‘थारु समुदायके साझा मुद्दा सदनमे उठाब’

पहुरा समाचारदाता
धनगढी, २३ पुस । थारु समुदायसे प्रतिनिधित्व करुइया सुदूरपश्चिम प्रदेश सभाके सदस्यहुक्रे आपन समुदायके साझा मुद्दा प्रदेश सदनमे उठैना प्रतिवद्धता जनैले बाटै ।

थारु कल्याणकारिणी सभा लगायत १४ ठो जातिय संघ, संस्थासे शनिच्चरके धनगढीमे आयोजना करल बधाई तथा शुभकामना ज्ञापन कार्यक्रममे उहाँहुक्रे साझा मुद्दाबारे सदनमे आवाज बुलन्द कैना प्रतिवद्धता जनाइल हुइट ।

नागरिक उन्मुक्ति पार्टीके प्रमुख सचेतकसमेत रहल प्रदेश सभा सदस्य लक्ष्मणकिशोर चौधरी आब सडकमे नैहोके थारु समुदायके आवाज सदनमे बुलन्द कैना बटैलै । उहाँ टीकापुर घटनापाछे राज्यसे थारु समुदायहे जबरजस्ती अपराधी बनैना कार्य करल कहटी आघे थप्लै‘कौनो फेन समुदायहे एकतर्फी पेलके विकासके कल्पना करे नैसेकाइ ।’ टीकापुर घटना राजनीतिक रहल ओरसे मुद्दा खारेजी हुइ पर्ना आपन पार्टीके जोड रहल उहाँके कहाइ रहे ।

राज्यसे नीतिगत रुपमे थारुनउपर विभेद कैना कार्य करटी रहल कहटी चौधरी नीति निर्माण कैना ठाउँमे अपनेहुक्रे पुगल ओरसे सुधारके लाग प्रयत्न कैना उल्लेख करलै । ‘हम्रे राजनीतिमे लग्ना नै एकठो विद्रोह हो’, चौधरी कहलै,‘आब हमार समुदायके आवाज प्रदेश ओ प्रतिनिधि सभामे बुलन्द हुइ ।’

ओस्टके औरे प्रदेश सभा सदस्य खुशीराम डङ्गौरा थारु साझा मुद्दामे सक्कु जाने एक हुइ पर्ना कहटी न्यायके लाग संघर्ष करटी रहना बटैलै । औरे प्रदेश सभा सदस्य घनश्याम चौधरी विकासके साझा सपना अपनेहुक्रे पूरा कैना बटैलै ।
ओस्टके, प्रदेश सभा सदस्य कोइलीदेवी चौधरी थारुहुक्रे जुनसुके पार्टीमे रलेसे फेन थारु समुदायके साझा मुद्दामे एक रहल बटैली । ‘जनता हम्रहीनहे जौन उद्देश्य लेके पठैले बाटै, ओकर लाग हम्रे तत्पर बाटी’, उहाँ कहली ।

कार्यक्रममे थारु समुदायके १२ बुँदे साझा मुद्दा प्रदेश सभा सदस्यहे हस्तान्तरण करल बा । प्रतिनिधि सभा सदस्यहुक्रनके कार्यक्रममे अनुपस्थिति हुइल प्रदेश सभा सदस्य लक्ष्मणकिशोर चौधरीमार्फत उहाँहुक्रनहे फेन माग, मुद्दा हस्तान्तरण करल बा । थारु कल्याणकारिण सभा कैलालीके कार्यबाहक सभापति माधव थारु नवनिर्वाचित प्रदेश सभा सदस्यहे साझा माग, मुद्दाके फाइल हस्तान्तरण करल रहिट ।

कार्यक्रमके सहभागीहुक्रे टीकापुर घटना थारु समुदाय लागल सबसे प्रमुख ओ साझा मुद्दा रहल बटाइल रहिट । उहाँहुक्रे राजनीतिक आन्दोलनके क्रममे हुइल घटनाहे राजनीतिक रुपमे समाधान ओ मुद्दा खारेज हुइ पर्ना जोड डेलै ।

कार्यक्रममे थारु नागरिक समाज कैलाली संयोजक दिलबहादुर चौधरी ध्यानाकार्षण पत्र बाचन सहित सांसदहुक्रनहे ध्यानाकार्षण कराइल रहिट ।

कार्यक्रममे थरुहट नेता लक्ष्मण थारु, थाकस कैलालीके कानूनी सल्लाहकार अधिवक्ता जोहारी लाल चौधरी, नेपाल आदिवासी जनजाति महासंघ सदुरपश्चिम प्रदेश समन्वय समितिका कानूनी सल्लाहकार अधिवक्ता नाथुराम महतो, धनगढी नगर भलमन्सा समितिका अध्यक्ष रोहित चौधरी लगायत मनत्ब्य राखल रहिट ।

ओस्टके हमार फाउन्डेशनका ठाकुर करिया प्रधान, थारु नागरिक सभाके सदस्य बसन्ती चौधरी, शिक्षक तथा वुद्धिजिवी राजकुमार महतो, थारु विद्यार्थी समाजके केन्द्रीय सदस्य एन्जल चौधरी लगायत प्रदेश सभासदस्यहुक्रनहे माग मुद्दा सम्बोधनके लाग ध्यानाकार्षण कराइल रहिट ।

कार्यक्रममे स्वागत मनतब्य थारु महिला सभाके अध्यक्ष दुर्गा कुश्मी करल रही कलेसे सञ्चालन पत्रकार राम दहित करल रहिट ।

प्रदेश सभा सदस्यहुक्रनहे बुझाइल ध्यानाकार्षण पत्रमे टीकापुर घटनामे परके रेशम लगायतके निर्दोष थारु राजबन्दीहे रिहाई ओ ५८ जनहनमे लगाइल झुट्ठा मुद्दाके खारेजी, पहिचान देशके अमूल्य सम्पत्ति रहल ओरसे थरुहट थारुवान प्रदेशके लाग निरन्तर आवाज उठैना काम होए, संविधानमे उल्लेखित थारु क्लष्टरके सम्मानके लाग दलित, मधेशी, महिला, आदिवासी जनजाति जस्टे थारुनके लाग राज्यसे करजैना हरेक विज्ञापनमे ६.६ % आरक्षण कोटा छुट्याइना पहल लगायतके बुँदा रहल बा ।

ओस्टके सु.प. प्रदेश लोकसेवा आयोगसे कैना हरेक विज्ञापनमे थारुनके लाग २०% आरक्षण कोटा निर्धारणके लाग पहल, प्रदेशस्तरमे ओ थारु बहुल गाउँपालिका, नगरपालिकामे सरकारी कामकाजके भाषाके रुपमे थारु भाषाहे मान्यता डेहुवाइना, व्यवहारमे लागू कैना पहल, थारु बहुल क्षेत्रके प्राथमिक विद्यालयमे थारु भाषामे पाठ्यक्रम थारु भाषामे पह्राइके व्यवस्थाके लाग पहल, थारु बहुल जिल्लामे प्रहरी प्रमुख, प्रशासन प्रमुख (प्र.जि.अ.) थारु जातिहे पठैना कामके लाग पहल, निर्वाचित हुइल क्षेत्र, बसोबास करल निर्वाचन क्षेत्र, जिल्ला ओ प्रदेशमे थारु टरटिहुवार सम्मान पाए, प्रदेशस्तरमे सिकलसेल एनिमिया बिशेष अस्पतालके निर्माण ओ विरामी बाचटसम औषधि, उपचारके व्यवस्थाके लाग पहल, भल्मन्सा प्रथा लोकतान्त्रिक रहल ओरसे थारु बहुल हरेक स्थानिय तहहे ऐन बनाके उहीहे स्थानियतहसे समायोजन ओ मान्यता प्रदान कैना कार्यके पहल रहल बा ।

ओस्टके थारु बहुल जिल्ला, प्रदेशमे थारुनके लावा बरस माघ मनाइक लाग २ दिन (पुस अन्तिम दिन ओ माघ १ गते) बिदा, अँट्वारीमे १ दिन (भाद्र शुक्ल पक्षके पहिल अँट्वार), चिरै/चरै (चैत शुक्ल पक्षके पहिल सोम्मार) विद्यालयमे विदाके व्यवस्था कैना पहल लगायत रहल बा ।

ध्याकार्षण करुइया संघ, संगठनमे थारु कल्याणकारिणी सभा कैलाली, थारु नागरिक समाज कैलाली, थारु महिला सभा कैलाली, थारु विद्यार्थी समाज कैलाली, थारु पत्रकार संघ कैलाली, नेपाल आदिवासी जनजाति पत्रकार महासंघ कैलाली, नेपाल आदिवासी जनजाति पत्रकार महासंघ सुदूरपश्चिम प्रदेश समिति, हमार फाउन्डेशन कैलाली, सखी सञ्जाल कैलाली, राष्ट्रिय थारु कलाकार मञ्च सुदूरपश्चिम प्रदेश, थारु लेखक संघ, थारु युवा लगायतके संघ संगठन रहल बा ।