प्रदेश प्रमुख समक्ष निर्वाचन परिणाम प्रतिवेदन पेश

पहुरा समाचारदाता
धनगढी, २ पुस । सुदूरपश्चिम प्रदेशके प्रदेश प्रमुख देवराज जोशी समक्ष निर्वाचन आयोगसे प्रदेश सभा सदस्य निर्वाचन परिणाम प्रतिवेदन पेश करले बा ।

धनगढी स्थित प्रदेश प्रमुखके कार्यालयमे शनिच्चरके रोज एक कार्यक्रमके विच प्रदेश प्रमुख जोशी समक्ष निर्वाचन आयुक्त डा जानकीकुमारी तुलाधरसे प्रदेश सभा सदस्य निर्वाचन २०७९ के अन्तिम परिणाम सहितके प्रतिवेदन पेश करलै । उ क्रममे निर्वाचन आयुक्त तुलाधरसे सुदूरपश्चिम प्रदेश सभाओर ५३ जाने निर्वाचित हुइल जानकारी डेलै । जेम्ने पुरुष ३५ जाने ६६ दशमलव ०३ प्रतिशत ओ महिला १८ जाने ३३ दशमलव ९७ प्रतिशत निर्वाचित हुइलमे उहाँ बटैलै ।

प्रदेश सभा सदस्य निर्वाचनमे प्रत्यक्षओर ३२ जाने ओ समानुपातिकओर २१ जाने निर्वाचित हुइल यी प्रदेश सभामे ६ राजनैतिक दलके प्रतिनिधित्व हुइल बा ।

आयोगके अनुसार सुदूरपश्चिम प्रदेश सभामे काँग्रेसके १९ जाने, एमाले १० जाने, माओवादी केन्द्र ११ जाने, नागरिक उन्मुक्ति ७ जाने, नेकपा एस ४ जाने, राप्रपा १ जाने ओ स्वतन्त्र १ जाने सदस्य निर्वाचित हुइल बटै । प्रदेश सभा निर्वाचनमे भाग लेहल दलमन्से यी प्रदेशमे २८ राजनैतिक दलके १ सय ९ जाने उम्मेदवारके धरौटी जफत हुइल बटाइल बा ।

उ अवसरमे सुदूरपश्चिम प्रदेशके मुख्यमन्त्री त्रिलोचन भट्ट, मन्त्रीगण, उच्च पदस्थ सरकारी अधिकारी लगायतके सहभागिता रहल रहे ।

ओस्टेक करके शनिच्चरके रोज सातु प्रदेश प्रमुखसमक्ष निर्वाचन परिणमसहितके प्रतिवेदन प्रस्तुत करल बा । निर्वाचन आयोगसे यिहे अगहन ४ गते सम्पन्न प्रदेश सभा सदस्य निर्वाचनके परिणामसहितके प्रतिवेदन प्रदेश सभा सदस्य निर्वाचन ऐन, २०७४ के दफा ६२ बमोजिम शनिच्चर दुपहर एक्के साथ सातु प्रदेशके माननीय प्रदेश प्रमुखसमक्ष प्रस्तुत करल हुइट ।

आयोगके प्रमुख निर्वाचन आयुक्त, आयुक्तहुक्रे, सचिव ओ सहसचिवसहितके टोलीसे सक्कु प्रदेशके सदरमुकामस्थित माननीय प्रदेश प्रमुखके कार्यालयमे अलगअलग रूपमे प्रतिवेदन बुझाइल हो ।

प्रतिवेदन बुझैना प्रदेश नं. १ मे प्रमुख निर्वाचन आयुक्त दिनेश कुमार थपलिया, गण्डकी प्रदेशमे आयुक्त ईश्वरीप्रसाद पौड्याल, लुम्बिनी प्रदेशमे आयुक्त रामप्रसाद भण्डारी, मधेस प्रदेशमे आयुक्त सुगन शमशेर जबरा, बागमती प्रदेशमा सचिव गोकर्णमणि दुवाडी ओ कर्णाली प्रदेशमे सहसचिव यज्ञप्रसाद भट्टराईके नेतृत्वमे आयोगके टोली पुगल रहे । उ टोलीसे प्रदेशगत निर्वाचनके विवरण पत्रकार सम्मेलनमार्फत् सार्वजनिक करल आयोगके सहायक प्रवक्ता कमल भट्टराईसे जारी विज्ञप्तीमे जनाइल बा ।

प्रदेश सभा सदस्य निर्वाचन ऐन, २०७४ के दफा ६२ मे आयोगसे प्रदेश सभा सदस्य निर्वाचनके पहिल हुइना निर्वाचित हुइना निर्वाचन प्रणाली ओ समानुपातिक निर्वाचन प्रणालीओर निर्वाचन परिणामसहितके प्रतिवेदन निर्वाचनके नतिजा घाोषण हुुइल सात दिनभिटर प्रदेश प्रमुख समक्ष पठाई पर्ना व्यवस्था रहल बा ।