धनगढी बहुप्राविधिक शिक्षालयमे तालाबन्दी

पहुरा समाचारदाता
धनगढी, २० अगहन । धनगढी बहुप्राविधिक शिक्षालय (धनगढी पोलिटेक्निक इन्ष्टिच्यूट) मे मंगरके तालाबन्दी करगैल बा ।

धनगढी उप–महानगरपालिकासे प्राविधिक शिक्षा तथा व्यावसायिक तालिम परिषद्सँगके साझेदारीमे सञ्चालन करल उ शिक्षालयमे तालाबन्दी करल हो । धनगढी उपहानगरपालिकासे आपन माग घरी घरी अनुरोध कैलेसे फेन माग पुरा नैकरल कहटी विद्यार्थीहुक्रे तालाबन्दी करल जनैले बाटै । इहीसे आघे सावन २४ गते फेन विद्यार्थीहुक्रे प्रयोगशाला निर्माण करे पर्र्ना, विषयगत शिक्षकसे पठनपाठन कराइ पर्ना लगायतके माग रख्टी शिक्षालयमे तालाबन्दी करल रहिट ।

शिक्षालय धनगढी उपमहानगरपालिका वडा नं ६ जालीमे रहल बा । यहाँ महानगरपालिकासे सामान्य प्रयोगशाला समेत निर्माण नैकरेबर विद्यार्थी प्रयोगात्मक अभ्यास कैनासे वञ्चित रहल बाटै । सामान्य प्रयोगात्मक अभ्यासके लाग समेत बजार तथा औरे विद्यालयके प्रयोगशाला जाइ पर्ना अवस्था रहल विद्यार्थीहुक्रनके गुनासो रहल बा ।

इन्ष्टिच्यूटमे अटोमोवाईल इन्जिनियरिङ्ग चौथो सेमेस्टरमे अध्ययनरत विद्यार्थी मृगेन्द्र सिंह ईन्ष्टिच्यूटके निर्देशक सूर्यबहादुर कार्कीहे आपन माग बारे घरी घरी ध्यानाकार्षण सहित माग पत्र बुझाइल बटैलै । शिक्षालयमे आभिनसम आधारभूत प्रयोगशाला, विषयगत प्रशिक्षक, खानेपानी, शौचालय, क्यान्टीन समेत नैरहल विद्यार्थीहुक्रे गुनासो करले बाटै ।

गैल सावन २४ गते शिक्षालयमे करल तालाबन्दी नगरप्रमुख तथा शिक्षालयके अध्यक्ष गोपाल हमाल विद्यार्थीनसे राखल माग पुरा कैना कहलपाछे ताला खोलगैल रहे । मने नगरप्रमुख हमाल अध्यक्षके पदभार ग्रहण करल दिन बाहेक कौनो दिन फेन शिक्षालयमे पुगल नैहुइट ।

उपमहानगरपालिकासे सस्तामे प्राविधिक शिक्षा पह्रैना कहलपाछे अपनेहुक्रे शिक्षालयमे भर्ना हुइल विद्यार्थीहुक्रे बटैले बाटै । अपनेहुक्रे विद्यार्थीनके समस्याके विषयमे प्राविधिक शिक्षा तथा व्यावसायिक तालिम परिषद् सुदूरपश्चिम प्रदेश कार्यालय धनगढीहे समेत जानकारी करासेकल विद्यार्थी कृष्ण ताडी बटैलै ।

‘हम्रे शिक्षालयमे रहरसे ताला नैलगैले हुइटी,’ ताडी कहलै–‘स्थानीय सरकार नै विद्यार्थीके भविष्यउपर खेलबाड करे लागलपाछे आन्दोलित हुइल हुइटी ।’

धनगढी बहुप्राविधिक शिक्षालयके कार्यक्रम संयोजक रामबहादुर विक विद्यार्थीनसे राखल माग पुरा नैकरलपाछे शिक्षालयमे तालाबन्दी करल बटैलै । उहाँ कहलै–‘विद्यार्थीनसे राखल माग जायज हो, इ विषयमे छलफल कैके समस्या समाधान ओर लागब ।’

शिक्षालयमे होटेल अटोमोवाईल इन्जिनियरिङ्ग ओ होटेल म्यानेजमेन्ट डिप्लोमे ओ प्री डिप्लोमा लगायतके २ सयके हाराहारीमे विद्यार्थी अध्ययनरत रहल बाटै ।