थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २४ माघ २६४६, मंगर ]
[ वि.सं २४ माघ २०७९, मंगलवार ]
[ 07 Feb 2023, Tuesday ]

कैलारीसे शिक्षामे लगानी बह्रैटी

पहुरा | १४ पुष २०७९, बिहीबार
कैलारीसे शिक्षामे लगानी बह्रैटी

जानकी माध्यमिक विद्यालयके ३३औं बार्षिकोत्सव

पहुरा समाचारदाता
हसुलिया,१४ पुस ।
कैलारी गाउँपालिकाके अध्यक्ष राजसमझ चौधरी गाउँपालिकासे शिक्षामे लगानी बह्राइल बटैले बटै ।

कैलाली गाउँपालिका वडा नम्बर ६ स्थित बनकट्टास्थित जानकी माध्यमिक विद्यालयके ३३औं बार्षिकोत्सव तथा अभिभावक भेलामे सम्बोधन करटी उहाँ शिक्षा विकास जग रहल कहटी यी आर्थिक बर्षमे गाउँपालिका भित्तर सक्कु विद्यालयके अधुरा भवन सम्पन्न कैना कार्यपालिकासे निर्णय हुइल बटैलै ।

‘पालिकाके सक्कु विद्यालयके अवस्था बुझना वडा अध्यक्षहुकनके सहभागिता रहल तीन सदस्य कार्यदल बनाइल बा,’ उहाँ कहलै, ‘कार्यदलसे सक्कु विद्यालयके अनुगमन करके विद्यालयके अवस्था बुझही । कार्यदलसे विद्यालयके अवस्था, विद्यार्थी संख्या, अपुग शिक्षक ओ भौतिक पूर्वाधार बुझके गाउँपालिकामे प्रतिवेदन बुझैना कहल बा ।’

कैलारी गाउँपालिकामे गैल सालके एसइइके परिक्षाफलसे अपने असन्तुष्ट रहल कहटी शिक्षामे सुधार नानेक ठप बजेट विनियोजन करल उहाँ बटैलै । अध्यक्ष कहलै, कार्यदलके प्रतिवेदन आइलपाछे विद्यालयके आवश्यकता अनुसार शिक्षक दरबन्दी, भवन निर्माणके काम आघे बह्रजाई ।’

कैलारी गाउँपालिका लडियासे घेरल पालिका रहल कहटी फाइदासे ढेर नोक्सानी हुइल उहाँ बटैलै । और पालिकाके आयस्रोत लडियाके बालु विक्रीसे हुइठ, कलेसे यहाँके लडियाके बालु कामे नइलग्ना बल्की बर्खामे खेती योग्य जमिन कटना, बाढसे डुबान, पटान करल गाउँपालिका अध्यक्ष कहलै । गाउँपालिका शिक्षासंगे कृषिहे प्राथमिकता डेटी कृषि मोटरके व्यवस्था कैनाफे अध्यक्ष बटैलै ।

कैलारी–६ के वडा अध्यक्ष प्रेम बहादुर चौधरी विद्यार्थीहुकनके भविष्यबारे अभिभावकफे सचेत हुइना जरुरी रहल बटैलै । उहाँ कहलै, ‘अब्बे लर्का पह्राईसेफे मोवाइलमे टिकटक, फेसबुक, पब्जी, फ्रि फयारमे ढेर ध्यान डेठै ।’ अंग्रेजी भाषाके लाग केल अभिभावक अपन लर्का बोडिङमे डर्ना मने सरकारी विद्यालयमे पह्रना अपन लर्कनफे ध्यान दैडेना उहाँ आग्रह करलै ।

बनकट्टा गाउँक बुद्धिजिवी सन्तराम चौधरी सरकारी विद्यालयमे पह्रना विद्यार्थीन पह्राईस्तर घटटी गैल बटैलै । उहाँ कहलै, शिक्षा जीवनहे आघे बह्रैना डगर हो । विद्यार्थी विद्यालयमे पठाके केल नइहुई, घरेफे अभिभावक ध्यान डेना जरुरी बा ।

जनता मावि गदरियाके शिक्षक डिल्लीराज मिश्र विद्यालय व्यवस्थापन, शिक्षक, अभिभावकके समन्वय हुइलेसे केल शिक्षामे गुणस्तर नाने सेक्ना बटैलै । उहाँ कहलै, ‘विद्यार्थीन विद्यालय पठासेक्ली आब सबकुछ सिखजैही कना अभिभावकहे भ्रम नइराखे परल । मोर लर्का कटना जन्लै, विद्यालयमे पह्राई हुइल की नइहुइल, लर्का विद्यालयमे जैठै की नइजैठै अभिभावकहेफे जिम्मेवार हुई परल । उहाँ कहलै, शिक्षा देशके मेरुदण्ड हो । शिक्षाके विकास हुइलेसे केल देशके विकास हुई ।

कार्यक्रममे विद्यालयके प्रअ उपेन्द्र भण्डारी विद्यालयके प्रतिवेदन ओ लेखापाल खुशीराम चौधरी विद्यालयके आर्थिक बर्ष २०७८÷०७९ सालके १ करोड २ लाख २१ हजार ३०७ रुप्या १४ पैसा बराबरके आयव्यय विवरण प्रस्तुत करल रहिट ।


जानकी माध्यमिक विद्यालयके विद्यालय व्यवस्थापन समितिके अध्यक्ष आशाराम चौधरीके अध्यक्षतामे हुइल कार्यक्रमके संचालन शिक्षक विनोद चौधरी, स्वागत मन्तव्य नरबहादुर विष्ट करले रहिट ।

कार्यक्रममे कक्षा १० के विद्यार्थी अर्पन चौधरी, सतिराम चौधरीफे मन्तव्य व्यक्त करले रहिट । विद्यालयके ३३औं बार्षिकोत्सव तथा अभिभावक भेलामे विद्यार्थीनसे बनागिल टमान अविष्कार प्रदर्शन ओ नाँच डेखागिल रहे । २०४६ सालमे स्थापना हुइल यी विद्यालयमे अब्बे २४७ जाने विद्यार्थी रहल बटै ।

जनाअवजको टिप्पणीहरू