अपनत्वके भावाना हुइलसे केल वन संरक्षण करे सेक्जाई
पहुरा समाचारदाता
धनगढी, १७ अगहन । धनगढी उपमहानगरपालिका–७ स्थित देवरिया सामुदायिक वन उपभोक्ता समुहके १९ औं वार्षिक साधारण सभा शनिच्चरके रोज सम्पन्न हुइल बा । धनगढी उपमहानगरपालिका–७ के वडा अध्यक्ष मोती रानाके प्रमुख आतिथ्यमे हुइल कार्यक्रममे उहाँ डेवरिया समुदायिक वनसे सामाजिक क्षेत्रमे कैगिल योगदानके कदर करले रहिट ।
सामुदायिक बन सक्कु जानेक साझा सम्पति हो, वडा अध्यक्ष राना कहलै, ‘साझा सम्पतिमे सक्कु जानेक अपनत्व नइहुइटसम वन जोगाई नइसेक्जाई ।’ उहाँ कहलै, मै वडा नम्बर ७ के लाग साझा व्यक्ति हुँ, चुनाव आघे कौनो दलसे आइल हुइम, मने अब्बे कौनो पार्टी, जातीहे भेदभाव नइकरके आघे बह्रना मोर कर्तव्य हो ।’ अपने गलट डगरमे नेगे लग्लेसे जनता सुझाव डेहे सेक्ना उहाँ बटैलै । वडा नम्बर ७ मे बजेट सिलिङ कम रहल यहाँ ढेर विकास हुइल उहाँ बटैलै ।
अध्यक्ष राना कहलै, ‘सामुदायिक वन, ताल तलैया सरकारके हो, कोईफे अतिक्रमण नइकैना चाही, सरकार जब चाही सरकार नापके लेहे सेकी ।’ धनगढीके मुख्य बजारके सडक अतिक्रमण सरकार हटाई कना कोईफे सोच्ले नइरहिट । अब्बे तीन–तीन तल्लासमके भवन फोरे पर्ना अवस्था आइलफे उहाँ बटैलै ।
कार्यक्रमके विशिष्ट पहुना पूर्व वडा अध्यक्ष सिताराम राना देवरिया सामुदायिक सामाजिक क्षेत्रमे ढेर योगदान देहल बटैलै । यी वनुवासे उपभोक्ता प्रत्यक्ष लाभ लेनाके साथे शिक्षा, स्वास्थ्य, रोजगार, डगरघाट निर्माणमे सहयोग पुगल उहाँ बटैलै ।
कार्यक्रममे वनके कोषाध्यक्ष भागीराम चौधरी आर्थिक बर्ष २०७८/०७९ सालके असार मसान्तसमके २८ लाख ४६ हजार ६०४ रुप्या बराबरके आयव्यय प्रस्तुत करल रहिट । ओस्टेक करके बनके सचिव संगिना जाग्री आर्थिक बर्ष २०७८/७९ के प्रतिवेदन, पृथ्वी राना आर्थिक बर्ष २०७९/०८० के अनुमानित प्रतिवेदन प्रस्तुत करल रहिट ।
देवरिया सामुदायिक वन उपभोक्ता समुहके अध्यक्ष शारदा प्रसाद रानाके अध्यक्षतामे हुइल कार्यक्रममे टमान सामुदायिक वनके प्रतिनिधि मन्तव्य व्यत्त, करल रहिट । कार्यक्रममे वनके उपभोक्ता सदस्य जयराज जोशी दोसल्ला सहिट सम्मान कैगिल बा । कार्यक्रमके संचालन सचिव संगिना जाग्री, स्वागत मन्तव्य जगतराम राना करले रहिट । यिहे सांस्कृतिक कार्यक्रममे कैगिल रहे । यी सामुदायिक वनके क्षेत्रफल २५३.८७ हेक्टर रहल बा । यम्ने ९१५ जाने आवद्ध रहल बटै ।
