सेवक नेपाल कैलालीके सामाजिक परिक्षण
पहुरा समाचारदाता
लम्की, १६ माघ । कैलाली जिल्लाके लम्कीमे सोम्मार सेवक नेपाल कैलालीके सामाजिक लेखा परिक्षण कार्यक्रम हुइल बा ।
सेवक नेपाल कैलालीके आयोजना तथा गुड नेवर्स इन्टरनेशनल नेपाल कैलालीके आर्थिक तथा प्राविधिक सहयोगमे सामाजिक लेखा परिक्षण कार्यक्रम सम्पन्न हुइल हो ।
गुड नेवर्स इन्टरनेशनल नेपाल कैलालीके आर्थिक तथा प्राविधिक सहयोगमे सेवक नेपाल कैलालीसे सन २०२२ मे एकीकृत सामुदायिक विकास परियोजना मार्फत कैलाली जिल्लामे संचालित कार्यक्रमके लक्ष्य तथा उपलब्धीके साथे खर्च रकमके विषयमे जानकारी डेना उदेश्यसे सामाजिक लेखा परिक्षण कार्यक्रम सम्पन्न करल गुड नेवर्स इन्टरनेशनल नेपाल कैलालीके जिल्ला संयोजक रन्जित चौधरी जानकारी डेलै ।
सेवक नेपाल कैलालीके अध्यक्ष पवन भण्डारीके सभाध्यक्षतामे हुइल कार्यक्रममे लम्कीचुहा नगरपालिकाका वडा नम्बर १ के वडा अध्यक्ष नेत्रप्रसाद खनाल, वडा नम्बर ५ के वडा अध्यक्ष माया बिष्ट लगायतसे शुभकामना मन्तव्य रख्ले रहिट ।
कार्यक्रममे सेवक नेपाल कैलालीके शिक्षा शाखा अधिकृत प्रेमकुमार चौधरी परियोजनाके सन २०२२ मे सम्पन्न करल गतिविधि तथा सन २०२३ मे परियोजनासे स्वीकृत कार्यक्रमके बारेमे प्रस्तुतीकरण प्रस्तुत करल रहिट ।
एकीकृत सामुदायिक विकास परियोजना मार्फत सन् २०२२ मे कैलाली जिल्लाके टीकापुर ओ लम्कीचुहा नगरपालिका तथा जानकी ओ बर्दगोरिया गाउँपालिकामे परियोजनासे १ करोड ७४ लाख बराबरके बजेट खर्च हुइल कार्यक्रममे जानकारी कराइल रहे ।
कार्यक्रममे सहभागीहुक्रे कार्यक्रमके प्रभावकारिता, दिगोपना, पारदर्शीता, सुशासन, सामग्रीके उपलब्धता ओ सामाग्रीके गुणस्तरके विषयमे जिज्ञासा राखल रहिट ।
गुड नेवर्स इन्टरनेशनल नेपाल कैलालीके जिल्ला संयोजक रन्जित चौधरी स्वागत तथा कार्यक्रमके उदेश्य उप्पर प्रकाश पारल कार्यक्रममे पालिकाके विषयगत शाखाके प्रमुख तथा प्रतिनिधि, सहकारी समुहके प्रतिनिधि, बाल क्लब तथा संजालके प्रतिनिधि, स्पोन्सर बालबालिका करके करिब ५० जानेक सहभागिता रहे । कार्यक्रमके संचालन पत्रकार, बाल अधिकारकर्मी एवं नेपाल रेडक्रस सोसाइटी बलिया उपशाखा लम्कीके सभापति रंगप्रसाद तिमिल्सैना करल रहिट ।
