सुदूरपश्चिममे उद्योगके उत्पादन क्षमता कमजोर

पहुरा समाचारदाता
धनगढी, १२ माघ । सुदूरपश्चिममे तीन हजार औद्योगिक प्रतिष्ठान २४ प्रतिशत केल पूर्ण क्षमतामे सञ्चालन रहल जनागिल बा ।

बुधके रोज धनगढीमे केन्द्रिय तथ्यांक कार्यालयके कार्यालयके आयोजना तथा जिल्ला तथ्यांक कार्यालय कञ्चनपुरके समन्वयमे सार्वजनिक करल राष्ट्रिय औद्योगिक सर्वेक्षण, ०७६ अनुसार प्रदेशमे ७६ प्रतिशत औद्योगिक प्रतिष्ठानके उत्पादन क्षमता पूर्ण रूपमे उपयोग नइहुइल तथ्यांक सार्वजनिक करल हो ।

राष्ट्रिय औद्योगिक सर्वेक्षणके तथ्याङक सार्वजजनिक करटी निर्देशक राजेश धिताल सुदूरपश्चिम प्रदेशमे रहल औद्योगिक प्रतिष्ठानके उत्पादन क्षमताके उपयोग कमजोर रहल बटैले बटै ।

औद्योगिक क्षेत्रके सम्भावना बोकल सुदूरपश्चिम प्रदेशमे रहल औद्योगिक प्रतिष्ठानमन्से २४ प्रतिशतसे केल उत्पादन क्षमताके पूर्ण उपयोग करल पाइल उहाँ बटैलै । केन्द्रिय तथ्यांक कार्यालयसे खानी तथा उत्खनन, औद्योगिक उत्पादन, विद्युत्, ग्यास, वाफ तथा वातानुकुलित सेवा ओ पानीके आपूर्ति, ढलनिकास, फोहोर व्यवस्थापन ओ ओकर उपचारात्मक क्रियाकलाप करके चार क्षेत्रके औद्योगिक प्रतिष्ठानके सर्वेक्षण करल हो ।

सर्वेक्षण अवधिमे प्रदेशमे २५ प्रतिशतसे कम क्षमताके उपयोग एक दशमलब दुई प्रतिशत, २५ से ४९ प्रतिशत उपयोग कैना १२ दशमलब दुई प्रतिशत, ५० से ७४ प्रतिशत उपयोग कैना ३२ दशमलब दुई प्रतिशत तथा ७५ से ९९ प्रतिशत उपयोग कैना उद्योग ३० प्रतिशत रहल कार्यालयके आर्थिक जनगणना शाखाके निर्देशक महेशचन्द्र प्रधान जानकारी डेलै ।

उहाँक अनुसार अनियमित विद्युत, समयमे कच्चा पदार्थ नइपैना, मागके कमी, आधुनिक उपकरण नइहुइना, पुर्वाधार अभाव, प्रतिष्पर्धा, स्रोतके कमी लगायतके कारण औद्योगिक उत्पादन क्षमता पूर्ण रुपमे उपयोग हुई नइसेकल हुइट ।
प्रदेशमे वर्षभर उत्पादन कार्य सञ्चालन कैना उद्योग प्रतिष्ठान राष्ट्रिय अवस्थासे सुधार डेखल बा । ‘सन्दर्भ अवधिमे औद्योगिक क्षेत्रके चारु औद्योगिक प्रतिष्ठानमन्से करिब ७६ प्रतिशत उद्योग २७० दिनसे ढेर सञ्चालन हुइल डेखल बा । सुदूरपश्चिम प्रदेशमे ८० प्रतिशत प्रतिष्ठान २७० दिनसे ढेर सञ्चालन हुइल विल्गाइठ ।’

सन्दर्भ अवधिमे यी प्रदेशमे तीन हजार तीन सय ८७ उद्योग प्रतिष्ठान रहल बटै । यी आधारमे देशभरमे कम उद्योग प्रतिष्ठान हुइना प्रदेशअन्र्तगत छैटौं नम्बरमे परठ । सबसे कम उद्योग प्रतिष्ठान कर्णाली प्रदेशमे रहल बा । सन्दर्भ अवधिमे दूरपश्चिम प्रदेशमे सबसे औद्योगिक उत्पादन प्रतिष्ठान ढेर रहल बा । प्रदेशमे भारी दुई सय २८ ओ छोट दुई हजार आठ सय ७३ करके तीन हजार एक सय एक औद्योगिक उत्पादन प्रतिष्ठान रहल बटै । प्रदेशमे खानी तथा उत्खन्न उद्योग प्रतिष्ठान पाँच, विद्युत तथा ग्याँस एक सय ९९ ओ पानीके आपुर्ति, ढल निकास, फोहोर व्यवस्थापन प्रतिष्ठान ८२ रहल बटै ।

प्रदेशमे उद्योग प्रतिष्ठानके लागत उत्पादन अनुपातफे सुधार हुइल बा । प्रदेशमे उद्योगहुक्रे एक सय रुप्या कमाइक लाग ६६ रुप्या लगानी करेपर्ना डेखल बा । प्रदेशमे उद्योग क्षेत्रके लागत २५ अर्व ४० करोड ९८ लाख ९६ हजार रुप्या रहलमे उत्पादन ३८ अर्व ४५ करोड ४४ लाख १७ रुप्या रहल बा । यी अनुसार प्रदेशमे उद्योग प्रतिष्ठानमे मुल्य अभिवृद्धि १३ अर्व चार करोड ४५ लाख २१ हजार रुप्या रहल बा ।

सन्दर्भ अवधिमे प्रदेशमे उद्योग प्रतिष्ठानमे २० हजार ४९ व्यक्ति संलग्न रहलमे खानी तथा उत्खन्नमे ५२, औद्योगिक उत्पादनमा १८ हजार एक सय चार, विद्युत तथा ग्याँसमे एक हजार पाँच सय १२ ओ पानीके आपुर्ति, ढल निकास, फोहोर व्यवस्थापनमे तीन सय ८१ जाने संलग्न रहल उ तथ्यांकमे उल्लेख बा ।

तथ्यांक अनुसार खानी तथा उत्खन्नमे ४४, औद्योगिक उत्पादनमे १२ हजार नौ सय ६६, विद्युत तथा ग्याँसमे एक हजार ७० ओ पानीके आपुर्ति, ढल निकास, फोहोर व्यवस्थापनमे दुई सय २५ जाने करके १४ हजार तीन सय पाँच जाने रोजगार व्यक्ति रहल बा कलेसे तीन अर्व ६६ करोड ३९ लाख ४६ हजार रुप्या प्रतिष्ठानसे तलबी कामदारके लाग वार्षिक रुपमे तलब, ज्याला तथा सुविधामे खर्च करल बा । यी प्रदेशमे रहल चारु औद्योगिक प्रतिष्ठानके स्थायी सम्पत्ती २३ अर्ब पाँच करोड ३२ लाख २९ हजार रहल बा ।