मोटरसाइकल मर्मत तथा विद्युत जडान तालिम सुरु

पहुरा समाचारदाता
हसुलिया, ६ पुस । कैलाली जिल्ला कैलारी गाउँपालिका वडा नम्बर ३ मे ४५ दिने मोटरसाइकल मर्मत तथा विद्युत जडान तालिम सुरु हुइल बा । कैलारी गाउँपालिकाके आर्थिक सहयोगमे किरण नेपालके आयोजनामे क्षमता विकास तथा यूवा स्वरोजगार कार्यक्रम अन्र्तगत उ तालिम सुरु हुइल हो ।

उ तालिमके उदघाटन कार्यक्रमके वडका पहुना रहल कैलारी गाउँपालिकाके अध्यक्ष राजसमझ चौधरी करले रहिट । तालिमके उदघाटन करटी उहाँ यूवाहुकन टमान मेरिक सीपसे जोरे सेक्लेसे ओइनहे विदेश पलायनसे रोके सेक्ना, और देशमे रोजगारीके लाग भौतारे नइपर्ना बटैलै ।

गाउँपालिका अध्यक्ष कहलै, ‘यूवा शक्ति रोजगारीके लाग बाहेर जैठै । मने भारतियाहुक्रे नेपालके बालुमे टिना भराके ढेर आम्दानी करठै । अब्बे सक्कु टिना टावनफे भारतसे नाने पर्ना अवस्था आइल बा । कृषि करे छोरलेसे खाद्य संकट आइसेकी । ’
अपन हातमे सीप रहलेसे समाजहे परिवर्तन करे सेक्जाई । अब्बे अपनही परिवर्तन हुएटी समाजहे परिवर्तन कैना बा, गाउँपालिकाहे परिवर्तन कैना समय आइल बा, उहाँ कहलै ।

गाउँपालिका अध्यक्ष कहलै, ‘हम्रे अपनही परिर्तन हुई नइसेक्ठी मने अपन समाजहे परिवर्तन करे खोज्ठी । नेपालमे नोकरी खैना केल शिक्षा बा । रोजगारी मुलुक प्राविधिक शिक्षाके कमि बा टबमारे पह्रल लिखल यूवा नोकरी नइपाके बेरोजगार बैेठे पर्ना अवस्था रहल गाउँपालिका अध्यक्ष बटैलै । यूवाहुकन टमान सीपसंगे कृषिमे जोरे सेक्लेसे स्थानीयस्तरमे रोजगारी सृजना करे सेक्ना गाउँपालिका अध्यक्ष बटैलै ।

कार्यक्रममे गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्र बहादुर बम यूवाहुक्रे खाडी मुलुकमे जाके अपन जिउ हठेलीमे धारके काम कैना बाध्य बटैलै । उहाँ कहलै, ‘यूवाहुक्रे स्नातक, डिग्री पह्रकेफे गाउँघर ओस्टे बैठे परठ । विदेशमे जाकेफे सामान्य व्यक्ती बनके काम करे परठ । शिक्षाके मुल्याकन हुई नइसेकल हो । गाउँपालिकासे यूवाहुकनके लाग सीप मुलक तालिम संचालन कैना सहयोग करल मने यूवाहुकन काम सिखके ओकर सदुपयोग कैना आग्रह करलै ।
वडा नम्बर ५ के अध्यक्ष विष्णु प्रसाद चौधरी गाउँपालिकासे नीति तथा कार्यक्रम बनाके सीपसे जोरके यूवाहुकनके आत्मनिर्भर बनैनामे लागल बटैलै ।

किरण नेपालके अध्यक्ष अमृतचन्द चौधरीके अध्यक्षतामे हुइल तालिम उदघाटन कार्यक्रममे वडा नम्बर ३ के वडा अध्यक्ष सन्तराम चौधरी, किरण नेपालके सल्लाहकार मनिराम चौधरी ओ हरिराम चौधरीलगायतके सहभागिता रहल रहे । मोटरसाइकल मर्मतके प्रशिक्षकमे अमिर महतो, विद्युत जडानके कासीराम चौधरी रहल बटै ।

मोटरसाइकल मर्मत ओ विद्युत जडान तालिममे २०/२० जानेक सहभागिता रहल गाउँपालिका अध्यक्षके स्वकीय सचिव जीतेन्द्र चौधरी जानकारी डेलै । तालिम उदघाटन कार्यक्रमके संचालन मुकेश बखरिया करले रहिट ।