‘धनगढीके विकास कलस्टर अनुसार’
पहुरा समाचारदाता
धनगढी, १९ अगहन । धनगढी उपमहानपालिकाके विकास कलस्टर अनुसार कैना बटागिल बा । अँटवारके रोज धनगढी उपमहानगरपालिकासे कैलाली क्षेत्र नम्बर ५ से निर्वाचित प्रतिनिधिसभा सदस्य ओ प्रदेशसभा सदस्यहुकनहे कैगिल बधाई शुभकामना डेना कार्यक्रममे नगरप्रमुख गोपाल हमाल उ बाट बत्वाइल रहिट ।
उपमहानगरपालिका बनलपाछे अब्बे १९ वडा रहल बा जहाँ वडा–१ से ८ नम्बर वडासम शहरी क्षेत्रमे परठ कलेसे ११ ठो ग्रामीण क्षेत्रमे परठ । उहाँ कहलै, धनगढी उपमहानगरपालिका कलेक शहर ओ ग्रामीण क्षेत्र दुनु क्षेत्र परठ ।
शहरी क्षेत्रमे विकास हुइल बा । कलेसे ग्रामीण क्षेत्रके विकास कैना बाँकी बा ।’ यहाँ १८, १४, १९ नम्बर एक ठो कलस्टर बा । १६, १५ नम्बरके औरे कलास्टर बा कलेसे १३, ६ ११ नम्बर एक ठो कलास्टर रहल बा ।
उपमहानगरपालिकाके टमान ठाउँमे अभिनसम खानेपानी चर्पी सक्कुहुनके घरमे पुगल नइहो । कौनो ठाउँ यैसिनफे जहाँ बत्तीफे पुगल नइहो । उ ठाउँक नागरिक कैसिक कना की मै धनगढी उपमहानगरपालिकाके नागरिक हँु कहिके । टबमारे कतिपय विकास नगरपालिकासे करी, कतिपय प्रदेश ओ संघसे करे पर्ना उहाँ कहलै ।
शहरी क्षेत्रमे बसोबास करुइया गर्व करलेसे ग्रामीण क्षेत्रके मनै अभिन उपमहानगरपालिकाके नागरिक हुँ कहिके गर्व करे सेक्ना अवस्था नइहो । उपमहानगरपालिका–१७ के डुमल्य गाउँमे बर्खाके बेला जाईक लाग गौरीगंगा नगरपालिकाके क्षेत्रहुके अभिनफे जाई पर्ना अवस्था रहल उहाँ बटैलै ।
नगर प्रमुख हमाल कहलैँ, ‘उपमहानगरपालिकासे स्वास्थ्यमे वडा क्लिनिक संचालन करले बा । ओकर लाग प्रदेश सरकारसे भारी गारीके व्यवस्था करलेसे यिहीहे और व्यवस्थित बनाई सेक्जाई । भारी बस रहलेसे ओम्नेहे ल्याप, अल्ट्रसाउण्ड, भिडियो एक्सरे, वेडके व्यवस्था हुई सेकी ।’ निशुल्क वडा क्लिनिक संचालन हुइलपाछे आर्थिक अवस्था कम्जोर रहल नागरिकके आब मुरगी बेचके उपचार करैना समस्या ओराइल उहाँ बटैलै ।
प्रतिनिधिसभा सदस्य डिल्लीराज पन्त पहिले नगरपालिकासे समन्वय नइकरके प्रदेशके योजना लागु हुइल बटैलै । प्रदेश सरकार ओ स्थानीयतह विच समन्वय नइहुइलपाछे कतिपय योजना कार्यान्वयन कैनाफे समस्या हुइल उहाँ बटैलै । अब्बे समन्वय, सहअस्तित्व ओ सहकार्य करके गैलेसे विकास हुइना उहाँ बटैलै ।
२०७४ सालमे प्रदेशसभा सदस्यमे विजयी हुइलबेला मागल बजेट, नइपाके चाहल भौतिक पूर्वाधार विकास करे नइसेकल उहाँ बटैलै । अब्बे नेपाली काँग्रेस नेतृत्वके सरकार अइना प्रवल सम्भावना रहल ओरसे स्थानीयतहसे सहकार्य करके विकास गति आघे बह्रैना उहाँ प्रतिवद्धता जनैलै ।
उहे विच क्षेत्र नम्बर ५ के ‘क’ से विजयी हुइल रमेशसिंह धामी अपन क्षेत्र धनगढी उपमहानगरपालिकाके कुछ वडा ओ कैलारी गाउँपालिकाके वडा नम्बर ६ ओ ९ वडा परल ओरसे दुनु ओर ध्यान डेना बटैलै ।
उहाँ कहलै, ‘मोर क्षेत्रमे धनगढी उपमहानगरपालिका ओ कैलारी गाउँपालिकाके डुबान ओ ग्रामीण क्षेत्रमे पर्ना ओरसे पहिले ग्रामीण क्षेत्रके विकासहे प्राथमिकता डेजाई ।’ उहाँ उपमहानगरपालिकासे कैगिल बधाई सम्मान कार्यक्रमसे जिम्मेवारी ठपल ओरसे अवसे नागरिक सुझाव ओ स्थानीयतहके सहकार्य करके आघे बह्रना बटैलै ।
ओस्टेक करके क्षेत्र नम्बर ५ के ‘ख’ से विजयी हुइल प्रकाश देउवा काम करे खोजुइयाहे रोक्ना प्रवृति रहल बटैलै । उहाँ कहलै, ‘चुनाव ओराइल केकर विरुद्ध के का कहल आब विस्रादी । चुनाव कहलेक हारजीतके खेल हो । आब सक्कु जे मिलके विकास कैना जरुरी बा ।’
आब सक्कु जाने सिरियस हुके, एक आपसमे सहकार्य करके सहअस्तित्व स्वीकार करके विकास निर्माणमे लग्ना जरुरी बा ।
कार्यक्रममे नगर उपप्रमुख कन्दकला राना, प्रमुख प्रशासकीय अधिकृत रामलाल श्रेष्ठ, सक्कु वडाके वडा अध्यक्ष, नगरपालिका टमान शाखाके प्रमुखहुकनके उपस्थिति रहे ।
