शुक्लाफाँटा पत्रकारिता पुरस्कारसे उन्नती चौधरी सम्मानित
पहुरा समाचारदाता
धनगढी, १६ पुस । शुक्लाफाँटा पत्रकारिता पुरस्कारसे उन्नती चौधरी सम्मानित हुइल बाटी । शुक्लाफाँटा एफएमके १६ औँ वार्षिक उत्सवके अवसरमे चौधरी शुक्लाफाँटा पत्रकारिता पुरस्कारसे सम्मानित हुइल रही ।
स्थानीय विकास मञ्च फोल्ड कन्चनपुरके पहल ओ समुदायसे सञ्चालित सामुदायिक रेडियो शुक्लाफाँटा एफ एम ९९.४ मेगाहर्जसे १६औं वार्षिकोत्सवके अवसरमे केर्नी न्यूजके सञ्चालक तथा सम्पादकहे चौधरी नगद पुरस्कार सहित सम्मान प्रदान करल हो ।
२०६३ साल पुस १५ गतेसे विधिवत रुपमे प्रशारणके थालनी हुइल साविक महाकाली अञ्चलके पहिल ओ सामुदायिक रेडियो समाजमे रहल विकृति ओ कुरीति कुसंस्कारके विरुद्ध अवाज उठैटी रहल अभियन्ताहे हरेक बरस पुरस्कृत कैटी आइल बा ।
शुक्लाफाँटा एफएम सुदूरपश्चिमके सर्वाधिक प्रशारण क्षमता रहल एफएम हो । रेडियोके अध्यक्ष बलबहादुर डंगौराके अनुसार हरेक वर्ष शुक्लाफाँटा एफएमसे स्थानीय तथा राष्ट्रिय क्षेत्रमे उल्लेख्य योगदान पुगाइल व्यक्तित्वहे सम्मान, अभिनन्दन कैटी आइल जानकारी डेलै ।
साथे बरसमे एक जाने पत्रकारहे पत्रकारिता क्षेत्रमे अनुकरणीय कार्य करलबाफत शुक्लाफाँटा पत्रकारिता पुरस्कार सहित सम्मान कैटी आइल बा । उहे पुरस्कारसे इ बरस पत्रकार उन्नती चौधरीहे प्रदान करल हो ।
