लैङ्गिक संवेदनशिल रिर्पोटिङ्ग सम्बन्धी अभिमुखीकरण
पहुरा समाचारदाता
धनगढी, १ पुस । लैङ्गिक संवेदनशिल रिर्पोटिङ्ग तथा लैङ्गिक उत्तरदायी न्याय सम्बन्धी अभिमुखीकरण हुइल बा ।
कानूनी सहयोग तथा परामर्श केन्द्र(ल्याक) तथा दलित महिला अधिकार मञ्चके संयुक्त आयोजनामे कैलाली जिल्लाके सञ्चारकर्मीहुक्रनहे लैङ्गिक संवेदनशिल रिर्पोटिङ्ग तथा लैङ्गिक उत्तरदायी न्याय सम्बन्धी अभिमुखीकरण करगिल हो ।
कानूनी सहयोग तथा परामर्श केन्द्र(ल्याक)के अध्यक्ष अनिता न्यौपाने थपलिया सञ्चारकर्मीहुक्रे रिर्पोटिङ्ग करेबर लैङ्गिक संवेदनशिता ओ लैङ्गिक उत्तरदायी न्यायमे विशेष ध्यान डेहे पर्ना बटैली ।
अध्यक्ष थपलिया सञ्चारकर्मीहुक्रनहे भाषागत संवेदनशीलता अपनैना फेन जोड डेहल रही । भाषागत त्रुटीसे फेन ढेर महिलाहे न्यायके सट्टा अन्याय हुइना उहाँ बटैली ।
अभिमुखीकरण कार्यक्रममे अध्यक्ष थपलिया लैङ्गिक उत्तरदायी न्यायमे मिडियाके भूमिका बारे सहजीकरण करल रही ।
ओस्टके कानूनी सहयोग तथा परामर्श केन्द्र(ल्याक)के राष्ट्रिय परियोजना संयोजक सरस्वती योञ्जन लैङ्गिक संवेदनशिल रिर्पोटिङ्ग तथा लैङ्गिक उत्तरदायी न्याय सम्बन्धी रिर्पोटिङ्ग करेबर अइना चुनौटी, समस्या बारे सञ्चारकर्मीनसे जानकारी लेहल रही ।
अभिमुखीकरण कार्यक्रममे टमान मिडियाके सञ्चारकर्मीहुक्रनके सहभागिता रहल रहे ।
