नवज्योति कृषि सहकारीके १४ औं वार्षिक साधारण सभा

१२ करोड ७० लाख ढेर निक्षेप संकलन

पहुरा समाचारदाता
धनगढी, ९ पुस । कैलालीके धनगढी उपमहानगरपालिका वडा नम्बर ७ देवहरियास्थित नवज्योति कृषि सहकारी संस्था लिमिटेडसे १२ करोड ७० लाख ३५ हजार ७४८ रुपैयाँ निक्षेप संकलन करले बा ।

सहकारीके शनिच्चरके रोज हुइल १४औं वार्षिक साधारण सभामे आर्थिक वर्ष २०७८÷०७९ के असार मसान्तसम उ निक्षेप संकलन हुइल जानकारी कराइल हो । सहकारीके गैल वर्ष ११ करोड ३९ लाख ४२ हजार ४५ रुपैया निक्षेप संकलन हुइल रहे ।
सहकारी आर्थिक वर्ष २०७८÷०७९ मे व्याज, रासायनिक मल विक्री, विउविजन विक्रीसे ४० लाख ५६ हजार ९ सय ६ रुपैया शुद्ध नाफा आर्जन करल जनागिल बा । ओस्टेके, सहकारी आर्थिक वर्ष २०७८÷०७९ मे ११ करोड ४९ लाख ९७ हजार ९ सय ८२ रुपैया लगानी करले बा । सहकारी आर्थिक वर्ष २०७७÷०७८ मे ८ करोड ५१ लाख ४५ हजार २ सय ६१ रुपैया कर्जा प्रवाह करल जनैले बा ।

उ सहकारीके अब्बेक अधिकृत शेयर पुँजी १ करोड रहल बा । उ मध्ये २०७९ असार मसान्तसम ८८ लाख ८४ हजार ४ सय शेयर पुँजी पुगल बा कलेसे गैल वर्षके यिहे समयावधिमे ६८ लाख ७० हजार शेयर पुँजी रहे । सहकारीके जगेडा कोषमे ४८ लाख ९४ हजार १ सय ९४ रुपैयाँ पुगल बा । हाल सहकारीमे ८ सय १ जाने शेयर सदस्य रहल सहकारी जनैले बा ।

सहकारी संस्थाके अध्यक्ष सीताराम रानाके अध्यक्षमे हुइल कार्यक्रमके उद्घाटन संविधान सभा सदस्य मालामति राना करले रहि । कार्यक्रम उद्घाटन करटि संविधान सभा सदस्य राना मध्यम वर्गीय नागरिक हुकनहे जीवनस्तर उकस्नामे सहकारीके भूमिका रहल बटैले बटि । उहाँ सहकारी समाजमे रहल धनी ओ गरिबबीचके दूरी घटैटि कृषि, व्यापार, व्यवसायी, शिक्षा, स्वास्थ्यलगायतके क्षेत्रमे क्रान्ति आइल बटैलि । “सहकारीसे हजार लर्का उच्च शिक्षा, प्राविधिक शिक्षा अध्ययन करे पैले बटैं,” उहाँ कलैं, “हम्रे अपन सहकारी अप्नही संचालन करे पाके सहकारी सफल हुइल हो ।”

ओस्टेक, ओस्टेके कार्यक्रममे संविधान सभा सदस्य प्यारेलाल राना समाज परिवर्तनमे सहकारीके भारी भूमिका रहल बटैटि यी सहकारी अगामी दिनमे सफल होए कना शुभकामना व्यक्त करले रहैं ।

धनगढी उपमहानगरपालिका वडा नम्बर ७ के वडाध्यक्ष मोतीराम राना समाजके आर्थिक, सामाजिक, राजनीतिक विकास तथा समृद्धिके लाग सहकारीके भूमिका बरवार रहल बटैलैं ।

उ अवसरमे टमान उत्कृष्ट बचतकर्ताहुकनहे सम्मान फेन करल रहे । सम्मानित हुइलमे यमुना जोशी, बद्दल राना, विष्णादेवी राना, भंगी रानाथारु, सियाराम राना, शान्तिकुमारी सिंह, सबदादेवी राना, रामेश्वर राना, रामवीर चौधरी, प्रेमपति राना, फूलचन्द राना, रामपति राना, रामचन्द्र राना, साहेब राना, सिर्जना राना, जगन्नाथ राना, मंग्गा राना, जोगेन्द्र सट्टी, भैलुराम राना, अर्जुन चौधरी, ठग्गा राना, उदासादेवी राना, हेमराज राना, शारदाप्रसाद राना, हर्षराज राना, मथुरा राना बटैं ।

कार्यक्रममे जिल्ला सहकारी संघके अध्यक्ष फणिराज सापकोटा, देवहरिया सामुदायिक वन उपभोक्ता समूहके अध्यक्ष शारदाप्रसाद राना, देवहरिया गाउँ भल्मन्सा जगन्नाथ राना, शेयर सदस्य अन्तराम चौधरीलगायत मन्तव्य व्यक्त करले रहैं । कार्यक्रमके सञ्चालन सहकारीके सचिव भीरा राना करले रहैं ।