लखनउमे एसपीएके फराकिलो जित, सौर्यके अर्धशतक
पहुरा समाचारदात
लखनउ, १६ माघ । भारतके लखनउमे जारी इन्टरनेशल स्कुल प्रिमियर लिग क्रिकेट प्रतियोगिताके टिसरा खेलमे धनगढीके एसपीए कलेजसे फराकिलो जित हात परले बा ।
सोम्मार राति लखनउस्थित सिटी मन्टेश्वरी स्कुलके मैदानमे हुइल खेलमे एसपीएसे कोलकत्ताके साउथ इन्टरनेशनल स्कुलहे ११० रनसे पराजित करल ।
टस जिटके पहिले ब्याटिङ करल एसपीएसे निर्धारित २० ओभरमे ८ विकेट गुमाके १७५ रन बनाइल रहे । जवाफमे कोलकत्ता १६.१ ओभरमे सक्कु विकेट गुमाके ६५ रनमे समेटल ।
कोलकत्ताको यश पर्मरसे सर्वाधिक २१, पहिल खेलमे १४ रन जोरलै । एसपीएके सौर्य श्रेष्ठसे सानदार बलिङ करटी ३ विकेट हात परलै । उहाँ ४ ओभरमे २ ओभर मेडन रख्टी १३ रन खर्चलै ।ओस्टेक सचिन सावदसेफे ३ विकेट लेलै । सचिनसे ४ ओभरमे ९ रनकेल खर्चलै । ृउ बाह्ेक खगेन्द्र कुँवर, विप्लव खड्का, बसन्त कार्की ओ निर्मल भट्टसे समान १–१ विकेट लेलै ।
ओकरपाछे सौर्य श्रेष्ठसे ५९ रनके अर्धशतकीय पारी खेललपाछे एसपीएसे १७५ रनके स्कोर बनाइल रहे । ४४ बलमे उहाँ ५ चौका ओ ४ छक्का प्रहार करलै । ओस्टेक अजयसिंह कडालसे ३२ रन जोरलै । ३२ बलमे उहाँ २ चौका ओ ३ छक्का प्रहार करलै ।
उ बाहेक खगेन्द्र कुवर १८ बलमे २ चौका ओ १ छक्कासहित १८ तथा विपिन रावलसे ९ बलमे ३ चौका ओ एक छक्कासहित १९ रन जोेरलै ।
कोलकत्ताके यस पर्मर ओ सुर्याशं झा समान ३–३ विकेट लेलै । एसपीएके यी प्रतियोगितामे पहिल जित हो । यी आघे दुई खेलमे लगातार हार ब्यहोरल एसपीएके आघे बढ्न सम्भावना और टोलीके नतिजामे भर परी । खेलके म्यान अफ द म्याच एसपीएके सौर्य श्रेष्ठ चुन्लै । ओस्टेक उहाँ वेस्ट सिक्सेस अवार्डफे हात परलै । उ बाहेक खेलके मोस्ट भ्यालुएबल प्लेयर एसपीएके अजयसिह कडाल चुन्लै ।
विश्वप्रशिद्ध सिटी मन्टेश्वरी स्कुलके आयोजनामे हुइटी रहल प्रतियोगितामे नेपाल, श्रीलंका, ओमान, जिम्बाबेसहित भारतके कोलकत्ता, दिल्ली, पटना, हैदरावाद, मध्यप्रदेश, पञ्जाबलगायत शहरके टोली सहभागिता १६ टोलीके जनैले बटै । लिगकम नकआउट फम्र्याटमे हुइना लिग लखनउके तीन क्रिकेट ग्राउण्डमे हुइटी रहल बा ।
