असार मसान्तसम २० करोड ५ लाखसे ढेर निक्षेप बचत

पहुरा समाचारदाता
धनगढी, २७ अगहन । धनगढी उपममहानगरपालिका–८ मे रहल नमस्ते बचत तथा ऋण सहकारी संस्था लिमिटेड १४औं वार्षिकोत्सव कार्यक्रम मनैले बा ।

सस्थासे मंगरके रोज धनगढीस्थित अपने कार्यालय भवनमे एक कार्यक्रमके विच झव्यताके साथ वार्षिकोत्सव कार्यक्रम मनाइल हो । कार्यत्रममे संस्थाके प्रबन्धक विजय चौधरी २०७९ असार मसान्तसम २० करोड ५ लाख २० हजार २१९ रुप्या ९५ पैसा निक्षेप बचत करल बटैलै । लघुवित्त ओर ३ करोड ३० लाख ९३ हजार १०५ रुप्या ओ सहकारीओर १६ करोड ७४ लाख २७ हजार ११४ रुप्या ९५ पैसा करके जम्मा २० करोड ५ लाख २० हजार २१९ रुप्या ९५ पैसा निक्षेप बचत हुइल उहाँ बटैलै ।

असार मसान्तसम संस्थाके ऋणी लगानीमे रहल रकम ३५ करोड ५५ लाख २ हजार ३०१ रुप्या ६८ पैसा बा । यी संस्थाके असार मसान्तसम ६ हजार ८४ जाने शेयर सदस्य रहिट कलेसे अगहन २५ गतेसम ६ हजार १६१ जाने पुगल संस्थाके प्रवन्धक विजय चौधरी बटैलै ।

संस्थाके अध्यक्ष जगतराम चौधरीके अध्यक्षतामे हुइल कार्यक्रममे उहाँ संस्थाके आगामी रणनीति अनुसार शाखा विस्तारसंगे फोन–पे लाग क्यू वितरण सेवा सुरु करल बटैलै । संस्थाहे आघे बह्राइक संस्थापक, शेयर सदस्यहुकनके सल्लाह, सुझाव सहयोग अनिवार्य रहल उहाँ बटैलै । उहाँ कहलै, ॅकोरोनाके कारण दुई बरषसम रणनीति अनुसार काम करे नइसेक्गिल । अब्बे शाखा विस्तारके लाग संस्था आघे बह्रल बा । दुई ठाउँमे शाखा विस्तारके प्रक्रिया पुरा हुइल बा । और ठाउँमे फ्रक्रियामे बा ।’

कार्यत्रममे संस्थाके पूर्व महाप्रबन्धक कुन्नुनारायण चौधरी सहकारीके १४औं वार्षिकोत्सवके शुभकामना डेटी विजनेस प्लान अनुसार आघे बह्रे पर्ना सुझाव डेलै । पहिले भाडासे बैठके संस्था चलाइल मने अब्बे प्रगती हुइटी अपने भवन बनैना सफल हुइल ओरसे करिब ५० करोडसमके करोवार कैना लक्ष्य लेके आघे बह्रनाफे उहाँ सुझाव डेलै ।

संस्थाके संस्थापक पूर्व प्रथम अध्यक्ष प्रभातकुमार चौधरी थारु समुदायके पहिचानके रुपमे रहल नमस्ते बचत तथा ऋण सहकारीहे दिगो बनैना आवश्यक रहल बटैलै । उहाँ कहलै, यी सहकारीमे सक्कु संस्थापक थारु समुदायसे बटी । आर्थिक क्रान्ति नन्ना उद्देश्यसे यी सहकारीके स्थापना कैगिल हो । यिहीसे आघे बह्राइल सक्कु क्षेत्रसे सहयोग कैना जरुरी बा ।’

संस्थाके पूर्व कार्यवाहक अध्यक्ष दिलबहादुर चौधरी संस्थाके शाखा विस्तारके लाग गहन छलफल करके आघे बह्रना बटैलै । उहाँ कहलै, ॅकोरोनाके कारण दुई बरससम सहकारीहे आर्थिक मन्डीके समस्या झेले परल, अब्बे आघे बह्रना उपयूक्त समय बा आब नयाँ नीति लेके आघे बह्रे परल ।’ नमस्ते सहकारी थारु समुदायके इतिहाससे जोरल कारण यिहीहे टिकैटी जरुरी रहनाफे उहाँ बटैलै ।

कार्यक्रमके संचालन संस्थाके सचिव खडकबहादुर चौधरी ओ स्वागत मन्तव्य उफाध्यक्ष रोहितकुमार चौधरी व्यक्त करल रहिट । बार्षिकोत्सवके अवसरमे संस्थाके बजेट, नीति नियम ओ आगमी कार्यत्रमबारे छलफल हुइल रहे । कार्यक्रममे संचालक समितिके पदाधिकारी, सदस्य, लेखा सुपरीवक्षेण समिति, उपसमिति, संस्थापक ओ कर्मचारीहुकनके सहभागिता रहे ।

संस्थासे शाखा विस्तारके तयारीमे

नमस्ते बचत तथा ऋण सहकारी संस्था लिमिटेडसे शाखाके विस्तारके तयारीमे जुटल बा । शाखा विस्तारके लाग अब्बे फुलवारी ओ राजपुरमे प्रक्रिया पुरा हुइल संस्थाके प्रबन्धक विजय चौधरी जानकारी डेलै । आगामी दिनमे सुदूरपश्चिम प्रदेशके तराई जिल्लामे शाखा विस्तारके लक्ष्य लेहल मने अब्बे भर कैलारी गाउँपालिका, गोदावरी नगरपालिका, गौरीगंगा नगरपालिका, लालझाडी गाउँपालिका, पुनर्वास नगरपालिकामे प्रक्रिया आघे बह्रल उहाँ बटैलै ।