४ करोड ४१ लाख ८२ हजार निक्षेप संकलन
पहुरा समाचारदाता
धनगढी, २५ अगहन । धनगढी उपमहानगरपालिका–७, देवहरियामे रहल दाइजो कृषि सहकारी संस्था लिमिटेडके ११ औं वार्षिक साधारणसझा कार्यक्रम ओराइल बा ।
संस्थाके अध्यक्ष मानबहादुर रानाके अध्यक्षतामे हुइल कार्यत्रमके वडका पहुना धनगढी उपमहानगरपालिकाके उपप्रमुख कन्दकला राना रहिट । कार्यक्रममे बोल्टी उहाँ कृषिके प्याकेज वास्तविक किसान नइपाइल ओ टाठाबाठाहुक्रे लैजाके यकर प्रयोग करल बटैली ।
नगरपालिकासे एक वडा एक उत्पादनके अवधारणा लेके कृषि क्षेत्रमे महत्व डेले बा, उहाँ कहली, ॅजौन वडामे आलु उत्पादन हुइट उ ठाउँमे आलुके विउ विजन डेठी । जहाँ धान उत्पादन हुइठ उहाँ धान, जहाँ गोहु उत्पादन हुइठ उहाँ गोहुँके विया डेठी । अब्बे सुरुवाटी चरणमे बाटी ।’
धनगढी उपहानगरपालिकासे कृषि क्षेत्रहे प्रवर्द्धन करटी उपलब्धीमुलक बनाइक लाग लागल उप प्रमुख राना बटैली ।
उहाँ कहली, ॅधनगढी उपमहानगरपालिकासे प्लाष्टिकमुक्त क्षेत्र घोषणा करेक लाग प्लाष्टिक जन्यवस्तु शुन्य करटी यिहीहे नष्ट कैना अवधारणा लेके आघे बह्रल बटी । प्लाष्टिकके कारण सबसे ढेर कृषि क्षेत्रमे असर करठ, यकर संगे हमार स्वास्थ्यमेफे प्रतिकुल असर करठ ।’
प्लाष्टिक जन्य बस्तुके प्रयोग न्यून करलेसे परम्परागतसे चल्टी आइल डोनिया, टेपारीके महत्व पाई,’ उहाँ कहली, ॅयी थारु समुदायके परम्परागत सीप हो । डोनिया टेपारीके प्रयोग करलेसे उद्यमीहुक्रे फाइदाफे लेहे सेक्ना अवस्था रही ।’
डोनिया टेपारीके बजारीकरणहे भारतसे अइना प्लाष्टिक जन्य बस्तुसे घटैले बा, प्लाष्टिक जन्य बस्तु पूर्णरुपसे हटाइक लाग नगरपालिकाके १९ वडामे महिला डिडी बहिनीयाहुकन उद्यमी बनाइक लाग उद्यमशिलता तालिम संचालन करले बा । प्रत्येक वडामे वडा अध्यक्ष मार्फत ८ दिनके ४५ जाने समुह बनाके महिला डिडीबाबुनह् ेसहभागि कराके उद्यमविकास तालिम संचालन करल उपप्रमुख राना बटैली ।
दाइजो कृषि सहकारी शुन्यसे सुरुवाट करके अब्बे ४ करोडसे ढेर बचत कैना सफल हुइल उहाँ बटैली । महिला डिडीबाबुनसे संचालन करल सहकारी आघेफे उहाँ बटैली ।
कृषि, शिक्षा, स्वास्थ्य, व्यवसायके लाग पहिले लोन निकर्ना महिनौ असरा लागे पर्ना अवस्था रहे, मने अब्बे सहकारी स्थापनासे पहिलेक जटिलता दुर हुइल उहाँ बटैली ।
कार्यक्रममे विशिष्ट पहुना वडा नम्बर ७ के वडा अध्यक्ष मोती राना दाइजो कृषि सहकारी रानाथारुनके पहिचानके रुपमे आघे बह्रटी रहल बटैलै । यी सहकारीसे किसानहुकनहे आवश्यक मलखादके व्यवस्था करल बटैलै ।
जिल्ला सहकारी संघके अध्यक्ष फणिराज सापकोटा सहकारी संस्थाहे व्यावसायिकता ओर बह्रना सुझाव डेलै । सहकारीसे रोजगारी सृजना करलफे उहाँ बटैलै ।
कार्यक्रममे शिक्षा समिति संयोजक मनराज यादव, देवहरिया सामुदायिक वन उपभोक्ता समुहके अध्यक्ष शारदा फ्रसाद रानालगायत मन्तव्य व्यक्त करले रहिट ।
कार्यत्रममे संस्थाके अध्यक्ष मानबहादुर राना बार्षिक प्रतिवेदन, लेखा समिति संयोजक नन्दगोपाल राना वार्षिक आर्थिक प्रतिवेदन, ओ व्यवस्थापक बासुदेव राना आर्थिक बर्ष २०७९/ ०८० के अनुमानित आय व्यय विवरण पेश करले रहिट ।
यी बर्षके आय व्यय विवरण ५ करोड ३१ लाख ७१ हजार ७२३ रुप्या ५९ पैसा रहल ओ अइना बरषके अनुमानित आयव्यय विवरण ६ करोड २७ लाख ८४ हजार २१५ रुप्या रहे सेक्ना उहाँ जनैलै ।
गैल बरससम ५०४ जाने शेयर सदस्य रहल ओ अब्बे ५६३ जाने शेयर सदस्य पुगल बटै । संस्थाके शेयर पुँजी ५१ लाख ६६ हजार, ऋण लगानी ३ करोड २६ लाख २९ हजार ५९६ रुप्या ओ बचत ४ करोड ४१ लाख ८२ हजार ३४८ रुप्या रहल संस्था जनैले ।
उहे विच संस्थासे बार्षिक साधारणसभाके अवसरमे कर्मचारी कविता राना, उत्कृष्ट बचतकर्ता इश्वरी कुमारी चौधरी राना, उत्कृष्ट विउ उत्पादक शिवराज राना ओ असल ऋणी अनिता चौधरीहे सम्मान करले बा ।
कार्यक्रमके संचालन सस्थाके सचिव दिपकराज जोशी ओ स्वागत मन्तव्य सल्लाहकार समितिके संयोजक चन्द्रकिरण राना करल रहिट ।
