच्चरके रोज साँझ ४ बजे लम्कीचुहा नगरपालिका वडा न. ३ बल्चौरस्थित पुर्वपश्चिम राजमार्गमे पश्चिमसे पुर्वओर जैटी रहल बा १४ च ९५७६ नम्बरके स्कारपियो गाडीसे विपरित दिशासे जैटी रहल से १ ह ९३३ नम्बरके अटोहे ठक्कर डेहलपाछे तीन जाने घाहिल हुइल ईलाका प्रहरी कार्यालय लम्की जनैले बा ।
घाहिल हुइलमे लम्कीचुहा–३ बल्चौर बैठना वर्ष अन्दाजी २८/२९ के अटो चालक दिपक वादीके मुरीमे चोट, लागल दुनु हात गोर टुटके अवस्था गम्भीर रहल बाटिन । अटोमे पाछे बैठल उहे ठाउँक वर्ष अन्दाजी ३० के हरिश वादीके मुरीमे चोट लागके अवस्था गम्भीर ओ वर्ष २४ के कल्पना वादीके मुरी, दहिना हातमे चोट लागल मने अवस्था मध्यय रहल प्रहरी जनैले बा ।
दुर्घटनापाछे तिनु जनहनहे लम्कीस्थित लालरत्न अस्पतालमे उपचारके लैगिल मने उहाँ उपचार सम्भव नइहुइलपाछे थप उपचारके लाग मेडिकल कलेज कोहलपुर रिफर करल बा । दुर्घटनापाछे फरार स्करपियो चालक नेपालगन्ज उपमहानगरपालिका १० बैठना बर्ष ४१ के भुपेन्द्र बिक हे ईलाका प्रहरी कार्यालय चिसापानी नियन्त्रणमे लेहल रहे ।
