ओरेकसे ३१९ ठो लैङिक हिंसाके घटना संकलन

पहुरा समाचारदाता
धनगढी, १६ माघ । ओरेक नेपाल केन्द्रीय कार्यालयसे कुवाँरसे अगहनसम ३१९ ठो लैङिक हिंसाके घटना संकलन करले बा ।

संस्थामे अभिलेखिकरण करल (२६६) ओ टमान राष्ट्रिय पत्रपत्रिकासे प्राप्त (५३) तथ्याङकके आधारमे जम्मा ३१९ ठो लैङिक विभेदमे आधारित हिंसाके तथ्याङक संकलन करल ओरेक नेपाल जनैले बा । कुवाँरसे अगहन महिनामे अभिलेखीकरण हुइल घटनाहे विश्लेषण करेबेर समग्रमे १७८ जाने (५६ प्रतिशत) महिला तथा बालिकाउप्पर घरेलु हिंसा हुइल तथ्याङकमे डेखाइल बा । ओस्टेक करके ६८ जाने (२१ प्रतिशत ) उप्पर यौन हिंसा ओ ३७ जाने (१२ प्रतिशत) उप्पर सामाजिक हिंसा हुइल ओरेक नेपालके कार्यकारी निर्देशक लुभराज न्यौपाने बटैलै । घटनाहे हेरेबेर २६ से ३५ वर्ष उमेर समुहके महिला (३१ प्रतिशत) १०० जाने उप्पर सबसे ढेर हिंसा हुइल तथ्याँक संकलन हुइल उहाँ बटैलै ।

यी तथ्याङकसे प्रत्येक व्यक्तिके लाग घर सुरक्षित हुई पर्नामे घरभिटरे महिला तथा बालिका अभिन ढेर असुरक्षित बटै’, उहाँ कहलै,‘ढेर जैसिन (९३ प्रतिशत) हिंसा चिन्हल जानलसे हुइल विल्गाइठ । हानिकारक अभ्यास परम्पराके रूपमे हमार समाजमे गहिर जर गारल प्रचालनमे बा । जेकर कारण महिला अभिनफे शारीरिक, भावनात्मक वा मानसिक रूपमे हिंसाके सामना करे परल बा ।’

अभिलेखीकरण करल घटनाके तथ्याङकहे विश्लेषण करेबेर ५२ जाने (१६ प्रतिशत) महिला तथा बालबालिका माथि बलात्कार हुइल, २ जनहनहे बलात्कारपाछे हत्या, १—१ जनहनहे बोसीनियाके आरोप लगाके हत्या ओ दाइजोके कारण हत्या करल पाइल निर्देशक न्यौपाने बटैलै । ओस्टेक १० ठो (३ प्रतिशत) यौन दुव्र्यवहारके घटना, १९ ठो (६ प्रतिशत) हत्याके घटना, १ वठो हत्याके प्रयास, ४ ठो आत्महत्या ओ ६ ठो (२ प्रतिशत) साइबर अपराध जैसिन जधन्य अपराधके घटना संकलन हुइल बा ।

उ हिंसाके घटना मन्से १०० जाने (३१ प्रतिशत) २६ से ३५ बर्ष, ८१ जाने (२५ प्रतिशत) १८ से २५ बर्ष, ५३ जाने (१७ प्रतिशत) १८ वर्षसे कम उमेर समूहके, ४८ जाने (१५ प्रतिशत) ३६ से ४५ बर्ष, १७ जाने (५ प्रतिशत) ४६ से ५५ वर्षसम ओ १२ जाने (४ प्रतिशत) ५६ वर्षसे उप्परके रहल बटै ।

तथ्यांक हेरेबेर प्राय जैसिन घटना गोसियासे १५७ (४९ प्रतिशत) ओ (१७ प्रतिशत) परिवारके सदस्यसे ५४ ठो हुइल पाइल डेखल बा । ओस्टेक करके ३० जाने (९ प्रतिशत) छिमेकी, १६ जाने (५ प्रतिशत प्रेमी), २१ जाने (७ प्रतिशत) अपरिचित व्यक्ति ओ ९ जाने (३ प्रतिशत) सेवा प्रदायक हिंसा हुइल पाइल बा । ४ जाने (२ प्रतिशत) अविवाहित मने संगे बैठलसे, ७ जाने (२ प्रतिशत) सामान्य चिनजानके व्यक्तिसे ओ १ जाने (१.८८ प्रतिशत) समुदायके सदस्यसे हिंसा हुइल ओरक नेपाल जनैले बा ।

निर्देशक न्यौपानै कहलै, ‘कौनोफे व्यक्तिके सबसे लग्गेक सम्बन्ध गोसिया÷परिवार सदस्य हो । मने, तथ्याङ्क हेरेबेर लगभग दुइ तिहाई (६६ प्रतिशत) हिंसा गोसिया ओ परिवारके सदस्यसे प्रभावितहुक्रे सामना करटी बटै । घरहे सबसे सुरक्षित ठाँउ मानजाइठ मने यी तथ्यांकसे महिला घरमे असुरक्षित रहल प्रमाणित करले बा ।’

पीडक ओ उमेर

हिंसामे संलग्न पीडकके उमेरके विश्लेषण करेबेर दुई महिनामे सबसे ढेर २६ से ३५ वर्ष उमेर समुहके ९९ जाने (२६ प्रतिशत) युवा पुरुष बटै । ९८ जाने (२६ प्रतिशत) ३६ से ४५ उमेर समुहके, ७९ जाने (२१ प्रतिशत) १८ से २५ वर्ष उमेर समुहके, ३७ जाने (१० प्रतिशत) ४६ से ५५ वर्षसे उमेर समुहके, १२ जाने (३ प्रतिशत) १८ बर्षसे कम उमेर समूहके ओ २२ जाने (६ प्रतिशत) ५५ वर्षसे उप्पर हिंसामे संलग्न रहल पाइल बा । कलेसे ३४ जानेक (९ प्रतिशत) पीडकहुकनके उमेर समुह पत्ता नइहुइल तथ्याङक संकलन हुइल बा ।

हानिकारक परम्परागत अभ्यास

तथ्यांक हेरेबेर ९ ठो दाइजोके कारण हिंसा, ८ ठो बोक्सीनियाके आरोप लगाके हिंसा, ९ ठो बालविवाह ओ १० ठो बहुविवाहके तथ्यांक संकलन हुइल ओरेक नेपाल केन्द्रीय कार्यालयसे जनैले बा ।