लखनउ बस दुर्घटनामे ४ के मृत्यु
पहुरा समाचारदाता
धनगढी, २५ पुस । भारतके लखनउमे हुइल बस दुर्घटनामे ३ नेपाली सहित ४ जनहनके मृत्यु हुइल बा । बस दुर्घटनामे मृत्यु हुइल तीनु नेपालीके सनाखत हुइल बा । जिल्ला प्रहरी कार्यालय कैलालीके अनुसार उ दुर्घटनामे तीन नेपाली ओ एक बसचालक भारतीय नागरिक सहित चारजनहनके मृत्यु हुइल बा ।
मृत्यु हुउइयामे टीकापुर नगरपालिका–१ के ५५ बरसके चन्द्र साउँद, उहे ठाउँके ४५ बरसके ललित साउँद ओ उहे ठाउँके २० बरसके निर्मला बोहरा रहल जिल्ला प्रहरी कार्यालय कैलालीके प्रहरी नायब उपरिक्षक वेद जोशी जानकारी डेलै । ओहकान अनुसार भारतीय नागरिक बसचालकके भर सनाखत हुइ सेकल नैहो ।
उ दुर्घटनामे परके घाहिल हुइल टीकापुर नगरपालिका–१ के ३५ बरसके हरि साउँदके अवस्था गम्भिर रहल प्रहरी जनैले बा । ओस्टके कञ्चनपुरके कृष्णपुर नगरपालिकाका २५ बरसके दिपक सुनारके अवस्था मध्यम ओ अन्य सात जनहनके अवस्था सामान्य रहल प्रहरी नायब उपरिक्षक जोशी जानकारी डेले बाटै ।
भारतके गुजरातसे नेपालके टीकापुर अइटी रहल आरजे २७ पिए ५७०३ नम्बरके बस लखनउ लग्गे रातके दुर्घटना हुइल रहे । उ बससँग मिनी ट्रक टक्राइल प्रहरी जानकारी डेले बा ।
बसमे ६६ जाने यात्रु रहल जनाइल बा । भारतके गुजरात, सुरत लगायतके क्षेत्रसे नेपाली किल ओहोरदोहोर करे मिल्ना मेरके बस सेवा सञ्चालनमे रहल बावै ।
