किसानहे चैते धान ओे मकैके बिया वितरण

पहुरा समाचारदाता
कञ्चनपुर, १६ माघ । कृष्णपुर नगरपालिकासे किसानहुकनहे चैते धान ओ बसन्ते मकैके बीउ अनुदानमे वितरण करल बा ।

सोम्मार नगरपालिका परिसरमे हुइल एक कार्यक्रमके विच नगर उपप्रमुख द्रोपती रानासे किसानहे बीउ हस्तान्तरण करल हुइट । कृषि शाखासे किसानहे चैते धानके बिउमे ८० प्रतिशत अनुदान ओ बसन्ते मकैके बीउमे ५० प्रतिशत अनुदानके साथ बीउ वितरण करल हो । नगरपालिकाके कृषि शाखासे टमान कृषक समूह ओ किसानहे चैत धान ५४६ केजी ओ ४८५ केजी बसन्ते मकैके बीउ वितरण करल हो ।

बीउ हस्तान्तरण पश्चात नगरउपप्रमुख द्रोपती रानासे किसानहे खाली जग्गाके उपयोग करैना ओ व्यस्त रख्न नगरपालिकासे बिउमे अनुदानके प्रणाली नानल बटैली । उहाँ कृष्णपुर उत्पादनके हिसाबसे उर्वर भुमी रहल ओरसे किसानसे कम मात्रमे मिहिनेत करलेसेफे ढेर उत्पादन करे सेक्ना हुइल ओरसे अनुदानमे लागल बिउके सहि सदुपयोग करलेसे मजा उत्पादन हुके किसानके आजयार्जनमे वृद्धि हुइना बटैली ।

कृष्णपुरसे आर्थिक वर्ष २०७६÷०७७ से टमान सिजनमे किसानहे आवश्यक पर्ना बीउ अनुदानमे उपलब्ध करैटी आइल नगरपालिकाके कृषि प्राविधिक गणेश ओझा बटैलै । नगरपालिकासे सुपथ मुल्यमे हरेक वर्ष अनुदानमे बीउ डेहे लागलपाछे अनुदानमे बीउ लेना किसानके संख्यामे वृद्धि हुइटी रहल कृषि प्राविधिक गणेश ओझा बटैलै ।

नगरपालिकासे यिहीसे आघे गोहुँके बिउ,च्याउके बिउ, प्याजके विउ ओ बगर खेती कैना किसानहे टिनाके बिउमे अनुदान डेहल रहे । अनुदानमे बीउ वितरण कार्यक्रममे वडा न ९ के अध्यक्ष कैलाशबहादुर बलायर सभापति रहल रहिट कलेसे वडका पहुनामे कृष्णपुर नगरपालिकाके उपप्रमुख द्रोपती राना रहल रहिट ।