अपांगता हुइल व्यक्तिहुकनके लाग ह्वील चेयर बास्केट बल प्रतियोगिता

पहुरा समाचारदाता
धनगढी, ९ पुस । अपाङगता हुइल व्यक्तिहुकनके लाग शनिच्चरके रोज ह्वील चेयर बास्केट बल प्रतियोगिता हुइल बा ।

प्रादेशिक स्वास्थ्य प्रवर्द्धन केन्द्र कञ्चनपुरके आयोजना तथा समावेशी पारा एथ्लेक्टिस स्पोर्ट क्लवके समन्वयमे हुइल प्रतियोगिता उदघाटन कार्यक्रमके वडका पहुना सामाजिक विकास मन्त्रालयके सचिव दिपक लामिछाने रहल रहिट । कलेसे विशिष्ट पहुना सुदूरपश्चिम खेलकुद परिषदके सदस्य सचिव दिपक प्रसाद सिंह रहल रहिट ।

प्रादेशिक स्वास्थ्य प्रवर्द्धन केन्द्र प्रमुख हेमराज खडकाके अध्यक्षतामे हुइल कार्यक्रममे धनगढी, टीकपुर ओ कञ्चनपुरके टिम सहभागिता रहे । जेम्ने धनगढीके टिम पहिल, टीकापुर टिम दुसरा ओ कञ्चनपुरके टिम टिसरा हुइल रहे । कार्यक्रममे अपाङता रहल व्यक्तिहुकनके अधिकारके क्षेत्रमे अगुवाई करटी आइल नन्दराज भट्ट सम्मानित हुइल बटै ।