भ्रष्टचार विकासके बाधकः गाउँपालिका अध्यक्ष राजसमझ

पहुरा समाचारदाता
हसुलिया, ५ पुस । कैलाली जिल्ला कैलारी गाउँपालिकाके अध्यक्ष राजसमझ चौधरी भ्रष्टाचार विकास ओ सम्बृद्धिके अवरोधक रहल बटैले बटै ।

अख्यिार दुरुपयोग अनुसन्धान आयोग कार्यालय कञ्चनपुरके आयोजनामे मंगरके रोज कैलारीके हसुलियामे हुइल ‘भ्रष्टचार नियन्त्रण तथा सुशासन प्रवद्र्धन’ सम्बन्धी कार्यक्रमके गाउँपालिका अध्यक्ष उ बटवाइल रहिट ।

कानूनबारे बहुट बाट जनप्रतिनिधि ओ कर्मचारीहुकन पत्ता नइरहे सेकठ, जनप्रतिनिधि हुके आइलपाछे, राष्ट्रसेवक कर्मचारी हुइलपाछे जनताके काम करे डेहे परठ,’ गाउँपालिका अध्यक्ष कहलै, ‘कतिपय ठाउँमे जनप्रतिनिधिहुकनहे एकदम अप्ध्यारोके विषय हो । जनप्रतिनिधि, कर्मचरी काम करेबेर कानून मिच्के गैलेसे काल्हके दिनमे सजयके भागिदार हुई परी ।’
हम्रे जानबुझके कबु गल्टी नइकैबी । कैलारी गाउँपालिकामे सुशासन, लेखा समिति बा । दुनु समिति सक्रिय हुइना जरुरी बा अध्यक्ष कहलै । कानूनसे डेहल क्षेत्रअधिकार भिटर रहिके काम कैनाफे गाउँपालिका अध्यक्ष राजसमझ चौधरी कर्मचारी, वडाध्यक्षहुकनहे निर्देश करलै । आघेक जनप्रतिधिहुकनके पालासे एक ठो केल उजुरी परल मने अपनेहुकनके कार्यकालमे अभिनसम उजुरी नइपरल कहटी सजगहुकनके जनतनके लाग कैनाफे उहाँ बटैलै ।

कैलारी गाउँपालिकाके उपाध्यक्ष भगवतीकुमारी चौधरी अख्यिार दुरुपयोग अनुसन्धान आयोग कार्यालय कञ्चनपुरसे कैगिल भ्रष्टचार नियन्त्रण तथा सुशासन प्रवद्र्धन कार्यक्रमसे जनप्रतिनिधि ओ कर्मचारीहुकन सचेत बनाइल बटैली ।
उहाँ कहली, ‘जानजानके कोई कानून मिचके जाई कलेसे उहीहे सचेत सक्कु जानेक दायित्व हो । जनप्रतिनिधि ओ कर्मचारीके जनतनहे सेवा डेना कहिके सपथ खाइल व्यक्ति रहल ओरसे केक्रो दवाव ओ करकापमे नइपरके काम कैना जरुरी बा ।’

कार्यक्रममे अख्यिार दुरुपयोग अनुसन्धान आयोग कार्यालय कञ्चनपुरके सिनियर डिभिजन इन्जिनियर प्रेम बहादुर बस्याल स्थानीय तहके विकासके योजनामे सबसे ढेर भ्रष्टाचार हुइना करल ओरसे अनुगमनके क्रममे प्राविधिक, अनुगमन समितिसे मापदण्ड अनुसार काम हुइल, नइहुइल हेरके पास कैना उहाँ बटैलै ।

उहाँ कहलै, ‘कौनो योजना इस्टिमेट अनुसार काम नइहुइल हो कलेसे जटरा काम हुइल बा ओटरे भुक्तानी करे परठ । मने उ फे गुणस्तर ओ मापदण्ड हेर्ना जरुरी बा ।’ कार्यक्रममे अख्यिार दुरुपयोग अनुसन्धान आयोग कार्यालय कञ्चनपुरके शाखा अधिकृत नारायण ढकाल भ्रष्टचार नियन्त्रण तथा सुशासन प्रवद्र्धन’ सम्बन्धी जानकारी डेहल रहिट ।

कार्यक्रममे कैलारी गाउँपालिकाके प्रवक्ता तथा वडा नम्बर ७ के अध्यक्ष दिपेन्द्र बहादुर बम, वडा–५ के वडा अध्यक्ष विष्णु प्रसाद चौधरी, वडा नम्बर ४ के अध्यक्ष ठागुराम चौधरी, वडा नम्बर ६ के वडा अध्यक्ष प्रेमबहादुर चौधरी लगायत अपन जिज्ञाशा राखल रहिट ।

कार्यक्रममे गाउँपालिकाके प्रमुख प्रशासकीय अधिकृत विरबहादुर ऐर, सामाजिक विकास अधिकृत यगम कलेल, सक्कु वडाके अध्यक्ष, वडा सदस्य, टमान शाखाके प्रमुख, इप्रका हसुलियाके प्रमुख रामसिंह बोहरा, विद्यालयके प्रअलगायतके सहभागिता रहे । सदूरपश्चिम प्रदेशके अख्यिार दुरुपयोग अनुसन्धान आयोग कार्यालय कञ्चनपुरमे गैल असारमसान्तसम ६७७ ठो उजुरी परल बा ।