प्रतिनिधि सांसद लालविर नागरिक उन्मुक्ती पार्टीमे प्रवेश
पहुरा समाचारदाता
धनगढी, ८ पुस । स्वतन्त्र उम्मेद्वार डेके बर्दिया क्षेत्र न २ से प्रतिनिधि सभा सदस्य पदमे निर्वाचित माननीय लालबीर चौधरी नागरिक उन्मुक्ति पार्टीमे प्रवेश करले बटै ।
उहाँहे पार्टीके केन्द्रीय अध्यक्ष रन्जिता श्रेष्ठ चौधरी टिका खादा लगाके स्वागत करल रहिट । नागरिक उन्मुक्ति पार्टी काठमाण्डौमे शुकके रोज हुइल पहिल पुर्ण बैठकमे पार्टी प्रवेश करल माननीय लालबीर चौधरीहे पार्टीके केन्द्रीय, उ पार्टीसे विजयी हुइल सांसदहुक्रेफे टीका खादासे स्वागत करल रहिट ।
माननीय लालविर चौधरी प्रतिनिधि सभा सदस्य चुनावमे बर्दिया क्षेत्र न २ मे सत्ता गठबन्धनके साझा उम्मेवार नेकपा माओवादी केन्द्रके सुरेश पन्तहे हराके विजयी हुइल रहिट । लालविर २६ हजार ५२० नन्ले कलेसे पन्त २६ हजार ३८४ मत पैले रहिट ।
माननीय लालविर चौधरी उ पार्टीमे प्रवेश करलसंगे नागरिक उन्मुक्ती पार्टीसे प्रतिनिधित्व कैना प्रतिनिधि सभा सदस्यमे सांसद संख्या ४ पुगल बा ।
कैलाली क्षेत्र नम्बर १ से रन्जिता श्रेष्ठ चौधरी, क्षेत्र नम्बर २ से अरुण चौधरी ओ क्षेत्र नम्बर ३ से गंगाराम चौधरी विजय हुइल रहिट ।
ओस्टेक करके उ पार्टीसे प्रदेशसभामे प्रतिनिधित्व कैना प्रदेश ससंदके संख्या १२ रहल बा । जेम्ने सुदूरपश्चिम प्रदेशमे ७ जाने, लुम्बिनी प्रदेशमे ४ जाने मधेश प्रदेशमे १ जाने रहल बटै । यी पार्टी स्थानीय तहके चुनावमेफे कैलालीमे सबसे भारी पार्टीके रुपमे स्थापित हुइल बा । जेम्ने चार पालिकाके प्रमुखमे विजय हुइल बा ।
