५० प्रतिशत अनुदानमे कृषि यन्त्र हस्तान्तरण

पहुरा समाचारदाता
धनगढी, ७ माघ । धनगढी उपमहानगरपालिका–७ देवहरियास्थित दाइजो कृषि सहकारी कृषि ज्ञान केन्द्र कैलालीसे प्रदान करल ५० प्रतिशत अनुदानमे कृषि सामाग्री हस्तान्तरण करले बा ।

सहकारीसे शनिच्चरके रोज एक कार्यक्रमके विच आठ जाने कृषकहुकनहे ५० प्रतिशत अनुदानमे कृषि सामाग्री (पावर टिलर टेक्टर) हस्तान्तरण करल हो । सुदूरपश्चिम प्रदेश सरकारके भुमि व्यवस्था तथा कृषि सहकारी मन्त्री विनिता चौधरी कृषकहुकनहे कृषि सामाग्री (पावर टिलर टेक्टर) हस्तान्तरण करल रहिट ।

कार्यक्रममे बोल्टी मन्त्री चौधरी किसानके अवश्यकता अनुसार सहयोग करल बटैली । उहाँ कहली, ‘अब कृषि क्षेत्रके वृद्धि विकास कैना जरुरी बा । किसानहुकनके लाग हम्रे १० करोडके लागतमे कोल्ड स्टोर निर्माण करल बटी ।’ सुदुरपश्चिम प्रदेश सरकारसे कृषि तथा पशुपक्ष्ािं एकिकृत कार्यक्रम कहिके यहाँ केल नाही सातु प्रदेशमे एक ठो भारी प्रजेक्टके रुपमे नमूना बनाई परठ कहिके ८८ ठो स्थानीय तहमे एक÷एक ठो करके कार्यक्रमके शुरुवात करल उहाँ बटैली । उ प्रजेक्ट अनुसार टमान ठो समन्वय समिती बनाके कार्यक्रम संचालन करल रही । टमान कार्यक्रम हम्रे सहकारी मार्फत सुरु करल रही । यिहे भिटर खद्यायन्न बाली केल नाही पशुपंक्षी, माछा पालन, कुखुरा पालन, बंगुर पालन, बाख्रा पालन लगायत कार्यक्रम संचालन हुइल मन्त्री बटैली ।

‘यी कार्यक्रम संचालन करेबेर हम्रे का कहले रही कलेसे एक वर्ष एक ठो कार्यक्रम ओ दुसर बर्ष दुसर कार्यक्रम करेबेर मजा नइहुई यिहीहे कम्तीमे तीन वर्षसम निरन्तरता करटी लैजाई परी टबकेल हम्रे किसानहुकनहे आत्मनिर्भर बनाई सेक्बी उहे उद्देश्यके साथ सुदुरपश्चिमके नौ जिल्लामे कार्यक्रम संचालन करल रही ।’

उहे कार्यक्रम अन्तर्गत दाइजो कृषि सहकारी संस्थामे विज वृद्घि कार्यक्रम अन्र्तगत सुरुवाट कैगिल ओ यी सहकारी मजा काम करके सुदूरपश्चिम प्रदेशमे उत्कृष्ट हुइल मन्त्री चौधरी बटैली ।

कार्यक्रममे विशिष्ट पहुना धनगढी उपमहानगरपालिका वडा नम्बर ७ के वडा अध्यक्ष मोती रानाथारु कृषि क्षेत्रमे हुइल उत्पादनमे बजार मूल्य व्यवस्थापन हुइनइसेकल बटैलै । किसानहुकनके रासायनिक मलके अभाव बा, यम्नेफे सरकारके ध्यान नइपुगल हो,’ वडा अध्यक्ष राना कहलै, ‘धनगढी वडा नं ७ मे सिचाईके लागफे समस्य विल्गाइटी बा । यम्ने सरकारके ध्यानाकर्षण हुइना चाही ।’ ३ वर्षमे ४८ जाने किसानहे पावर टिलर उपलब्ध कराइल अध्यक्ष बटैलै ।

कार्यक्रममे कृषि ज्ञान केन्द्र कैलालीके अधिकृत खगेन्द्रप्रसाद शर्मा, श्यामराज जोशी, संस्थाके अध्यक्ष मानबहादुर राना, गाउँक बुद्घिजीवी देवबहादुर सेठी, दिर्घराज जोशी लगायत शुभकामना मन्तव्य करल रहिट ।

मुख्य मन्त्री नमुना कृषि गाउँ खाद्यन्न वीउ उत्पादन कार्यक्रम समन्वय समितिके संयोजक चन्द्रकिरण रानाके अध्यक्षतामे हुइल कार्यक्रममे उहाँ कार्यक्रममे आठ ठो मिनि पावर टिलर, २.२४ टन गोहुके विऊ, ०.७२ टन प्रमाणित गोहुके विऊ जम्मा अनुदान रु ९लाख २० हजार ७ सय ६० बराबरके ५० प्रतिशत अनुदान कार्यक्रम रहल जनैली । दाइजो कृषि सहकारी संस्थासे विगत तीन वर्षसे करटी आइल ओ यी अन्तिम वर्षके कार्यक्रम रहल उहाँ जानकारी डेली ।

कार्यक्रमके स्वागत मन्तव्य शिक्षा समिति संयोजक मनराज यादव ओ संचानल सचिव दिपकराज जोशी करले रहिट । कार्यक्रममे सहकारीके कार्यसमितिके पदाधिकारी, शेयर सदस्यहुकनकेफे सहभागिता रहे ।