ठगी धन्धामे संलग्न एक यूवक पक्राउ

पहुरा समाचारदाता
धनगढी, २१ पुस । कैलाली, कञ्चनपुरमे टमान प्रलोभन, डर, धम्की डेटी ठगी धन्दा करटी आइल एक युवक पक्राउ परल बटै ।

ठगी धन्धामे संलग्न दार्चुला लेकम गाउँपालिका वडा नम्बर १ बैठना बर्ष ३५ के पदमराज भट्टहे आज जिल्ला प्रहरी कार्यालय कैलाली ओ वडा प्रहरी कार्यालयसे खटल प्रहरी टोली हुकहिनहे धनगढी उप–महानगरपालिका वडा नम्बर ३ से पक्राउ करल हो ।

पदमराज भट्ट अपने टमान बैंक तथा संघ सस्थाके हाकिम हँु कहिके अपन वास्तविक परिचय नुकाके कैलाली, कञ्चनपुर लगायत टमान ठाउँमे बैठना व्यक्तीहुकनहे डर त्रास तथा प्रलोभन डेखाके ठगी धन्धा करटी आइल जिल्ला प्रहरी कार्यालय कैलाली जनैले बा । ओटरा केल नाही उहाँ महिलाहुकनहे ललाई फकाई करके ओइनके अश्लिल भिडियो पोष्ट करडेना धम्की डेटी ठगीमे संलग्न रहल प्रहरी जनैले बा ।

प्रहरी कार्यालयसे थप अनुसन्धान हुइटी रहल ओ पदमराज भट्टसे ठगुवा पाके पीडित हुइल व्यक्तीहुकनके प्रमाण सहितके जाहेरी दरखास्त लेके जिल्ला प्रहरी कार्यालय कैलालीमे सम्पर्क कैना आग्रह करले बा ।