धनगढीमे मुख्य सडक निर्माणके काम सुरु

पहुरा समाचारदाता
धनगढी, १३ माघ । धनगढीके ट्राफिक चौराहसे कैलाली पुलसम मुख्य सडक निर्माणके काम सुरु हुइल बा ।
एशियाली विकास बैंक (एडीबी) के सहुलियत ऋण लगानीमे क्षेत्रीय सहरी विकास आयोजना अन्तर्गत ट्राफिक चौराहसे कैलाली पुलसमके मुख्य सडक निर्माणके काम शुकसे सुरु करल हो ।

धनगढीके ट्राफिक चौराहासे कैलाली नालासम (१ हजार ३ सय ८० मिटर) सडक निर्माणके लाग यी आघे सम्झौता करल हुइलेसेफे काम हुई नइसेकल रहे । २०७७ असार अन्तिम साता धनगढी चौराहसे कैलाली पुलसमके सडक सहित धनगढीके ७ ठो सडक निर्माणके लाग सम्झौता हुइल रहे ।

उ सम्झौता क्षेत्रीय सहरी विकास आयोजना ओ निर्माण कम्पनी कालिका कन्स्ट्रक्सन प्रालिबीच हुइल रहे । मने सम्झौता हुइल दुई वर्षसे ढेर समय विटसेक्लेसेफे काम हुई नइसकल रहे । ७ ठो सडक निर्माणके लाग दुई वर्षके ठेक्का सम्झौता करल रहे । ढिला हुइलेसेफे धनगढी चौराहसे कैलाली पुलसम सडक निर्माणके लाग आजसे काम सुरु हुइल हो ।