यातायात व्यवसायीनसे आरक्षण छुट नैडेना

पहुरा समाचारदाता
धनगढी, २१ अगहन । कैलालीके धनगढीसे सञ्चालित यातायात व्यवसायी सार्वजनिक बस तथा मिनिबसमे अपांगता रहल व्यक्तिहे आरक्षण ओ छुट नैडेना बटैले बाटै ।

जिल्ला प्रशासन कैलालीके नेतृत्वमे राष्ट्रिय अपांग महासंघ सुदूरपश्चिम प्रदेश समितिसे आयोजना करल सरोकारवालाके बैठकमे यातायात व्यवसायी ओइसीन बटाइल हुइट ।

उहाँहुक्रे सार्वजनिक बस तथा मिनिबसमे विद्यार्थी, ज्येष्ठ नागरिक, अपांगता रहल व्यक्तिहे सीट आरक्षण ओ छुट डेहे नैसेक्ना बटैले बटै । कोरोनाके समय बस सहित सवारी साधन ठप्प होके घाटा हुइल ओ आब फेन आरक्षण सिटमे यात्रु बोकेबर आपन व्यवसाय डुब्ना व्यावसायीनके कहाइ रहल बा । बैंक ब्याजमे राहत नैडेहल ओरसे बसमे फेन सुविधा डेहे नैसेकजैना उहाँहुक्रनके तर्क रहल बा ।

अपांगता लगायत बिद्यार्थी तथा ज्येष्ठ नागरिक किहुहे फेन छुट डेहे नैसेक्ना उहाँहुक्रनके कहाइ रहल बा । खप्तड यातायातके अध्यक्ष अनन्तराज जोशी यातयात व्यवसाय घाटामे रहल ओरसे छुट तथा सिट आरक्षण डेहे नैसेक्ना बटैलै । सरकारसे सहुलियत डेलेसे किल छुट डेहे सेकजैना ओहकान कहाइ रहल बा ।

व्यवसाय घाटा डेखाके सरकारके नीति नियम नैमानब कना ठीक नैरहल सरोकारवाला संस्था तथा अधिकारकर्मीके सुझाव रहल बा । अपांगता अधिकार ऐन २०७४ दफा ३७ के उपदफा २ ओ यातायात व्यवस्थापन ऐन २०४९ के दफा १०७ को उपदफा १ मे रहल व्यवस्थाके पालना हुइ पर्ना उहाँहुक्रनके माग रहल बा ।

उ व्यवस्था अनुसार अपांगता रहल व्यक्तिनहे भाडा दरमे ५० प्रतिशत छुट ओ सिट आरक्षणके कानूनी रुपमे व्यवस्था रहल बा । यातायात व्यवसायी व्यवस्थाके अवज्ञा कैलेसे फेन स्थानीय प्रशासन मौन बैठ्ना उचित नैरहल राष्ट्रिय अपांग महासंघ सुदूरपश्चिमके अध्यक्ष मानवहादुर साउँद बटैलै ।

बैठकमा प्रमुख जिल्ला अधिकारी किरण थापा, कैलाली प्रहरी प्रमुख बेदप्रकाश जोशी, यातायात व्यवस्था कार्यालय धनगढीके अधिकृत श्यामप्रसाद जोशी, अधिकारकर्मी ओ यातायात व्यवसायीहुक्रनके सहभागीता रहल रहे ।