विपद् जोखिम न्यूनीकरण सम्बन्धी कार्यशाला गोष्ठी
पहुरा समाचारदाता
धनगढी, ५ पुस । यूथ इन्नोभेसन ल्याव ओ मर्सीकोर नेपालके आयोजनामे मंगरके रोज धनगढीमे सुदूरपश्चिम प्रदेशस्तरीय विपद् जोखिम न्यूनीकरणमे युवा नेतृत्व ओ विपद पोर्टल स्थानीयकरण कार्यशाला गोष्ठी हुइल बा ।
कार्यक्रममे कञ्चनपुर जिल्लाके पुनर्वास नगरपालिका, लालझाडी गाउँपालिका ओ बेलौरी नगरपालिकामे यूथ इन्नोभेसन ल्यावके प्राविधिक नेतृत्वमे मर्सीकोर नेपालके सहयोगसे सञ्चालन करल विपद् जोखिम न्यूनीकरण युवा नेतृत्व फेलोशिप कार्यक्रम–२०७९ सफल हुइल जानकारी कराइल रहे ।
यिहे वैशाखसे भदौसम उ परियोजना अन्तर्गत तीन जाने युवा मीना न्यौपाने, सुनील भट्टराई ओ संगीता दाहालमार्फत स्थानीय तहके जलवायू परिवर्तन, विपद जोखिम न्यूनीकरण तथा व्यवस्थापन सम्बन्धी तथ्यमे आधारित नीति, योजना तथा कार्यक्रम निर्माण करना क्षमता विकास करटि पालिकामे रहल प्राविधिक विशेष कैके आइटी अफफिसर ओ विपद सम्पर्क व्यक्तिहे तालिम प्रदान करल रहे । यी अवधीमे पुनर्वास नगरपालिका ओ लालझाँडी गाउँपालिकाके घरधूरी तथ्यांक संकलन समेत हुइल रहे ।
कार्यशालामे युथ इन्नोभेसन ल्याबके गणेश ढुंगाना कार्यक्रमके बारेम, मर्सीकोर नेपालके कार्यक्रम प्रवन्धक सुधा खडका सुदूरपश्चिम प्रदेशमे सञ्चालन हुइटिरहल परियोजनाके बारेमे जानकारी करैले रहि । कार्यक्रममे मर्सीकोर नेपालके कृष्ण बसौला पूर्वानुमानमे आधारित पूर्वकार्य ओ प्रभावमे आधारित पूर्वानुमानके महत्व ओ आवश्यकता, सिकाई ओ मर्सीकोर नेपाल सुदूरपश्चिम प्रदेशमे करटि रहल विपद जोखिम न्यूनीकरण, पूर्व सूचना प्रणाली, पूर्वानुमानमे आधारित पूर्वकार्य ओ उत्थानशिलता अभिवृद्धिके लाग करल पहल सम्बन्धी जानकारी करैले रहैं ।
उ अवसरमे फेलोशिप कार्यक्रमके बारेमे यूथ इनोभेसन ल्यावके अविनाश सुवेदी ओ कुमार पौडेल प्रस्तुति करले रहैं । ओहे अवसरमे फेलो ओ स्थानीयकरन करल तीनु पालिकाहे सम्मान करल बा । छलफलमे संघीय मामिला तथा सामान्य प्रशासन मन्त्रालयहे प्रतिनिधित्व करटि गोविन्द केसी मन्त्रालय ओ स्थानीय सरकारके सम्बन्ध और प्रगाढ बनाके विपद व्यवस्थापनमे दीर्घकालिन योजना निर्माण करेपरना बटैलैं ।
कार्यक्रममे आन्तरिक मामिला मन्त्रालय, सामाजिक विकास मन्त्रालय, भौतिक विकास मन्त्रालय, भूमि तथा कृषि मन्त्रालय, जिल्ला प्रशासन कार्यालय, जिल्ला प्रहरी कार्यालय, सशस्त्र प्रहरी बल, टमान संचारमाध्यम, गैरसरकारी ओ सामाजिक संस्था, अन्तर्राष्ट्रिय गैरसरकारी संस्थालगायत टमान संघसंस्थासे प्रतिनिधि सहभागी रहैं । कार्यक्रममे लालझाडी गाउँपालिकाके अध्यक्ष निर्मल राना गाउँपालिका विपद व्यवस्थापनके विषयहे उच्च महत्वके साथ हेरल यी कार्यक्रमके सिकाईहे निरन्तरता डेना बटैलैं ।
ओह कार्यक्रममे बेलौरी नगरपालिकाके प्रमुख प्रशासकीय अधिकृत नरबहादुर विश्वकर्मा जनप्रतिनिधिहुक्रे अभिन विपद्हे प्राथमिकतामे नैढरल ओरसे विपद्के लाग पर्याप्त बजेट विनियोजन करे नैसेकल बटैलैं । उहाँ अब्बेक कार्यक्रमहे फरक ढंगसे हुइलेसे फेन निरन्तरता डेहेपरना बटैलैं ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणके रिना चौधरी प्राधिकरणसे विपद पोर्टलके सुरूवाती चरणसे अभिनसम पुगटसम नेपालभर ५३ पालिकामे स्थानीयकरणके कार्य कैसेकल ओ यिहिनहे प्राथमिकतामे ढरल जानकारी करैलि ।
विपद् जोखिम न्यूनीकरण तथा व्यवस्थापन ऐन २०१७, पहिल संशोधन २०१८ दफा ११ के उपदफा १ के उपधारा क मे कहल बा, “राष्ट्रिय विपद् व्यवस्थापन सूचना प्रणालीके विकास ओ कार्यान्वयन कैके, प्राधिकरण विपद् व्यवस्थापन सम्बन्धी जानकारी ओ डाटा संकलन, भण्डारण, विश्लेषण ओ साझेदारी करठ ।
स्थानीय सरकार सञ्चालन ऐन, २०१७ मे स्थानीय सरकारके व्यवस्थापन ओ यकरसँग सम्बन्धित काम, कर्तव्य ओ शक्तिहे विपद् व्यवस्थापनके लाग व्यवस्था करल बा । ओस्टेक विपद् जोखिम न्यूनीकरणसम्बन्धी राष्ट्रिय नीति, २०१८ मे कहल बा, “रिमोट सेन्सिङ प्रणाली, भौगोलिक सूचना प्रणाली ओ खुला स्रोत प्रविधिमे आधारित विपद् सूचना व्यवस्थापन प्रणालीहे जनता ओ सरोकारवालाहुकनहे सहज रूपमे उपलब्ध कराइजाइ ।”
