कैलारी गाउँपालिकाके हिउँदे अधिवेशन सुरु
पहुरा समाचारदाता
हसुलिया, २८ पुस । कैलाली जिल्ला कैलारी गाउँपालिकाके हिउँदे अधिवेशन विफेक रोजसे सुरु हुइल बा ।
आर्थिक बर्ष २०७९÷०८० सालके गाउँसभा अधिवेशन (हिउँदे अधिवेशन) गाउँपालिका अध्यक्ष राजसमझ चौधरीके अध्यक्षतामे उदघाटन कार्यक्रम हुइल हो । हिउँदे अधिवेशनके पहिल बैठकसे टिकापुर घटनाहे राजनितिक घटना, पुस अन्तिमसे माघ ३ गतेसम माघ पर्वके लाग सार्वजनिक विदा, जिल्ला समन्वय समिति कैलालीके सभापति पदम कलेलके दुखद निधन हुइल ओरसे शोक प्रस्ताव पारित करटी हिउँदे अधिवेशनके उदघाटन कार्यक्रम सम्पन्न हुइल हो ।
हिउँदे अधिवेशन उदघाटन कार्यक्रममे गाउँपालिका उपाध्यक्ष भगवतीकुमारी चौधरी, वडा नम्बर १ से ९ समके वडा अध्यक्ष, कार्यपालिका सदस्य, वडा सदस्य, प्रमुख प्रशासकीय अधिकृृत विरबहादुर ऐर, सामाजिक विकास शाखा प्रमुख यगम कलेल, टमान शाखाके प्रमुख, कर्मचारीहुकनके सहभागिता रहे ।
शुकके बैठना कार्यपालिका बैठकसे टमान विषयगत समितिसंग परामर्श कैना, कानूनी सल्लाहकार, विज्ञसंग विद्येयकबारे छलफल करके फेरसे बैठना गाउँसभा बैठकमे समितिके संयोजक विकास चौधरीसे प्रस्ताव पेश कैना गाउँपालिकाके प्रवक्ता दिपेन्द्रबहादुर बम बटैलै ।
