पुस ५ गतेसम महोत्सव सञ्चालन हुइना
पहुरा समाचारदाता
धनगढी, १ पुस । सुदूरपश्चिम महोत्सवके अवधि तीन दिन थपल बा । अगहन २२ गतेसे पुस २ गतेसम सञ्चालन हुइना महोत्सवके अवधि ३ दिन थपल हो ।
महोत्सवमे दर्शकहुक्रनके सहभागिता बह्रल ओ माग अनुसार महोत्सवके अवधि पुस ५ गतेसम थप करल आयोजक जनैले बा । शुक्रबार पत्रकार सम्मेलन मार्फत कैलाली उद्योग वाणिज्य संघके अध्यक्ष पुष्प कुँवर महोत्सवके अवधि पुस ५ गतेसम थपल जानकारी डेलै । अब्बेसम करिब पाँच करोडके कारोबार होसेकल ओ २ लाख ढेर दर्शक महोत्सव अवलोकन कैसेकल आयोजक जनैले बा ।
अगहन २२ गते प्रधानमन्त्री शेरबहादुर देउवा महोत्सवके उद्घाटन करल रहिट । उहे अवसरमे प्रधानमन्त्री देउवाहे कैलाली उद्योग बाणिज्य संघके अध्यक्ष कुवँर १५ बुँदे माग सहित १५ किलोके माला लगाइल रहिट । २१ बुँदा सहितके माग रख्टी सुरु हुइल महोत्सव कुछ माग पुरा होसेकल ओरसे मालाके तौल फेन घटाइल जनाइल बा ।
महोत्सव सुरुवातसे नै संघसे धनगढी अन्तर्राष्ट्रिय स्तरके क्षेत्रीय विमानस्थल, गेटा मेडिकल कलेज, पश्चिम सेती जलविद्युत आयोजना, औद्योगिक करिडोर, विशेष आर्थिक क्षेत्र, गौरिफन्टा सीमानाके स्तरोन्नती, धनगढी–दीपायल–बझाङ द्रुतमार्ग, सुख्खा बन्दरगाह, प्राविधिक कलेज, प्रदर्शनीस्थल, सितगृह, लगायतके प्रमुख माग रख्टी आइल बा ।
२०६३ सालसे महोत्सव सञ्चालन हुइटी आइलमे संघसे आघेक दुई बरस कोरोना महामारीके कारण महोत्सव आयोजना हुइ नैसेकल रहे । महोत्सवके इ १६ औं संस्करण हो ।
सुदूरपश्चिम प्रदेशके कृषि, उद्योग, पर्यटन, कला संस्कृति ओ व्यापार व्यवसायके प्रवर्द्धन कैना उद्देश्यसे महोत्सव आयोजना कैटी आइल बा । महोत्सवमे कृषि उपजके ११, होटलके २६, अटोमोवाइलके ११ तथा बैंक ओ वित्तीय संस्था, घरेलु उद्यम एवं व्यापारिक सहित चार सय ढेर स्टल रहल बावै ।
