सर्वोच्च अदालतसे रवि लामिछानेके सांसद पद बदर
काठमाडौँ, १३ माघ । सर्वोच्च अदालतसे राष्ट्रिय स्वतन्त्र पार्टीके अध्यक्षसमेत रहल गृहमन्त्री रवि लामिछानेके सांसद पद खारेज करडेले बा ।
लामिछानेके नागरिकता अवैध हुइल ठहर करटी सर्वोच्च अदालतसे उहाँक सांसद पद खारेज करडेहल हो ।
लामिछाने गैल अगहन ४ मे हुइल निर्वाचनमे चितवन २ से प्रतिनिधसभा सदस्यमे निर्वाचित हुइल रहिट । नागरिकताके विषयमे लामिछानेहे विपक्षी बनैटी रविराज बसौला ओ युवराज सफलसहितसे मुद्दा दायर करले रहिट ।
लामिछानेसे प्राप्त करल अमेरिकी नागरिकता त्याग करल बाटके विधिवत जानकारी सम्बन्धित अधिकारी (प्रमुख जिल्ला अधिकारी) हे नइडेहल अदालतसे ठहर करले बा । ओस्टेक नेपाल नागरिकता ऐन, २०६३ के दफा १० ओ ११ लगायत नेपाल नागरिकता नियमावली, २०६३ के नियम ११ बमोजिम तोकल प्रकृया वमोजिम नागरिकता जारी कैना कार्यालयमे जाके निवेदन नइडेहलफे अदालतसे ठहर करले बा ।
उ अनुसारके प्रक्रिया अपनाइल कना समेत प्रत्यर्थीसे जिकिर लेहल नइपाइल अदालतके फैसलामे उल्लेख बा ।
‘यी अवस्थाके व्यक्तिहे नेपालके संविधानके धारा ८७ (१) तथा प्रतिनिधि सभा सदस्य निर्वाचन ऐन, २०७४ के दफा १२ के प्रयोजनके लाग उम्मेदवार बन्न योग्यता पुगल कहिके माने नइमिलल, अदालतके फैसलामे कहल बा ।
लामिछानेसे विधिवत रुपमे नेपाली नागरिकता फेर कायम कैना प्रक्रिया पुरा करल नइडेखल ओरसे सांसद पदमे रहिरहना नइमिल्ना अदालतके ठहर बा ।
उहाँ चितवन जिल्ला, निर्वाचन क्षेत्र नं २ से प्रतिनिधि सभा सदस्य पदमे उम्मेदवार हुई पैना अवस्था नइरहल ओरसे उम्मेदबार हुके निर्वाचित समेत हुइल विल्गाइल हुकान प्रत्यर्थी रबि लामिछानेहे उम्मेदबार कायम कैना, निजहे निर्वाचित घोषणा कैना, प्रमाणपत्र डेना लगायतके काम कारवाही नेपालके संविधानके धारा १३३ के उपधारा (२) (३) तथा धारा १३७ बमोजिम उत्प्रेषणके आदेशसे बदर हुइना ठहर करठ, अदालत कहले बा ।
