कैलारी ६ बनकट्टामे फुटवल प्रतियोगिता हुइटी
पहुरा समाारदाता
हसुलिया, २५ अगहन । कैलालीके कैलारी गाउँपालिका वडा नम्बर ६ मे फुटबल प्रतियोगिता हुइना बा ।
इलाइट युथ क्लाव कैलालीके आयोजनामे फुटवल प्रतियोगिता हुई लागल हो । अइना पुस २५ गतेसे ३० गतेसम कैलारी गाउँपालिका वडा नम्बर ६ बनकट्टा खेलमैदानमे फुटवल प्रतियोगिता आयोजना हुइना आयोजक इलाइट युथ क्लवके अध्यक्ष देवेन्द्र हमाल बटैलै । बिषेश करके कैलारी गाउँपालिका ओ धनगढी उप महानगरपालिकाके खेलाडीहुकनहे समेटके खुल्ला फुटवल प्रतियोगिता आयोजना करे लागल अध्यक्ष हमाल बटैलै । फुटवल प्रतियोगितामे १६ टिम सहभागी हुई पैना हुइल बटै ।
अध्यक्ष हमालके अनुसार शनिच्चरसे टिम इन्ट्री खुला करल बा । प्रतियोगिताके बिजेता रु ५० हजार नगद सहित ट्रफी मेडल प्राप्त कैही कलेसे उप बिजेता २५ हजार नगद सहित ट्रफी मेडल प्राप्त अध्यक्ष हमाल बटैलै । टिम इन्ट्री शुल्क रु ३००० धारल बा ।
थारु कलाकारहुकाके सहितके उपस्थितीमे साँस्कृतीक कार्यक्रम सहित भब्य कार्यक्रमके बिच प्रतियोगिताके उद्घाटन कैना आयोजक बटैले बा । आयोजक क्लव इलाइट युथ क्लवके सह सचिव राम बहादूर बिक कैलारी गाउँपालिका ६ के सक्कु युवाहुकनहे समेटके क्लव गठन करल ओ अब खेलकुदसंगे शिक्षा, स्वास्थ्य, सरसफाई लगायतके क्षेत्रमेफे क्लव काम कैना बटैलै ।
बिषेश करके यी खेलकुद प्रतियोगितासे यहाँके खेलाडी उत्पादन कैना उद्देश्य रहल उहाँ बछैलै । फुटवल संघसे समेत अनुमती लेके करे लागल प्रतियोगितासे पक्के कुछ नयाँपन डेना उहाँक कहाई बा ।
क्लवके सचिव बिजय चौधरी यी प्रतियोगितासे जिल्ला, प्रदेश तथा राष्ट्रियस्तरके प्रतियोगितामे समेत यहाँके खेलाडीके सहभागिता बह्रना अपेक्षा लेहल बटैलै । साथे उत्कृष्ट खेलाडीहे ५ हजार, उत्कृष्ट किपर, स्कोररहे नगद २ हजार पुरस्कार रहल उहाँ बटैलै ।
