‘सवारी एस–५’ नन्लै सोहन
पहुरा समाचारदाता
धनगढी, २६ अगहन । देशभरके इन्जिनियर्सहुकनके संस्था हो, ‘इन्जिनियर्स इनु’ । यिहे संस्थासे हरेकवर्ष काठमाडौंमे अर्बिट इन्जिनियर एक्स्पो कार्यक्रम आयोजना कैना करठ । उ कार्यक्रममे देशभरसे इन्जिनियरिङके क्षेत्रमे रहल, करल प्रयास प्रदर्शनी कैना करठ ।
यी बार यिहे डिसेम्बर ९ से १० सम काठमाडौंमे हुइल एक्स्पोमे प्रोजेक्ट प्रदर्शनी, रोबो सकर, रोबो वार ओ पेपर ब्रिज कम्पिटिसन कराइल रहे । जेम्ने धनगढीके सुदूरपश्चिमाञ्चल एकेडेमी(एसपीए)के विद्यार्थी सोहन कैनी प्रोजेक्ट प्रदर्शनीमे सहभागिता जनैले रहिट ।
देशभरसे आइल ओ काठमाडौं उपत्यकाके हजारौं इन्जिनियरिङ विद्यार्थीमाझ सोहन अपनही बनाइल इलोक्ट्रिक बाइक विथ फिंगरपिन्ट प्रदर्शनीमे धरले रहिट ।
सोहनसे बाइकके नाम धरले बटै, ‘सवारी एस ५’, जिहीहे प्रदर्शनीमे नेपाल विद्युत प्राधिकरणके प्रमुख कार्यकारी कुलमान घिसिङसे इन्जिनियर सागर ढकाललगायतसे अवलोकन करले बटै ।
कक्षा ११ ममे एसपीएमे अध्ययनरत् सोहनहे उ बाइक प्रोजेक्ट निर्माणके लाग सक्कु सहयोग कलेजसे करल हो । हजारौं विद्यार्थीमाझ अपने बनाइल प्रोजेक्टसहित उपस्थित हुई पाके गर्विलो महसुस हुइल सोहन बटैलै ।
‘देशभरसे इन्जिनियरिङ क्षेत्रमे रुचि रहल विद्यार्थीहुकनबीच उपस्थित हुई पैना मोर लाग भारी बाट रहे । ओम्ने मै अपने बनाइल बाइक प्रदर्शन करे पैनु,’ सोहन कहलै, ‘यहाँसम पुगैना महीहे कलेजसे सक्कु सहयोग करल हो । कलेज परिवारप्रति आभार व्यक्त करटु ।’
सोहनके सवारी एस ५ एक चो चार्ज करलेसे ५० से ६० किलोमिटर डौरे सेकठ । ब्याट्रीके पावर बढाके बाइक अभिन ढेर डोरे सेक्ना उहाँ बटैठै । उ बाहेक इलोक्ट्रिक बाइक रहल ओरसे यी वातावरणमैत्रीफे बा । औलाके सेन्सरसे सहजुले अन करे सेक्जाइठ ।
‘मै सक्कु फेरसे प्रयोग हुइना सामाग्रीके प्रयोग करके यी बाइक बनाइल हुँ । माइलेजकेफे समस्या नइहो । ब्याट्रीके पावर बढाई चाहलेसे अभिन ढेर डौरी,’ सोहन कहलै ।
पूर्ण रुपमे बाइक तयार हुके व्यवसायिक रुपमे एक लाखसममे बिक्री करे सेक्ना उहाँक विश्वास बा । व्यवसायिक रुपमे आघे बह्रना अभिन बाइकमे अपने काम करटी रहल उहाँ बटैलै ।
एसपीएके क्याम्पस प्रमुख योगराज उपाध्याय कलेजसे पढाईके अलावा विद्यार्थीहुकनके रुचि अनुसार लगानीफे कैना करल ओ उ प्रतिफल डेखैटी गैल बटैलै । ‘अब किताबी रटानसे केल विद्यार्थीहे नइपुगी । शैक्षिक संस्थासे ओइनके रुचिअनुसारके क्षेत्रमे लग्ना ओ ओम्ने अब्बल हुइना प्रेरित करे परठ,’ उपाध्याय कहलै, ‘हम्रे विद्यार्थीहे संस्कार ओ अनुशासनयुक्त अध्ययनसंग संगे पसिना ओ कर्ममे विश्वास कैना बनैठी । ओम्ने लगानीफे करले बटी । जेम्नेमे देशभरसे अब्बल हुइटी हमार विद्यार्थी प्रतिफलफे डेखैटी रहल बा ।’
झण्डे ३५ सय विद्यार्थी अध्ययनरत् एसपीए सुदूरपश्चिमके अग्रिणी शैक्षिक संस्था हो । एसपीएमे स्नातकोत्तर तहमे एमएड, एमबीएस, स्नातक तहमे बीए, बीबीएस, बीएड, बीएचएम, बीआईएम, एकवर्षे बीएड तथा प्लस टूमे विज्ञान, व्यवस्थापन, शिक्षा, मानविकी, कानुन, होटल म्यानेजमेन्ट, आमसञ्चार ओ पत्रकारिता विषयमे अध्ययन अध्यापन हुइटी आइल बा ।
कलेजमे पूर्ण रुपमे मल्टिमिडियायुक्त कक्षाकोठा बटै । सक्कु कोठामे सिसी टिभी क्यामेरा जडान करल बा । आधुनिक कम्प्युटर तथा विज्ञान प्रयोगशालामे विद्यार्थीहुकनहे प्रशिक्षित कराजाइठ । दुरसे अइना विद्यार्थीके लाग कलेजसे बसके व्यवस्था कैनाके साथे होस्टेलके समेत व्यवस्था करले बा ।
