स्वास्थ्यमे ढेर बजेट विनियोजन कैना आवश्यक
पहुरा समाचारदाता
धनगढी, २६ अगहन । स्वास्थ्य क्षेत्र ओर ढेर बजेट विनियोजन कैना आवश्यक रहल सुदूरपश्चिम प्रदेशके सामाजिक विकास राज्यमन्त्री टेकबहादुर रैका बटैले बटैं ।
परिवार नियोजन संघके आयोजनामे सोम्मारके रोज धनगढीमे परिवार नियोजन ओ प्रजनन स्वास्थ्य ओ अधिकार बारे प्रादेशिक बैठकमे उहाँ ओइसीन बटाइल हुइट । राज्यमन्त्री रैका शिक्षा तथा स्वास्थ्यके लाग संघीय सरकार, प्रदेश तथा स्थानीय तहसे आवश्यक बजेट विनियोजन करे पर्ना बटाइल रहिट ।
गाउँघर तथा दुरदराजके व्यक्तिहुक्रनमे आभिनसम प्रजनन स्वास्थ्य सम्बन्धी ज्ञान नैरहल ओरसे उहाँ जनचेतना लगायत टमान कार्यक्रमके लाग आवश्यक बजेट विनियोजन करे पर्ना जोड डेहल रहिट ।
‘गाउँघर तथा पहाडी क्षेत्र दुरदराजके व्यक्तिहुक्रे आभिन फेन यौन तथा प्रजनन स्वास्थ्य अनभिज्ञ रहल बाटै,’ उहाँ कहलै– ‘परिवार नियोजन तथा प्रजनन स्वास्थ्य शिक्षा सम्बन्धी उहाँहुक्रनहे जागरुक बनाइक लाग संघीय सरकार, प्रदेश तथा स्थानीय तहसे बजेट विनियोजन कैना आवश्यक रहल बा ।’
राज्यमन्त्री रैका यौन तथा प्रजनन् स्वास्थ्य कार्यक्रम तीनु सरकारसे आपन नीति तथा कार्यक्रममे फेन समावेश कैना औंल्याइल रहिट । उहाँ नीति तथा कार्यक्रम बनाइल अवस्थामे आवश्यक बजेट विनियोजन कैके उ नीति तथा कार्यक्रमहे कार्यान्वय कैना फेन जोड डेहल रहिट ।
कार्यक्रममे कैलाली जिल्ला समन्वय समितिके उपप्रमुख खगराज भूसाल ओ धनगढी उपमहानगरपालिकाके नगर उपप्रमुख कन्दकला राना यौन तथा प्रजनन स्वास्थ्य क्षेत्र ओर आपन ओरसे सेक्ना सहयोग कैना बटाइल रहिट ।
उहे बिच राज्यमन्त्री रैका, कैलाली जिल्ला समन्वय समितिके उपप्रमुख खगराज भूसाल ओ धनगढी उपमहानगरपालिकाके नगर उपप्रमुख कन्दकला राना परिवार नियोजन तथा प्रजनन स्वास्थ्य क्षेत्रओर आवश्यक बजेट विनियोजन तथा सहयोग सहितके प्रतिवद्धता जनाइल रहिट ।
कार्यक्रममे परिवार नियोजन संघके केन्द्रिय सदस्य कृष्ण प्रसाद पाठक सुदूरपश्चिम प्रदेशमे आभिनसम २२ प्रतिशत जनता परिवार नियोजन तथा प्रजनन स्वास्थ्य सेवाके पहुँचसे दुर रहल बटाइल रहिट । उहाँ आर्थिक, सामाजिक तथा भौगोलिक कारणसे उ सेवा पहुँचसे दुर रहल बटाइल रहिट ।
कार्यक्रममे परिवार नियोजन संघके कार्यक्रम निर्देशक डा. विणा श्रेष्ठ परिवार नियोजन संघसे डेना सेवा सुविधा, नीति तथा कार्यक्रमबारे जानकारी कराइल रहिट । ओस्टके सुदूर पश्चिम प्रदेश स्वास्थ्य निर्देशनालयके निर्देशक डा. जगदीश जोशी प्रदेशके यौन तथा प्रजनन स्वास्थ्यबारे जानकारी कराइल रहिट ।
कार्यक्रम परिवार नियोजन संघ कैलाली शाखाके अध्यक्ष सुरेन्द्र बमके अध्यक्षतामे हुइल रहे । कार्यक्रममे टमान संघसंस्थाके प्रमुख तथा पदाधिकारीहुक्रनके सहभागिता रहल रहे ।
